ۇلىبريتانيادا اباي اندەرىنىڭ اعىلشىن تىلىندەگى جيناعى تانىستىرىلدى

كىتاپتىڭ تۇساۋكەسەرى جانە كونتسەرت قازاقتىڭ ۇلى اقىنى جانە اعارتۋشىسى اباي قۇنانباي ۇلىنىڭ 175 جىلدىعىنا ارنالعان ءىس-شارالار سەرياسىنىڭ ءبىر پاراسى.

كىتاپتى قازاقستان ۇلتتىق اۋدارما بيۋروسىنىڭ قولداۋىمەن ەلشىلىك باسىپ شىعاردى. ىشىندە ابايدىڭ اۆتورلىعىمەن جازىلعان 23 ءان مەن ءۇش كۇي, سونداي-اق پارتيتۋرالار مەن مۋزىكاعا بەيىمدەلگەن اعىلشىن تىلىندەگى اندەردىڭ ماتىندەرى بار. وقىرمانداردىڭ, سونداي-اق, QR-كودتار ارقىلى www.kitap.kz سايتىنا كىرىپ, ابايدىڭ قازاق تىلىندەگى اندەرىن تىڭداۋعا مۇمكىندىكتەرى بار.

شوتلانديانىڭ اتاقتى اقىنى جانە كوپتەگەن ماراپاتتاردىڭ يەگەرى, سونىڭ ىشىندە بەدەلدى "Forward Prize for Poetry" جانە "T. S. Eliot Prize" تە بار, پروفەسسور دجون بەرنسايد ولەڭدەردىڭ اعىلشىن تىلىندەگى اۋدارماسىن جاسادى. ول اباي ليريكاسىنىڭ ماعىناسىن جەتكىزىپ قانا قويماي, تۇپنۇسقا اۋەندەرىنىڭ ىرعاعىنا بارىنشا جاقىن بولۋعا تىرىستى. بەدەلدى گيلدحولل مۋزىكا جانە دراما مەكتەبىنىڭ پروفەسسورى سايمون ۋيللس كىتاپقا العى ءسوز جازىپ, ونى قازاق مۋزىكاسىنىڭ رۋحىنا ارنادى.

ونلاين-كونتسەرتتىڭ اشىلۋىندا قازاقستاننىڭ ۇلىبريتانياداعى ەلشىسى ەرلان ىدىرىسوۆ: "اباي كەيىنگى ۇرپاققا ادەبي شىعارماشىلىعىمەن قاتار قازاق مادەنيەتىنىڭ اجىراماس بولىگىنە اينالعان باي جانە الۋان ءتۇرلى مۋزىكالىق مۇراسىن قالدىردى. كىتاپتى وقىعان اعىلشىنتىلدى اۋديتوريا ابايدى جاڭا قىرىنان اشادى", دەدى.

كونتسەرت اياسىندا قازاق ۇلتتىق ونەر ۋنيۆەرسيتەتىنىڭ رەكتورى, الەمگە ايگىلى مۋزىكانت ايمان مۇساقوجاەۆا مەن قازاق مەملەكەتتىك سيمفونيالىق وركەسترى ابايدىڭ مۋزىكالىق شىعارمالارىنان پوپۋرري ورىندادى. تانىمال قازاقستاندىق جاس ءانشى, "بالالار ەۆروۆيدەنيەسى – 2019" بايقاۋىنىڭ جۇلدەگەرى ەرجان ماكسيم ءوزىنىڭ تالىمگەرى گۇلميرا احمەدياروۆانىڭ فورتەپيانوداعى سۇيەمەلدەۋىمەن "جەلسىز تۇندە جارىق اي" ءانىن تارتۋ ەتتى.

بريتانيا ەستراداسانىڭ جاڭا جۇلدىزى Smilee "The Apple of My Eye" ("كوزىمنىڭ قاراسى") ءانىن ورىنداسا, وپەرا ءانشىسى دجوزەفين حوتورن تۇرىك ءپيانيسى يلايدا دەنيز وگۋزدىڭ سۇيەمەلدەۋىمەن "Blessings on You" ("ايتتىم سالەم قالام قاس") ءانىن ۇسىندى.

قازاق فولكلورلىق مۋزىكاسىنىڭ شەبەرلەرى ەرلان رىسقالي مەن پەريزات تۇراروۆا دومبىرانىڭ سۇيەمەلدەۋىمەن "ولسەم ورنىم قارا جەر سىز بولماي ما" جانە "ەسىڭدە بار ما جاس كۇنى" اندەرىنىڭ كلاسسيكالىق نۇسقالارىن شىرقادى.

كانتري-روك ستيلىنە ماماندانعان بريتانيالىق ءانشى اننابەل پاتتينسون "The Moon" ("جەلسىز تۇندە جارىق اي") ءانىنىڭ جاڭاشا ينتەرپرەتاتسياسىن ۇسىنسا, كۇيشى رۇستەم نۇركەنوۆ "تورجورعا" كۇيىن ەجەلگى اسپاپ, ءداستۇرلى تۇردە اباي كۇيلەرىن ورىنداۋ ءۇشىن پايدالانىلاتىن ءۇش ىشەكتى دومبىرادا ورىندادى.

پروفەسسور دج.بەرنسايد پەن پروفەسسور س.ۋيللس اباي شىعارماشىلىعىنىڭ پوەتيكالىق جانە مۋزىكالىق اسپەكتىلەرى تۋرالى ءوز ويلارىن ورتاعا سالدى. دج.بەرنسايد: "قازاق اعارتۋشىسىنىڭ ولەڭدەرىن اۋدارۋ جۇمىسى شىعارمالارىنىڭ جان-جاقتىلىعى مەن تەرەڭدىگىنە, سونداي-اق ىرعاقتىق ەرەكشەلىكتەرىنە بايلانىستى وتە قىزىقتى ءارى كۇردەلى بولدى. ۇلى اقىن ءوزىنىڭ اندەرى ارقىلى تىڭداۋشىمەن سۇحباتتاسادى. سونىمەن قاتار قاراپايىم, ۇعىنىقتى تىلدە ماحاببات, دوستىق, قايعى-قاسىرەت, قۋانىش جانە باسقا دا ەموتسياعا تولى كۇردەلى تاقىرىپتاردى تالقىلايدى", دەدى.

س.ۋيللس ءوز مونولوگىندا قازاق مۋزىكاسىنىڭ ەرەكشەلىكتەرى مەن ونىڭ ەۋروپالىق كلاسسيكادان تۇبەگەيلى ايىرماشىلىقتارىن تاقىرىپ وزەگىنە اينالدىردى. ول اباي شىعارماشىلىعى مەن جالپى قازاق مۋزىكاسى يمپروۆيزاتسياعا نەگىزدەلگەنىنە جانە ورىنداۋ بويىنشا بەكىتىلگەن نۇسقاۋلار جيىنتىعىنا باعىنبايتىندىعىنا ەرەكشە توقتادى. سوندىقتان, ونىڭ ايتۋىنشا, اعىلشىن ءتىلدى وقىرماندار كىتاپتاعى اندەردى ورىنداۋ كەزىندە يمپروۆيزاتسيا ونەرىنە دايىن بولۋلارى كەرەك ەكەنىن اتاپ ءوتتى.

كونتسەرت ەلشىلىكتىڭ سايتىندا, سونداي-اق Facebook-تەگى رەسمي پاراقشاسىندا كورسەتىلدى.