اقمولا وبلىسى "قىزىل" ايماقتا

وبلىستىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايناگۇل مۋسينانىڭ مالىمدەۋىنشە, وبلىستا 4700-گە جۋىق ادام ىندەتكە شالدىققان. قازىرگى ۋاقىتتا وبلىس ستاتسيونارلارىندا 209 ناۋقاس وسى دەرتتەن ەمدەلىپ جاتىر.

وكىنىشكە قاراي, 83 ادام وسى ىندەتتىڭ سالدارىنان ومىردەن وتكەن. سوڭعى تاۋلىكتە 75 وقيعا تىركەلسە, ونىڭ 42-ءسى كوكشەتاۋ, 9-ى ستەپنوگورسك قالالارىندا, قالعاندارى اتباسار, بۋراباي, زەرەندى, بۇلاندى, ساندىقتاۋ اۋداندارىندا. 1-ءشى تامىزدان بەرى 506 ادام ۆيرۋستىق پنەۆمونيامەن اۋىرعان. سوڭعى تاۋلىكتە مۇنداي 3 وقيعا انىقتالدى. جالپى, بۇل اتى جامان اۋرۋ ەگىندىكولدەن باسقا 18 اۋداننىڭ بارىنەن شىعىپ وتىر. قاراشا ايى باستالعاننان بەرى كوكشەتاۋدا – 546, ستەپنوگورسكىدە – 116, بۋراباي اۋدانىندا – 80, زەرەندىدە – 36, قالعان ايماقتاردا  20-عا جۋىق جۇقتىرعاندار بار.

مەكتەپ وقۋشىلارى اراسىندا 68 جاعداي انىقتالعانى بەلگىلى بولىپ وتىر. ىندەت انىقتالعان سىنىپ وقۋشىلارى ۇستازدارىمەن بىرگە 14 كۇندىك كارانتينگە جىبەرىلگەن. بالاباقشالاردا 24 بۇلدىرشىننەن ىندەت انىقتالىپ وتىر. ونىڭ 17-ءسى كوكشەتاۋ قالاسىندا.

– ىندەتتىڭ بۇلاي دەندەپ كەتۋىنىڭ باستى سەبەپتەرى – ماسكا تاقپاۋ, الەۋمەتتىك اراقاشىقتىقتى ەسكەرمەۋ, قوعامدىق كولىكتەردە ارا قاتىناستى ساقتاماۋ, وتباسىلىق, كوپشىلىك ءىس-شارالار, تويلار وتكىزۋ. مونيتورينگتىك توپتار جۇمىس ىستەپ, ايىپپۇلدار سالىنىپ جاتسا دا, وعان ءمان بەرمەي جاتقاندار بار. مىسالى, وسى كەزەڭدە كاراتيندىك شارالاردى بۇزۋدىڭ 494 وقيعاسى انىقتالىپ وتىر. بۇل جاعدايلار بويىنشا ءتيىستى شارالار قولدانىلۋدا. حالىق سانيتارلىق-ەپيدەميولوگيالىق قىزمەت تاراپىنان ۇسىنىلاتىن تالاپتارعا تۇسىنىستىكپەن قاراپ, ولاردى ورىنداۋلارى قاجەت. كارانتيندىك شارالاردى ساقتاۋ – وبلىستاعى ەپيدەميالىق جاعدايدىڭ ۋشىعىپ كەتپەۋىنە كومەگىن تيگىزەدى. سوندىقتان, ءتيىستى تالاپتارعا باعىنايىق, – دەيدى باس مەملەكەتتىك سانيتارلىق  دارىگەر ايناگۇل مۋسينا.

ساقتانساق قانا ساۋ قالاتىنىمىزدى سانامىزعا سىڭىرگەنىمىز ابزال.