الماتى تاۋلارىندا اداسىپ كەتكەن تۋريستەر قۇتقارىلدى

قالالىق قۇتقارۋ قىزمەتىنىڭ حابارلاۋىنشا, 1 جەلتوقسان كۇنى 109 قىزمەتى ەكى قۇتقارۋ وپەراتسياسىن جۇرگىزدى.

"العاشقى حابارلاما, قۇتقارۋ قىزمەتىنىڭ 109 باسقارۋ پۋلتىنە كەشكى ساعات 18:45-تە ءتۇستى. قوڭىراۋ شالعان ءۇش تۋريست قاراڭىعى ءتۇسىپ كەتكەندىكتەن, قايتار جولدى تابا الماي اداسىپ كەتكەندەرىن ايتتى. ولار "شىمبۇلاق" تاۋ شاڭعىسى كەشەنىنىڭ جوعارى جاعىندا قالىپ قويعان. ىزدەۋ جۇمىستارىنا 3 قۇتقارۋشى جۇمىلدىرىلدى. قۇتقارۋشىلار تۋريستەردى تەڭىز دەڭگەيىنەن 2900 مەتر بيىكتىكتە تاۋىپ الدى. ولاردىڭ بارلىعى تومەنگە ءتۇسىرىلدى. ەشقانداي ادام زارداپ شەككەن جوق", دەدى قالالىق قۇتقارۋ قىزمەتىنىڭ ءباسپاسوز قىزمەتىنەن.

سونداي-اق, مەدەۋ اۋدانىنا قاراستى, "دۋمان" شاعىناۋدانىنىڭ ماڭىندا دا قۇتقارۋ ءجۇمىستارى جۇرگىزىلدى.

حابار بەرۋشىنىڭ ايتۋىنشا, تەكساي وزەنىندە مۇز كەپتەلىسى پايدا بولىپ, سۋ دەڭگەيى كوتەرىلىپ كەتكەن. سونىڭ سالدارىنان, جەكە ۇيلەر مەن تالعار تاس جولىن سۋ باسۋ قاۋپى تۋىنداعان. وقيعا ورنىنا 4 تەحنيكا بىرلىگى مەن 5 جەكە قۇرام جىبەرىلدى. ماماندار وزەن ارناسىن مۇزدان تازارتتى.