قىزىلوردادا اسا ءىرى مولشەردە ەسىرتكى تاسىمالداعان قالا تۇرعىنى قۇرىقتالدى, – دەپ حابارلايدى Polisia.kz.
2020 جىلدىڭ 1 جەلتوقسانىندا پاترۋلدىك پوليتسيا قىزمەتكەرلەرى “قىزىلوردا-پاۆلودار” تاس جولىنىڭ 12-شاقىرىمىندا جول ەرەجەسىن بۇزعان جەڭىل اۆتوكولىكتى توقتاتقان. تەكسەرۋ بارىسىندا اۆتوكولىكتىڭ جۇك سالعىشىنان جولاۋشىعا تيەسىلى ەرەكشە ءيىسى بار ءشوپ سالىنعان پوليەتيلەن پاكەت الىندى. ساراپتاما قورىتىندىسى بويىنشا ەرەكشە ءيىسى بار زات سالماعى توعىز كەلىگە جۋىق كەپتىرىلگەن ماريحۋانا ەكەندىگى انىقتالدى.
30 جاستاعى قىزىلوردا قالاسىنىڭ تۇرعىنى پوليتسيا باسقارماسىنىڭ ۋاقىتشا ۇستاۋ يزولياتورىنا قاماۋعا الىندى. بۇل فاكت بويىنشا قازاقستان رەسپۋبليكاسى قىلمىستىق كودەكسىنىڭ 296-بابىنىڭ 4-بولىگىمەن (اسا ءىرى مولشەردەگى ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىنسىز زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ) سوتقا دەيىنگى تەرگەپ-تەكسەرۋ امالدارى جۇرگىزىلۋدە.