كەشە تايلاندتا ۇكىمەتتى قولدايتىن ەرەۋىلشىلەر مەن پرەمەر-ءمينيستردىڭ وتستاۆكاعا كەتۋىن تالاپ ەتىپ وتىرعان وپپوزيتسيونەرلەر اراسىندا ءبىرىنشى رەت قاقتىعىس ورىن الدى. بۇل تۋرالى جەرگىلىكتى قۇقىق قورعاۋ ورگاندارىنىڭ اقپارىنا سىلتەمە جاساعان يتار-تاسس حابارلادى.
وقيعا ورتالىقتاعى پاتحۋمتحاني پروۆينتسياسىندا ورىن العان. 100-گە جۋىق وپپوزيتسيونەرلەر نارازىلىق اكتسياسىن ۇيىمداستىرماق بولىپ, جەرگىلىكتى مەريا عيماراتىنا بەتتەگەن ەدى. الايدا, ولاردىڭ قارسى الدىنان ۇكىمەتتى قولدايتىن 300 ەرۋىلشى شىعىپ, ەكى جاق اراسىندا جانجال باستالىپ كەتتى. قاقتىعىس ناتيجەسىندە ءۇش وپپوزيتسيونەر جاراقات العان. تايلاندتا اۋقىمدى نارازىلىق اكتسيالارى باستالعالى بەرى مۇنداي قاقتىعىس ءبىرىنشى رەت ورىن الىپ وتىر.
تايلاند پرەمەر-ءمينيسترى ينگلاك چيناۆات وپپوزيتسيانى نارازىلىق اكتسيالارىن توقتاتىپ, كەلىسسوزدەر ۇستەلىنە وتىرۋعا شاقىردى.
دەرەكتەر بويىنشا, 27 قاراشا كۇنى تايلاند ۇكىمەتىنىڭ وتستاۆكاعا كەتۋىن تالاپ ەتكەن نارازىلىق اكتسيالارى ەلدىڭ 24 پروۆينتسياسىندا بولىپ وتكەن. جەرگىلىكتى باق وكىلدەرى وڭتۇستىكتەگى سونگكحلا پروۆينتسياسىندا گۋبەرناتور گريسادا بۋنراچ نارازىلىق بىلدىرۋشىلەردىڭ قاتارىنا ءوتىپ كەتكەنىن حابارلادى. ول سونداي-اق اكتسياعا ءوزىنىڭ كۇزەتىن دە قاتىستىرعان كورىنەدى. ەلدىڭ 14 پروۆينتسياسىندا وپپوزيتسيونەرلەر جەرگىلىكتى مەريا عيماراتتارىن باسىپ العان.
ايدار ورىسباەۆ.
دەرەككوز: Itar-tass.com