پرەزيدەنتتىڭ تاپسىرماسىمەن جامبىل وبلىسىنىڭ اۋماعىندا كوروناۆيرۋسقا قارسى ۆاكتسينا شىعاراتىن زاۋىت سالىنۋدا. جالپى قۇنى - 7 ملرد تەڭگەگە جۋىق. وندىرىستىك قۋاتى - جىلىنا 30-60 ملن دوزا. ورتالىق كوممۋنيكاتسيالار قىزمەتىندە وتكەن بريفينگتە ءوڭىر باسشىسى بەردىبەك ساپارباەۆ جوباعا تولىعىراق توقتالدى.
ونىڭ ايتۋىنشا, قازىر بۇل زاۋىت برۋتسەللەزگە, دەرماتيتكە, قۇس تۇماۋىنا قارسى ۆاكتسينا شىعارادى. بۇل جانۋارلار مەن ادامداردىڭ يممۋنيتەتىن كوتەرۋگە بايلانىستى دارىلەر.
«جىل سوڭىنا دەيىن زاۋىتتا بارلىق قۇرىلىس جۇمىستارى اياقتالادى, قاڭتار-اقپاننان باستاپ قاجەتتى جابدىقتاردى, قۇرىلعىلاردى, جەلىلەردى جانە ت.ب. مونتاجداۋ باستالادى. جوسپار بويىنشا ناۋرىز ايىندا كلينيكالىق زەرتتەۋلەردىڭ ءۇشىنشى كەزەڭى اياقتالىپ, ۆاكتسينا شىعارىلا باستايدى. قۋاتى جىلىنا 30-دان 60 ملن دوزاعا دەيىن بولادى. بيولوگيالىق قاۋىپسىزدىكتى قامتاماسىز ەتۋگە كەلەتىن بولساق, عىلىمي-زەرتتەۋ ينستيتۋتى تاراپىنان حالىقارالىق تالاپتاردى ەسكەرە وتىرىپ, بارلىق قاجەتتى جاعدايلار جاسالعان. بارلىق شارتتار ەسكەرىلگەن. ەڭ باستىسى - ۆاكتسينالاردى ساقتاۋ, ەكىنشىسى - تاسىمالداۋ جانە ونى دايىنداۋ, شىعارۋ كەزىندەگى ينستيتۋت قىزمەتكەرلەرىنىڭ قاۋىپسىزدىگى», - دەپ اتاپ ءوتتى ساپارباەۆ.