تۇركىستان وبلىسى تۇلكىباس اۋدانى, ساستوبە كەنتىندە ورنالاسقان ەمحانا 7 مىڭنان استام حالىققا قىزمەت كورسەتەدى. جارتى عاسىر بۇرىن قابىرعاسى قالانعان عيماراتتىڭ ابدەن توزىعى جەتكەن, دەپ حابارلايدى Egemen.kz.
اپاتتى دەپ تانىلعان دارىگەرلىك امبۋلاتوريادا بولعان وبلىس اكىمى ومىرزاق شوكەەۆتىڭ جۇمىس ساپارى بارىسىندا كەلەر جىلى جاڭا ەمحانا سالىناتىنى ءمالىم بولدى. جاڭادان بوي كوتەرەتىن دارىگەرلىك امبۋلاتوريا زاماناۋي ۇلگىدە جاساقتالىپ, ءبىر اۋىسىمدا 75 كەلۋشىگە ارنالادى. مەديتسينا ۇيىمدارىنىڭ جاي-كۇيىمەن تانىسقان وبلىس اكىمى تۇلكىباس اۋداندىق ورتالىق اۋرۋحاناسىندا جۇرگىزىلىپ جاتقان كۇردەلى جوندەۋ جۇمىستارىمەن تانىستى. اۋرۋحاناعا قاراستى 5 عيماراتتا كۇردەلى جوندەۋ جۇمىستارى قولعا الىنعان. جوندەۋ جالعاسۋدا. ومىرزاق ەستاي ۇلى كۇردەلى جوندەۋدەن وتكەن اۋرۋحاناداعى قۇرىلىس ساپاسىنا وڭ باعاسىن بەرىپ, جۇمىستى قاتاڭ باقىلاۋدا ۇستاۋدى مىندەتتەدى.
ورتالىق اۋرۋحانادا 100 مىڭعا جۋىق حالىققا امبۋلاتوريالىق – ەمحانالىق, ستاتسيونارلىق, ستاتسيوناردى الماستىراتىن كومەك جانە كونسۋلتاتيۆتى – دياگنوستيكالىق قىزمەت تۇرلەرى كورسەتىلەدى. وندا مىڭنان استام مەديتسينا قىزمەتكەرى قىزمەت ەتەدى.