بۋراباي باۋرايىنداعى ەتەك-جەڭى كەڭ پىشىلگەن مادەنيەت اۋىلىنىڭ قاريالارى ءبىر مەشىتتىڭ جوعىنان كوڭىلدەرى جۇدەپ جۇرگەن ەدى. ولقىلىقتىڭ ورنىن تولتىرۋ ءۇشىن 1991 جىلى العاشقى قادام دا جاسالعان.
اۋىل اقساقالدارى كەڭەسە كەلە, بوس تۇرعان ءبىر ءۇيدى مەشىت ەتىپ قايتا جابدىقتاۋدى قولعا الدى. توبەسىنە كوزتارتارلىقتاي ەتىپ كۇمبەز ورناتىلدى. ىشكى بولمەلەرى جاماعات جينالعاندا ناماز وقۋعا, جانازا شىعارۋعا لايىقتالىپ قايتا ءبولىندى. باسقاشا مۇمكىندىك بولماعان سوڭ وسىلاي لاجداعان. ال مەشىت وتە قاجەت ەدى. بۇرىننان ىنتىماعى بەكەم, بۇرا تارتار تەنتەك-تەلىسى, الا جىپتەن اتتايتىن سۋىق قولدىلارى دا جوق اۋىل تۇرعىندارى شاراپاتى مول يمانعا ۇيىسا, بىرلىك بۇگىنگىدەن دە بەكەم بولا تۇسەر ەدى.
2012 جىلى اۋىل يمامى ساتىبالدى ءابدىراش ۇلى ەل اقساقالدارىمەن جاڭا ءىستىڭ جاي-جاپسارىن سانالارىمەن سالماقتاپ, ەگجەي-تەگجەيلى كەڭەسە كەلە, جاڭا مەشىتتىڭ قۇرىلىسىن باستاۋعا بەل بۋدى. ەل ەرتەڭىن ويلاعان ۇيىمشىل جۇرت بىردەن كەلىسە كەتتى. وسى اۋىلدان تۇلەپ ۇشقان, تەپكەن تاسى ورگە دومالاپ تۇرعان كاسىپكەرلەر دە قولدادى. ءسويتىپ, 2013 جىلى جاڭا مەشىتتىڭ قۇرىلىسى باستالدى. قۇرىلىس جۇمىستارىن ۇيىمداستىرۋعا ەلگە جاناشىرلىعى مول نۇرلان ىبىراەۆ, ءمۇتالاپ جۇمانباەۆ, بالتاش قوسىباەۆ, ەرمەك بەكباەۆ ءتارىزدى ازاماتتار كوپ ەڭبەك ءسىڭىردى.
ماسەلەنىڭ ءبارىن قارجى شەشەتىنى بەلگىلى. بۇل تاراپتا دا اسا كوپ قيىندىق بولا قويعان جوق. جاپاروۆتار مەن مەرگەنباەۆتار اۋلەتتەرى جانە وسى اۋىلدىڭ پەرزەنتتەرى باۋىرجان ەلۋباەۆ, مىرزاباي ابدىحالىقوۆ سىندى ازاماتتار قوماقتى قارجى ءبولدى. قالعانىن اۋىل تۇرعىندارىنىڭ وزدەرى كوتەردى. وسىنداي ىنتىماقتىڭ ناتيجەسىندە 10 ملن تەڭگە كولەمىندە قاراجات جينالدى.
ورتاق ىسكە اۋىل تۋماسى, «ازيا فيلتر» سەرىكتەستىگىنىڭ باسشىسى ينديرا ىبىراەۆا 2 ملن تەڭگە كولەمىندە كومەك كورسەتىپ, اۋىل ازاماتتارى تايلى-تاياعىمەن تۇگەل جينالىپ, جاڭا مەشىتتىڭ شاتىرىن جاۋىپ, الىستان كوز تارتاتىن كورنەكتى كۇمبەز ورناتتى. بيىل جازدا وسى اۋىلدان تۇلەپ ۇشقان تۇلەكتەر اراسىندا وتكەن «جاقسىلىق جاساۋدان جارىسايىق» ەستافەتاسىنا قاتىسۋشى جومارت بالتاشەۆ پەن باۋىرجان ابدىحالىقوۆ باستاعان ازاماتتار 800 مىڭ تەڭگە قاراجات جيناپ, جاڭا مەشىتكە سۋ قۇبىرىن تارتىپ, ىشىنە جىلى ەدەن ورناتىپ, جوندەۋ جۇمىستارىن تاپ-تۇيناقتاي ەتىپ جاساپ بەردى.
قازىر اۋىلداعى ەڭسەسى بيىك قۇلشىلىق ءۇيى يماندىلىق ۇيىعان اۋىلدىڭ رۋحاني بايلىعىن ەسەلەۋگە سەپتىگىن تيگىزىپ تۇر. بۇل دا – ەل بىرلىگىن ويلاعان, جاقىنىنا جاناشىر بولا الاتىن جاماعاتتىڭ ونەگەلى ءىسى.
اقمولا وبلىسى,
بۋراباي اۋدانى