ارگەنتينا ەلدەگى ەڭ باي ازاماتتارعا ءدارى-دارمەك پەن پاندەميا جاعدايىندا ەنگىزىلگەن شارالاردىڭ شىعىنىن تولەتۋ ءۇشىن جاڭا سالىق ءتۇرىن قابىلدادى.
سەناتورلار ءبىر رەتتىك «ميلليونەر سالىعىن» 26 قارسى داۋىسقا 42 دەپۋتاتتىڭ قولداۋىمەن وتكىزدى. جاڭا زاڭ 200 ملن پەسو, ياعني 2,5 ملن دوللاردان اساتىن اكتيۆتەرى بار ازاماتتارعا قاتىستى. بۇل سالىقتى شامامەن 12 مىڭ ادام تولەۋگە ءماجبۇر بولادى. ەلدە 1,5 ملن-عا جۋىق ادام ۆيرۋس جۇقتىرىپ, ونىڭ 40 مىڭعا جۋىعى قايتىس بولعان. 45 ملن حالقى بار ەل ءۇشىن بۇل اۋىر سوققى بولدى. كارانتين شارالارى ەلدەگى ونسىز دا جۇمىسسىزدىق, كەدەيلىك, ۇكىمەتتىڭ قارىزدارىمەن قۇردىمعا كەتكەن ەكونوميكانى ودان ءارى قۇلدىراتىپ جىبەرگەن. جالپى, ارگەنتينا ەكونوميكاسى 2018 جىلدان بەرى رەتسەسسيادا.
جينالعان قاراجاتتىڭ 20%-ى ءدارى-دارمەككە, 20%-ى شاعىن جانە ورتا بيزنەسكە, 20%-ى ستۋدەنتتەردىڭ ستيپەندياسىنا, 15%-ى الەۋمەتتىك جوبالارعا, ال قالعان 25%-ى تابيعي گاز وندىرەتىن كاسىپورىندارعا جۇمسالادى.