قازاقستاندا پارلامەنت ءماجىلىسى مەن ءماسليحاتتارى دەپۋتاتتارىنىڭ سايلاۋىنا ەكى ايعا جۋىق ۋاقىت قالدى. جەرگىلىكتى اتقارۋشى ورگاندار سايلاۋشىلاردىڭ ءتىزىمىن پىسىقتاپ, داۋىس بەرۋ كۇنىنە دايىندىقتى باستاپ كەتتى.
سايلاۋشىلار ءماجىلىس پەن ءماسليحات دەپۋتاتتارىن سايلاۋدا داۋىس بەرۋ ءۇشىن ەڭ الدىمەن ءوزىنىڭ سايلاۋ ۋچاسكەسىن انىقتاۋى قاجەت. ادەتتە ءتىزىم ازاماتتاردىڭ تۇرعىلىقتى جەرى بويىنشا جاسالادى. ءوزىڭنىڭ قاي سايلاۋ ۋچاسكەسىنە تىركەلگەنىڭدى ءبىلۋ وڭاي. جاقىندا نۇر-سۇلتان مەن الماتى قالالارىنىڭ اكىمدىگى تۇرعىندارعا سايلاۋ ۋچاسكەلەرىن انىقتاۋدىڭ بىرنەشە جولى بار ەكەنىن حابارلادى.
سايلاۋ ۋچاسكەسى تۋرالى مالىمەتتى بىرنەشە تاسىلمەن الۋعا بولاتىنىن تسيفرلاندىرۋ جونىندەگى جۇمىس توبىنىڭ جەتەكشىسى, «Astana Innovations» اق باسقارما توراعاسىنىڭ ورىنباسارى اسقار تاكسيموۆ ايتىپ بەردى. ەڭ الدىمەن, قالا اكىمدىگىنىڭ astana.gov.kz سايتىندا قاي ۋچاسكەگە تىركەلگەنىڭدى وڭاي بىلۋگە بولادى. باس بەتتەگى ء«وز سايلاۋ ۋچاسكەڭدى تاپ» باننەرىن باسىپ, جسن ەنگىزۋ ارقىلى سايلاۋ ۋچاسكەسىنىڭ ءنومىرىن, ورتالىعى مەن مەكەنجايىن بىلۋگە بولادى ەكەن. ودان بولەك 109 ءنومىرى ارقىلى iKomek بىرىڭعاي بايلانىس ورتالىعىنا حابارلاسىپ بىلۋگە بولادى. iKomek-ءتىڭ الەۋمەتتىك جەلىدەگى پاراقشالارىنا دا حابارلاسۋ مۇمكىندىگى بار. سايلاۋشىلار Smart Astana ءموبيلدى قوسىمشاسى ارقىلى دا كەرەك اقپاراتتى الا الادى. ءوزىڭنىڭ سايلاۋ ۋچاسكەڭدى @smartastana_bot تەلەگرام چات-بوتى ارقىلى دا بىلۋگە بولادى ەكەن.
«جسن, تەگى, اتى, اكەسىنىڭ اتى جانە تۋعان كۇنى نەمەسە سايلاۋشى تىركەلگەن وبەكتىنىڭ (كوشە, ءۇي) مەكەنجايىن كورسەتۋ ارقىلى سايلاۋ ۋچاسكەسى تۋرالى ونلاين رەجىمدە اقپارات الۋعا مۇمكىندىك بار. بۇل قىزمەت ۋچاسكەنىڭ ءنومىرى, مەكەنجايى, بايلانىس تەلەفوندارىن كورسەتىپ بەرەدى. ازىرگە سايلاۋ ۋچاسكەلەرىندەگى تەلەفون نومىرلەرى بەكىتىلگەن جوق, ولار دايىن بولعاننان كەيىن قوسىلادى. سونداي-اق سايلاۋ ۋچاسكەسىنىڭ ورنالاسقان جەرىن كارتادان كورسەتەدى», دەدى ا.تاكسيموۆ.
سونىمەن قاتار سايلاۋ ۋچاسكەلەرىنە جاقىن ورنالاسقان ايالدامالار مەن قىزمەت كورسەتەتىن مارشرۋتتاردىڭ نومىرلەرى تۋرالى اقپارات جاقىندا قولجەتىمدى بولادى ەكەن.
تۋرا وسى سەكىلدى الماتى تۇرعىندارى دا قاي سايلاۋ ۋچاسكەسىنە تىركەلگەنىن وڭاي انىقتاي الادى. سايلاۋشىلار ءۇشىن اشىلعان service.almaty.kz سايتىندا جسن ەنگىزۋ ارقىلى جىلدام ءوزىڭ داۋىس بەرەتىن ۋچاسكەنى تاۋىپ الاسىڭ. بولماسا تەلەگرام الەۋمەتتىك جەلىسىندە قوسىلعان ارنايى @sailau_almaty بوتىن قولدانۋعا بولادى. الماتى قالاسىنىڭ اكىمدىگى سونداي-اق شاھار سايلاۋشىلارىنا ارناپ بايلانىس ورتالىعىن ىسكە قوسقان. بىرىڭعاي 221-10-01 نومىرىنە حابارلاسىپ, سايلاۋ ۋچاسكەسىنە جانە سايلاۋعا, داۋىس بەرۋ كۇنىنە قاتىستى كەز كەلگەن سۇراققا جاۋاپ الۋعا بولادى. بايلانىس ورتالىعى كۇن سايىن ساعات 8.00-دەن 20.00-گە دەيىن جۇمىس ىستەيدى.
ازاماتتىڭ ناقتى ءبىر سايلاۋ ۋچاسكەسىندە سايلاۋشىلار تىزىمىنە ەنۋى ونىڭ سول اۋماقتا تۇرعىلىقتى جەرى بويىنشا تۇراقتى تىركەۋدە تۇرۋىنا بايلانىستى ەكەنى بەلگىلى. ال تۇراقتى تىركەۋسىز داۋىس بەرۋدىڭ ەكى جولى بار.
سايلاۋشى ءبىر اي بۇرىن, ياعني 10 جەلتوقسانعا دەيىن ءوزى داۋىس بەرگىسى كەلەتىن اۋداندىق اكىمدىككە جازباشا ءوتىنىش ءبىلدىرۋى كەرەك. وتىنىشتە سايلاۋ ۋچاسكەسىنىڭ ءنومىرى كورسەتىلۋى كەرەك. وسى قۇجات نەگىزىندە اۋداندىق اكىمدىك سايلاۋشىنى ءوزى قالاعان ۋچاسكەنىڭ تىزىمىنە ەنگىزىپ, تىركەۋدەگى تىزىمنەن شىعارادى. ال داۋىس بەرۋ كۇنى قانداي دا جاعدايمەن باسقا قالادا بولاتىن سايلاۋشىلار ءۇشىن دە وڭاي جول بار. ول ءۇشىن ءوزى تىركەلگەن سايلاۋ ۋچاسكەسىنەن ەسەپتەن شىعۋ تۋرالى تالون الۋى شارت. بۇل قۇجات 26 جەلتوقساننان باستاپ داۋىس بەرۋگە ءبىر كۇن قالعانعا دەيىن, ياعني 9 قاڭتار كەشكى 18.00-گە دەيىن بەرىلەدى. وسى تالونمەن سايلاۋشى ءوزى تىركەلگەن ايماقتان باسقا ەلىمىزدىڭ كەز كەلگەن وڭىرىندە داۋىس بەرۋگە مۇمكىندىك الادى.
وسىلايشا ەل ازاماتتارى تۇرعىلىقتى مەكەنجايى بويىنشا عانا ەمەس, سىرتتا ءجۇرىپ تە داۋىس بەرە الادى. ول ءۇشىن جوعارىدا ايتىلعان تاسىلدەردىڭ بىرەۋىن ورىنداسا بولعانى. ورتالىق سايلاۋ كوميسسياسى پارلامەنت ءماجىلىسىنىڭ جانە ءماسليحات دەپۋتاتتارىنىڭ كەزەكتى سايلاۋى قارساڭىندا جولداعان ۇندەۋىندە حالىقتى سايلاۋ قۇقىعىن پايدالانىپ, بەلسەندى داۋىس بەرۋگە شاقىردى.