شىمكەنت قالاسىنا تۇرعىنداردى قوعامدىق كولىكپەن قامتۋ ماقساتىندا جاڭادان 590 اۆتوبۋس اكەلىندى. جولاۋشىلاردى تاسىمالداۋدا بارلىق جاعداي قاراستىرىلعان اۆتوبۋس, جوعارى ساپا ستاندارتىنا سايكەستەندىرىلگەن. بۇل تۋرالى قالا اكىمدىگىنىڭ ءباسپاسوز قىزمەتى حابارلادى.
قالا اكىمى مۇرات ايتەنوۆ قالاعا جاڭا اۆتوبۋستاردى كورۋ ءۇشىن «T-bus» اۆتوپاركىنە باردى. مۇنداعى بارلىق اۆتوبۋستار بەينەكامەرا, جەلدەتكىش, حابارلاما جاريالاۋعا ارنالعان ميكروفوندارمەن جابدىقتالعان. سونىمەن قاتار, اۆتوبۋستاردا پاندۋس مەن مۇگەدەكتەردىڭ اربالارىن ورنالاستىراتىن ورىندار دا قاراستىرىلعان.
كومپانيا قوعامدىق كولىكتەردە مەتان-گازىن پايدالانۋدا ۇلكەن تاجىريبەگە يە. مارشرۋتتارعا ۇزدىكسىز قىزمەت كورسەتۋ ءۇشىن وندىرىستىك-تەحنيكالىق بازاسى مەن اۆتوماتتاندىرىلعان گاز تولتىرۋ ستانتسياسى بار. 1 جەلتوقساننان باستاپ 150 اۆتوبۋس قالانىڭ شالعاي اۋداندارىن ورتالىقپەن بايلانىستىراتىن №103, 27, 35, 84, 135, 92, 74, 12 مارشرۋتتارىندا قىزمەت كورسەتەدى.
ايتا كەتەيىك, شاھاردا جولاۋشىلاردى تاسىمالداۋدى دامىتۋدىڭ 2018-2020 جىلدارعا ارنالعان كەشەندى باعدارلاماسى نەگىزىندە قالا اكىمدىگى تاراپىنان بىلتىر 300 اۆتوبۋس ساتىپ الىنعان بولاتىن. قازىرگى تاڭدا بۇل اۆتوبۋستار حالىقتىڭ يگىلىگىنە قىزمەت كورسەتىپ وتىر.