ەلورداداعى MEGA Silk Way ساۋدا, ويىن-ساۋىق ورتالىعىندا تۇڭعىش پرەزيدەنت كۇنىنە وراي, «رۋحاني جاڭعىرۋ» قازاقستاندىق قوعامدىق دامۋ ينستيتۋتى مەن Ruh.kz اقپاراتتىق پورتالىنىڭ ۇيىمداستىرۋىمەن «سۇيىكتى استانا» اتتى فوتوكورمە وتۋدە.
ن.ءا.نازارباەۆتىڭ يدەياسىمەن دۇنيەگە كەلگەن سۇيىكتى استانا بۇگىندە وتكەننىڭ باي مۇراسى مەن قازىرگى زاماننىڭ ەڭ جاقسى جەتىستىكتەرىن ۇيلەستىرە وتىرىپ, قارقىندى دامىپ كەلە جاتقان قازاقستاننىڭ جارقىن بەينەسىنە اينالدى.
فوتوكورمەگە اۋەسقويلارمەن قوسا, كاسىپقوي فوتوگرافتار دا قاتىستى. كوپشىلىكتىڭ الدىنا قويىلعان جۇمىستار بايقاۋ ارقىلى تاڭدالدى. «سۇيىكتى استانا» دەپ اتالاتىن ەكسپوزيتسياعا ەلورداعا دەگەن سۇيىسپەنشىلىكتى كورسەتەتىن, ەرەكشە تاسىلمەن تۇسىرىلگەن ۇزدىك كادرلار كىردى.
نۇر-سۇلتان قالاسىنىڭ تۇرعىنى اسەل توقتاروۆا فوتوكورمەدەن العان ادەمى اسەرىن بىلايشا جەتكىزدى.
«قازىرگى كۇنى ۇيالى تەلەفوننان باستاپ فوتواپپاراتقا دەيىن سۋرەتكە ءتۇسىرۋدىڭ سان ءتۇرلى تەحنيكالارى بار. بارلىعى فوتوسۋرەتتىڭ نە ەكەنىن ۇمىتقان. ءىس «اۆاعا ءتۇسىر» دەۋمەن عانا شەكتەلەدى. اتالمىش فوتوبايقاۋ شىعارماشىلىقتىڭ ماڭىزدىلىعىن بايقاتادى. البەتتە, جاعىمدى, ءپوزيتيۆتى ەموتسيالاردى قالايمىز. ءبىزدىڭ نۇر-سۇلتان – ادەمى قالا. كورمەگە قويىلعان سۋرەتتەر سونىڭ ايقىن دالەلى. سۋرەتتەردەن وزگەشە اسەر الۋ ءۇشىن قانشاما زەيىن, اڭعارىمپازدىق قاجەت».
ەلوردا تاريحىنا ۇڭىلگىسى كەلەتىن كەز كەلگەن ادام كورمەگە بارىپ, سۇيىكتى استانامىزداعى اسەم كوشەلەر مەن اسپانمەن تەڭەسكەن ءزاۋلىم عيماراتتارعا ءبىر ءسات ساياحاتتاي الادى.