استراحان اۋدانىندا كاسىبىن ەندى باستاعاندار مەملەكەت تاراپىنان 130 ملن تەڭگە كولەمىندە گرانتتار مەن جەڭىلدەتىلگەن نەسيە الىپ وتىر. بۇل «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» باعدارلاماسىن ىسكە اسىرۋدىڭ ناتيجەسى. بۇگىنگى تاڭدا مەملەكەتتىڭ قولداۋىنا يە بولعاندار ءوز ءىسىن دامىتىپ, كەڭەيتۋگە مۇمكىندىكتەرى جەتكىلىكتى, دەپ حابارلايدى Egemen.kz.
«ەڭبەك» – باعدارلاماسىنىڭ اۋقىمى كەڭ. ءبىر سوزبەن ايتقاندا, وقىپ, بىلىكتىلىگىن ارتتىرىپ, ءوز كاسىبىن اشقىسى كەلگەندەرگە تاپتىرماس مۇمكىندىك. استراحان اۋدانى بويىنشا بەس جىلدىق جوباعا 692 ادام قاتىستى. بيىلدىڭ وزىندە 15 ادام قىسقامەرزىمدى كاسىپتىك وقۋدان ءوتتى. 200 ايلىق ەسەپتىك كورسەتكىش مولشەرىندە 30 مەملەكەتتىك گرانت بەرىلدى. ءىسىن جاڭا باستاعان 34 كاسىپكەر جالپى قۇنى 130 ملن تەڭگەگە جۋىق نەسيە العان.
"2020 جىلى 555 مىڭ تەڭگە كولەمىندە گرانت الدىم. بۇعان وتە قۋانىشتىمىن. ازىرگە ەكى باس ءىرى قارا ۇستايمىن. قازىردىڭ وزىندە ونىڭ پايداسىن اقىرىنداپ كورىپ جاتىرمىن. ءسۇت ونىمدەرى مەن ماي ساتامىن. جاقىن ارادا تولدەيدى, ءسويتىپ مال باسى تاعى دا كوبەيەدى. مەنىڭ ەندىگى ماقساتىم – شاعىن نەسيە الىپ, مال باسىن كوبەيتۋ. ءسۇت ونىمدەرىنىڭ كولەمىن ۇلعايتسام دەگەن ويىم بار", – دەيدى كاسىپكەر جايناگۇل بايتازا.
«ەڭبەك» باعدارلاماسىنىڭ ءۇشىنشى باعىتى بويىنشا قوعامدىق جۇمىستارعا 190 ادام تارتىلدى. جاڭا ماماندىق الىپ, جۇمىس تاپقىسى كەلگەن 45 جۇمىسسىز جاستار تاجىريبەسىنە جىبەرىلدى. جۇمىسپەن قامتۋ ورتالىعى ماماندارىنىڭ ايتۋىنشا, جوسپار 100 پروتسەنتكە ورىندالدى.