قازاقستان رەسپۋبليكاسى پرەمەر-ءمينيسترىنىڭ ورىنباسارى ەرالى توعجانوۆ الماتىداعى جۇمىس ساپارىندا رەسپۋبليكا مەن قالانىڭ ەتنومادەني بىرلەستىكتەرىنىڭ وكىلدەرىمەن كەزدەسىپ, بۇكىلقازاقستاندىق بىرلىكتى نىعايتۋ, مەملەكەتتىك جانە ازاماتتىق قوعام ينستيتۋتتارىنىڭ ەتنوسارالىق قاتىناستار سالاسىنداعى ءوزارا ءىس-قيمىلىنىڭ تيىمدىلىگىن ارتتىرۋ ماسەلەلەرىن تالقىلادى.
«احىسكا» تۇرىك ەتنومادەني ورتالىعى» رقب توراعاسى زياتدين كاسانوۆ, «ميتسۆا» قازاقستاننىڭ ەۆرەي ۇلتتىق ۇيىمدارى قاۋىمداستىعى» زتب باسشىسى الەكساندر بارون, «قازاقستان ۇيعىرلارىنىڭ رەسپۋبليكالىق مادەني ورتالىعى» قب قۇرمەتتى توراعاسى احمەتجان شاردينوۆ, «نايري» قازاقستان رەسپۋبليكاسىنىڭ ارميان مادەني ورتالىقتارى قاۋىمداستىعى» رەسپۋبليكالىق قب توراعاسى ارتۋش كاراپەتيان جۇرگىزىلىپ جاتقان جۇمىستار تۋرالى اقپارات بەرىپ, ەتنوسارالىق كەلىسىمدى, قوعامداعى تولەرانتتىلىق پەن حالىق بىرلىگىن ودان ءارى نىعايتۋ بويىنشا بىرقاتار ۇسىنىستار ايتتى.
جەكەلەي العاندا, وتاندىق عىلىمدى, ۇلتتىق مادەنيەت جانە سالت-داستۇرلەردى دامىتۋ, سونىمەن بىرگە, پاندەميامەن جالپى كۇرەس اياسىندا ەتنومادەني ۇيىمداردىڭ ينتەگراتسياسى بويىنشا كۇش سالۋى, مۇقتاج قالا تۇرعىندارىنا قولداۋ شارالارى جونىندەگى يدەيالار ايتىلدى.
ەرالى توعجانوۆ قر اقپارات جانە قوعامدىق دامۋ مينيسترلىگىنە ايتىلعان ۇسىنىستاردى زەردەلەپ, پىسىقتاۋدى تاپسىردى.