Junior Eurovision XVIII ءان بايقاۋىندا ەل نامىسىن قورعاعان قاراقات باشانوۆا 2-ورىنعا يە بولدى. جاس تالانت ونەر دوداسىندا Forever ءانىن شىرقاعان ەدى.
ال فرانتسيانىڭ اتىنان قاتىسقان ۆالەنتيناعا ءبىرىنشى ورىن بۇيىرسا, ءۇشىنشى ورىندى يسپانيالىق سولەا يەلەندى. 2020 جىلعى Junior Eurovision بايقاۋىنا بەلارۋس, فرانتسيا, گرۋزيا, قازاقستان, مالتا, نيدەرلاند, رەسەي, سەربيا, يسپانيا, ۋكراينا, پولشا جانە گەرمانيا ەلدەرىنەن ونەرپازدار قاتىستى.
Junior Eurovision XVIII ءان بايقاۋىنىڭ جەڭىمپازى قازىلار القاسىنىڭ داۋىس بەرۋىمەن جانە ونلاين-داۋىس بەرۋ ارقىلى انىقتالدى. داۋىس بەرۋ جۇيەسى ءداستۇرلى نەگىزدە: 50% قازىلار القاسىنىڭ شەشىمى جانە 50% ونلاين-داۋىس بەرۋ ناتيجەسىنە بايلانىستى.
قازاقستان Junior Eurovision ءان بايقاۋىنا العاش رەت 2018 جىلى قاتىسقان ەدى. وندا دانەليا تولەشوۆا «وزىڭە سەن» انىمەن التىنشى ورىنعا يە بولدى. ال 2019 جىلى ەرجان ماكسيم «ارمانىڭنان قالما» انىمەن ەكىنشى ورىندى (قازىلار القاسىنىڭ شەشىمى بويىنشا ءبىرىنشى) يەلەندى. بۇل جولى «حابار» اگەنتتىگىنىڭ ەۋروپالىق حابار تاراتۋ وداعىنىڭ (EBU) قاۋىمداسقان مۇشەسى بولۋىنىڭ ارقاسىندا ەل ونەرپازدارى حالىقارالىق بايقاۋدا ءۇشىنشى رەت باعىن سىنادى.
ەسكە سالا كەتەيىك, 26 قىركۇيەكتە وتكەن ۇلتتىق ىرىكتەۋ فينالىنا ەلىمىزدىڭ تۇكپىر-تۇكپىرىنەن ون ەكى بالا قاتىسقان ەدى. ولاردىڭ اراسىندا الماتى وبلىسىنىڭ رىسقۇلوۆ اۋىلىنان كەلگەن قاراقات باشانوۆا جەڭىسكە جەتتى.