الماتى اكىمى باقىتجان ساعىنتاەۆ ورتالىق كوممۋنيكاتسيالار قىزمەتىندە وتكەن بريفينگتە «جاڭا الماتىنىڭ» شەتكى ايماقتارىن دامىتۋدىڭ كەشەندى جوسپارىن جۇزەگە اسىرۋ تۋرالى ايتتى.
ينجەنەرلىك ينفراقۇرىلىمدى دامىتۋ اياسىندا بيىل 300 شاقىرىمعا جۋىق سۋ قۇبىرلارى مەن كارىز جەلىلەرى تارتىلدى. ناتيجەسىندە «جاڭا الماتى» ىقشاماۋداندارىنىڭ 50 مىڭ تۇرعىنى سۋمەن قامتۋدىڭ جانە سۋدى بۇرۋدىڭ ورتالىقتاندىرىلعان جۇيەسىنە قوسىلدى.
2019 جىلى سىرتقى جارىقتاندىرۋ جەلىلەرىن ورناتۋدى تالاپ ەتەتىن جارىعى جوق كوشەلەردى انىقتاۋ بويىنشا اۋديت جۇرگىزىلدى. ناتيجەسىندە 2 جىلدىڭ ىشىندە قالانى تولىقتاي جارىقتاندىرۋ بويىنشا شەشىم قابىلداندى. جىل سوڭىنا دەيىن قالا شەتىندەگى 1423 كوشە جارىقتاندىرىلادى. بۇل قالانىڭ الاتاۋ, جەتىسۋ, ناۋرىزباي, تۇركسىب سىندى 4 اۋدانىن 100% جارىقتاندىرۋدى قامتاماسىز ەتەدى.
2021 جىلدىڭ سوڭىنا دەيىن قالعان المالى, اۋەزوۆ, بوستاندىق, مەدەۋ اۋداندارىنداعى 601 كوشەنى جارىقتاندىرۋ جوسپارلانۋدا. وسىلايشا, الماتى قالاسىن 100% جارىقتاندىرۋعا قولجەتكىزۋ جوسپارلانۋدا.
جول ينفراقۇرىلىمىن دامىتۋ اياسىندا «جاڭا الماتىنىڭ» ىقشاماۋداندارىندا 42,8 شاقىرىم جول سالىندى. ۇزىندىعى 192 شاقىرىم بولاتىن 270 كوشەدە ورتاشا جوندەۋ جۇمىستارى اياقتالدى, 86 شاقىرىم تروتۋار سالىنىپ, جوندەلدى. 4 ساياباق جانە 5 جاياۋ جۇرگىنشى ايماقتارىن اباتتاندىرۋ قاراستىرىلعان.
بيىلعى جىلى جوسپارداعى ءىس-شارالاردىڭ بارلىعى تولىعىمەن ورىندالدى. كەلەر جىلى شەتكى ايماقتاردى دامىتۋ جونىندەگى جوبالار ىسكە اسىرىلادى, ياعني قارجىلاندىرۋ كوزدەرى ارقىلى جالپى سوماسى 200 ملرد تەڭگەدەن استام قارجى ءبولۋ جوسپارلانۋدا.