ىلە الاتاۋىندا ەر ادام قۇتقارىلدى

وسىلايشا, 2020 جىلدىڭ 9 جەلتوقسانىندا تۇنگى ساعات 00:30-دا قر تجم رەسپۋبليكالىق جەدەل-قۇتقارۋ جاساعىنىڭ كەزەكشى بولىمىنە شىمبۇلاق تشك مەدەۋ اۋدانىندا 3000 استام مەتر بيىكتىكتە, چيمبۋلاچكا وزەنىنىڭ بويىندا 1955 جىلى تۋعان ەر ادام اداسىپ كەتتى دەگەن حابارلاما كەلىپ ءتۇستى. ەر ادام "مالايا كرۋگوسۆەتكا"  باعىتى بويىنشا جۇرگەن. الايدا, جاۋعان قاردىڭ بيىكتىگى 1 مەتر جانە تاستى جولدان ءوتۋ قيىن بولعاندىقتان, ول  جولدان شىعىپ كەتكەن. جولدا وزدىگىنەن جۇرە الماي, توڭىپ, السىرەپ قالعان. وسى ساتتە اداسقان ەر ادامعا  قۇتقارۋشىلاردىڭ كومەگى قاجەت بولعان.

وقيعا ورنىنا شۇعىل تۇردە 6 قۇتقارۋشى, ونىڭ ىشىندە كينولوگيالىق ەسەبى بار رەسپۋبليكالىق جەدەل-قۇتقارۋ جاساعىنىڭ جەدەل توبى جولعا شىقتى. قۇتقارۋ جۇمىسىنا 1 بىرلىك ارنايى تەحنيكا جۇمىلدىرىلدى.

رجقج جەدەل توبى ىزدەۋ جۇمىستارىن باستادى. قۇتقارۋشى توپ قار باسقان, شالعاي  ويلى-قىرلى جەرلەردەن ءوتىپ, قوڭىراۋ شالعان ساتتەن باستاپ ءبىر ساعات ىشىندە قاتتى گيپوتەرميا بەلگىلەرى بار زارداپ شەككەن ادامدى  تاپتى. وعان العاشقى مەديتسينالىق جانە پسيحولوگيالىق كومەك كورسەتتى.

قاتتى توڭىپ قالعان  ەر ادامعا  قۇتقارۋشىلار ىستىق شاي, جىلى كيىم بەردى. زارداپ شەگۋشىگە شۇعىل كومەك كورسەتىپ, ونى قاۋىپسىز جەرگە جەتكىزدى. قۇتقارۋشىلاردىڭ جەدەل جۇمىسىنىڭ ارقاسىندا ەر ادامنىڭ جاعدايى قاناعاتتانارلىق جاعدايدا.