ەلوردالىق دوستىق ۇيىندە تۇڭعىش پرەزيدەنت كۇنىنە ارنالعان «قازاقستان رەسپۋبليكاسىنىڭ تۇڭعىش پرەزيدەنتى – قازاقستان حالقى اسسامبلەياسىنىڭ توراعاسى ن.ءا.نازارباەۆتىڭ بىرلىك پەن كەلىسىمدى نىعايتۋ جونىندەگى ساياساتى» تاقىرىبىندا عىلىمي-ساراپشىلىق كەڭەسىنىڭ كەڭەيتىلگەن وتىرىسى ءوتتى.
قازاقستان حالقى اسسامبلەياسى مۇرىندىق بولعان كەڭەس وتىرىسىنا قازاقستان حالقى اسسامبلەياسى توراعاسىنىڭ ورىنباسارى جانسەيىت تۇيمەباەۆ, پارلامەنت ءماجىلىسى توراعاسىنىڭ ورىنباسارى ۆ.بوجكو, اقپارات جانە قوعامدىق دامۋ ۆيتسە-ءمينيسترى م.ءازىلحانوۆ, قولدانبالى ەتنوساياسي زەرتتەۋلەر ينستيتۋتىنىڭ ديرەكتورى ت.قاليەۆ, پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ز.شاۋكەنوۆا, قازاقستان حالقى اسسامبلەياسىنىڭ عىلىمي-ساراپشىلىق كەڭەسىنىڭ ءتورايىمى ا.سادۋاقاسوۆا, باسقا دا قازاقستاندىق ساراپشىلار مەن عالىمدار, قحا عىلىمي-ساراپشىلىق كەڭەسىنىڭ جانە قحا مۇشەلەرى, مەملەكەتتىك ورگاندار مەن ەتنومادەني بىرلەستىكتەردىڭ وكىلدەرى قاتىستى.
قازاقستان حالقى اسسامبلەياسىنىڭ 25 جىلدىعى مەن تۇڭعىش پرەزيدەنت كۇنى قارساڭىندا وتكىزىلىپ وتىرعان عىلىمي-ساراپشىلىق كەڭەسىنىڭ كەڭەيتىلگەن وتىرىسى بارىسىندا العاشقىلاردىڭ ءبىرى بولىپ ءسوز العان قازاقستان حالقى اسسامبلەياسى توراعاسىنىڭ ورىنباسارى جانسەيىت تۇيمەباەۆ «اسسامبلەيانىڭ 25 جىلدىعى تاۋەلسىزدىك جىلدارى جۇرگىزىلىپ كەلە جاتقان بەيبىتشىلىك پەن كەلىسىم ساياساتىنىڭ سيمۆولىنا اينالدى», دەدى.
سونىمەن بىرگە ول 11 قاراشادا ەلباسىنىڭ توراعالىعىمەن جانە مەملەكەت باسشىسىنىڭ قاتىسۋىمەن وتكەن اسسامبلەيا كەڭەسى ۇيىم جۇمىسىنا جاڭا سەرپىن بەرگەنىن ايتا كەلە, قازىرگى ۋاقىتتا ەتنوسارالىق قاتىناستار سالاسىندا اتقارىلىپ جاتقان جۇمىستار تۋرالى دا ءسوز ەتتى.
«قازاقستاننىڭ ساياساتى مەن ۇلتارالىق قارىم-قاتىناس مودەلى بارلىق حالىقارالىق ستاندارتقا سايكەس كەلەدى. ەلباسى نۇرسۇلتان نازارباەۆ وسى ساياسي باعداردىڭ ارقاسىندا ەلدىڭ الەۋمەتتىك جانە مادەني ورتاسى وزگەرىپ كەلە جاتقانىن ايتىپ ءوتتى. قوعامدىق سانانى جاڭعىرتۋعا باعىتتالعان «رۋحاني جاڭعىرۋ» باعدارلاماسى قازاقستاندىقتاردىڭ وي جۇيەسىنە, حالىقتىڭ ومىرىنە وڭ وزگەرىس اكەلىپ, مەملەكەتتىك ءتىل جالپىعا ورتاق مويىندالعان, بىرىكتىرۋشى ءتىل رولىنە يە بولدى. اسسامبلەيا ارىس پەن ماقتاارال اۋدانىنداعى وقيعالاردا ۇلكەن الەۋمەتتىك كومەك كورسەتتى. بۇل باعىتتاعى جۇمىس جالعاسىن تابادى», دەدى ج.تۇيمەباەۆ.
سونىمەن قاتار قحا توراعاسىنىڭ ورىنباسارى جانسەيىت تۇيمەباەۆ ۇلتارالىق قارىم-قاتىناس ءبىلىم, مادەنيەت, ءتىل ساياساتى سالاسىنداعى كوپتەگەن جۇمىس جۇرگىزۋگە تىكەلەي بايلانىستى ەكەنىن جەتكىزە وتىرىپ, ەلباسى اسسامبلەيا كەڭەسىندە جاڭا ينكليۋزيۆتى ساياساتقا سۇرانىس بارىن ءمالىم ەتكەنىن ەسكە سالدى: «مەملەكەتتىك ءتىل بىرىكتىرۋشى فاكتورعا اينالۋى ءتيىس. ول ەلىمىزدىڭ بىرلىگىن بەكەمدەي تۇسەدى. بىزگە ءبىلىم سالاسىندا دا, ازاماتتىق ورتادا دا مەملەكەتتىك ءتىلدى ۇيرەتەتىن عىلىمي تۇرعىدا نەگىزدەلگەن ادىستەمەسى كەرەك. ەلباسى بۇل تۇرعىدا تاپسىرما بەردى. قحا عىلىمي-ساراپشىلىق كەڭەسى بۇل جۇمىسقا ءوز ۇلەسىن قوسۋى ءتيىس. كەلەر جىلى تاۋەلسىزدىگىمىزگە 30 جىل تولادى. ءيا, وتىز جىل دا وتە شىقتى. وسى كۇنگە جەتۋ ءۇشىن بارشا قازاقستاندىق بىرلەسە ايانباي ەڭبەك ەتتى. «دامۋدىڭ سىرى – بىرلىكتە, تابىستىڭ سىرى – تىرلىكتە» ەكەنىن كوكەيگە بەرىك تۇيگەن ەل وزادى. وسى جولدا عىلىمي-ساراپشىلىق كەڭەستىڭ قوسار ۇلەسى زور ەكەندىگىنە سەنىمدىمىن. بىرلىگى جاراسقان, تۋى بيىك, تۇعىرى بەرىك قازاق ەلى ماڭگى جاساسىن!», دەپ تۇيىندەدى.
سونداي-اق وتىرىس بارىسىندا قاتىسۋشىلار «قحا قالىپتاسۋىنداعى قازاقستان رەسپۋبليكاسىنىڭ تۇڭعىش پرەزيدەنتى ن.ءا.نازارباەۆتىڭ ءرولى», «قازاقستاندىق بىرەگەيلىكتى قالىپتاستىرۋ», «مەملەكەتتىك جانە ءتىل ساياساتىن دامىتۋداعى قازاقستان حالقى اسسامبلەياسىنىڭ ءرولى» تاقىرىپتارىندا ءوز ويلارىن ورتاعا سالدى.
ءىس-شارا سوڭىندا «قازاقستان حالقى اسسامبلەياسى: بىرلىك پەن كەلىسىمنىڭ 25 جىلى» اتتى كىتابىنىڭ تۇساۋكەسەرى ءوتتى.