ەستافەتا دۋشانبەگە جولداندى

ءۇشىنشى مەگاپوليستە «شىمكەنت – تمد ەلدەرىنىڭ مادەني استاناسى 2020» جىلىنىڭ سالتاناتتى جابىلۋ ءراسىمى ءوتتى. بۇل ماقساتتا ۇيىمداستىرىلعان ءىس-شارا اباي ساياباعىنداعى پوەزيا جانە ادەبيەت بۇرىشى كورمەسىنەن باستاۋ الدى. كىتاپ كورمەسىنە وڭىرلىك اقىن-جازۋشىلاردىڭ تۋىندىلارى قويىلدى. مەرەكەلىك شارا «Piano Performance», ياعني ورىس دراما تەات­رى الدىندا ءتۇرلى-ءتۇستى بوياۋلارعا بويال­­عان پيانينودا ورىندالعان مۋزىكامەن جالعاستى. مۇنداي كۇيساندىق قا­لانىڭ 5 جەرىنە قويىلعان. ەرەكشەلىگى كۇيساندىقتا ويناي الاتىن كەز كەلگەن قالا تۇرعىنى ءوزى قالاعان اۋەندى ويناپ, كەلۋشىلەردىڭ ىقىلاسىنا بولەنۋگە مۇم­كىندىك جاسالدى. سالتاناتتى شارانىڭ نەگىزگى بولىگى تسيتادەلدە وتكەنىمەن, قا­لانىڭ كورنەكتى ورىندارىندا پوەزيا جانە ادەبيەت, تەاتر مەن كينو, مۋزىكا, بەينەلەۋ ونەرى جانە قولونەر شەبەرلەرىنىڭ كونتسەرتتەرى مەن كورمەلەرى كورەرمەن نا­زارىنا ۇسىنىلدى. ماسەلەن, اربات الا­ڭىندا جيىلعان قاۋىم بەس كاسىبي تەاتردىڭ شىعارماشىلىق ۇجىم­دارى ۇسىن­عان «قىز جىبەك», ء«بىرجان-سارا», «ايمان-شولپان», «سايرام بازارى» قو­يىلىمدارىنان ۇزىندىلەر مەن تسيرك ار­تىستەرىنىڭ ونەرىن تاماشالادى. ال اباي سايا­باعىندا «اجەلەر» حورى حا­لىق اندەرىن ناقىشىنا كەلتىرىپ ورىندادى. بايدىبەك بي الاڭىندا قولونەر شە­بەرلەرىنىڭ كور­مەسىمەن جالعاسقان بار­لىق مەرەكەلىك ءىس-شارا Ońtústik TV جانە YouTube-تا Bridge TV ارنالارىندا كورسەتىلدى. قالا تۇرعىندارى مەن قوناقتار پرە­زيدەنت قاسىم-جومارت توقاەۆتىڭ «شىم­كەنت 2020 – تمد ەلدەرىنىڭ مادە­ني استاناسى» جىلىنىڭ سالتاناتتى جابى­لۋ راسىمىنە قاتىسۋشىلاردى قۇتتىقتاۋىن تىڭدادى.

– بيىل شىرايلى شىمكەنت شاھارى تاۋەلسىز مەملەكەتتەر دوستاستىعى ەلدە­رىنىڭ مادەني استاناسى رەتىندە بارشاعا تانىلدى. بۇل – قالا تۇرعىندارى جانە بۇكىل قازاقستان حالقى ءۇشىن زور جەتىستىك. وسى يگى باستاما ءتول مادەنيەتىمىز بەن ونە­رىمىزدى تانىتىپ, قازاقتىڭ سالت-ءداس­تۇ­رىن ناسيحاتتاۋعا مول مۇمكىندىك بەردى. سون­داي-اق رۋحاني قۇندىلىقتارى ساباقتاس حا­لىقتار اراسىنداعى ىنتىماقتاستىق­تى ودان ءارى نىعايتۋعا جول اشتى. شىم­كەنت جۇرتشىلىعى مەن ونەرپازدارى وسىن­داي مارتەبەلى مىندەتتى ابىرويمەن ات­­قا­رىپ شىقتى. كارانتين تالاپتارىنا ساي­كەس بەلگىلەنگەن جوسپارداعى ونلاين فور­ماتىنداعى شارالار جوعارى دەڭگەيدە ۇيىم­داستىرىلدى. وزدەرىڭىزگە شىنايى ري­زا­شىلىعىمدى بىلدىرەمىن!

«مادەني استانا» مارتەبەسىن تاجىك­­ستاننىڭ دۋشانبە قالاسىنا تابىس­تاعالى وتىرمىز. ەلدەرىمىز اراسىنداعى مادەنيەت كەرۋەنى تولاستاماسىن! دوستى­عىمىز بەن سىيلاستىعىمىز ارتا بەرسىن! بارشاڭىزعا اماندىق, باق-بەرەكە جانە شىعارماشى­لىق تابىس تىلەيمىن, دەلىنگەن پرەزيدەنت قۇتتىقتاۋىندا.

ءيا, 2021 جىلى تمد ەلدەرىنىڭ مادەني استاناسى مارتەبەسىنە دۋشانبە قالاسى يە بولىپ وتىر. شىمكەنت قالاسىنىڭ اكىمى مۇرات ايتەنوۆ تاجىكستاندىق دەلەگاتسيا وكىلدەرىنە ەستافەتانى تاپسىرا وتىرىپ, «دوستىق سىيى» اتتى توپتاما تارتۋ ەتتى. قا­زاق حالقىنىڭ دارقان دا قوناقجاي بول­­مىسىن بىلدىرەتىن «دوستىق سىيىنا» شىم­­كەنتتىڭ 2200 جىلدىق تاريحى جا­زىل­­عان 2200 كىتاپ, قالانىڭ سيمۆولىنا اينال­عان قىزعالداقتىڭ 2200 ءتۇبى جانە قالا تۇر­عىن­­دارىنىڭ دۋشانبەلىكتەرگە ىستىق لە­بىزى مەن سالەمى جازىلعان 2200 اشىق حات قوسىلعان.

– «شىمكەنت – تمد ەلدەرىنىڭ مادە­ني استاناسى» جىلى بۇكىل الەمدى جايلاعان پاندەميامەن تۇسپا-تۇس كەلدى. سوعان قاراماس­تان, وسى جىل اياسىندا شىمكەنتتىكتەر وز­دەرىنىڭ ەڭبەكقور, مەيىرىمدى, دوستىققا ادال ءارى جاڭاشىلدىققا بەيىم ەكەنىن كورسەتە ءبىلدى. كارانتين دوستىعىمىزعا سى­زات تۇسىرە العان جوق. شىمكەنت – 2200 جىل­دىق تاريحى بار كونە شاھار. قا­لا­مىزدىڭ تاريحى ەجەلگى داۋىرلەردەن باس­تالاتىنىن حالىقارالىق بەدەلدى ۇيىم – يۋنەسكو دا رەسمي مالىمدەدى. تاريحي قا­لامىزدىڭ تمد ەلدەرىنىڭ مادەني استاناسى اتانۋى ءبىز ءۇشىن ۇلكەن ماقتانىش. تۇڭعىش پرەزيدەنتىمىز, ەلباسى نۇرسۇلتان ءابىش ۇلى نازارباەۆتىڭ جارلىعىمەن شۋاقتى شىمكەنتكە رەسپۋبليكالىق ما­ڭىزى بار قالا مارتەبەسىنىڭ بەرىلۋى ابىرويىمىزدى اسىردى. مەملەكەت باسشىسى قاسىم-جومارت كەمەل ۇلى توقاەۆ ەل قۋا­تىن ارتتىرۋداعى شىمكەنت قالاسىنىڭ ايرىقشا ماڭىزىنا كوڭىل بولۋدە. پرە­زيدەنتتىڭ تمد ەلدەرىنىڭ مادەني استاناسى جىلىنىڭ ءساتتى اياقتالۋىمەن ارنايى قۇتتىقتاۋىن وزدەرىڭىز دە ەستىدىڭىزدەر. شىم­كەنت قالاسى تۇرعىندارىنىڭ اتىنان مەملەكەت باسشىسىنا شىن جۇرەكتەن العىس بىلدىرەمىز. ءبىزدىڭ قالامىز بۇگىندە بۇكىل ازيانىڭ ونەرى مەن مادەني مۇراسى توعىسقان ءىرى ورتالىققا اينالىپ وتىر.

ەجەلگى كەزەڭدەردەن شىمكەنت تۇر­عىن­دارىنىڭ بويىندا ەرەكشە قاسيەت قالىپ­تاستى. بۇل – ىسكەرلىك, قوناقجايلىلىق جا­نە وزگەرىسكە دەگەن بەيىمدىلىك. شىمقالا تو­پىراعىنان تۇلەپ ۇشقان ءار ازاماتتىڭ بو­يىندا ەلگە دەگەن سۇيىسپەنشىلىك, داستۇرگە دەگەن بەرىكتىك, دوستىققا دەگەن ادالدىق ور­نىققان. مادەني استانا شەڭبەرىندە قالا­مىزدا 1700-دەن استام جاڭاشىل, ونلاين فورماتتاعى جوبالار جۇزەگە استى. قا­لامىزدىڭ مارتەبەسىن ارتتىرعان وسى ءىس-شارالاردى وتكىزۋگە كومەكشى بولعان بارلىق شىمكەنتتىكتەرگە العىسىمدى بىل­دىرەمىن! كارانتين ءبىزدىڭ عاسىرلارعا جالعاسقان حالىقارالىق بايلانىسىمىز­دى اجىراتا العان جوق. وقشاۋلانۋ كەزىندە دە دوستىعىمىز بەن ىنتىماعىمىزدىڭ جانە بەكەم بىرلىگىمىزدىڭ ناتيجەسىندە سىن­دارلى ساتتەن سۇرىنبەي وتتىك. ءبىز بۇكىل تمد ەلدەرىنە ورتاق رۋحاني قۇندىلىقتار – مادەني-ادەبي, تاريحي مۇرالارىمىز­دى ناسيحاتتاۋ مەن بايلانىسىمىزدى نىعاي­تۋ ءۇشىن توپتاسا بىلدىك.

دوستىق ەستافەتاسىن ۇلى جىبەك جو­لىمەن باۋىرلاس ەل تاجىكستاننىڭ استاناسى دۋشانبەگە جولدايمىز. قازاق حال­قىنىڭ ۇلتتىق ءداستۇرىنىڭ ىزىمەن ەستافەتا كەرۋەنىن 2200 جىلدىق تاريحى بار شىم­كەنتتەن تارتۋ-تارالعىمەن شىعارىپ سالعالى وتىرمىز, دەدى قالا اكىمى.

ۇلكەن سەنىم مەن جاۋاپكەرشىلىك ار­­تىلعان ابىرويلى جىلدى وسىلاي قو­رى­­تىندىلاعان شىمكەنت قالاسىنىڭ اكىمى مۇرات ايتەنوۆ تمد ەلدەرىنىڭ ما­دەني استاناسى ەستافەتاسىن دۋشانبە قا­لا­سى­نىڭ توراعاسى رۋستامي ەموماليگە تا­بىس ەتتى. سونداي-اق ونلاين-جيىن­دا تمد اتقارۋشى كوميتەتىنىڭ تور­اعاسى – اتقارۋشى حاتشى س.لەبەدەۆ, مەم­لە­كەتارالىق گۋمانيتارلىق ىنتىماق­تاس­تىق قورى باسقارما توراعاسى, ازەر­بايجان رەسپۋبليكاسىنىڭ رەسەي فە­دە­راتسياسىنداعى توتەنشە جانە وكى­لەت­تى ەلشىسى پولاد بيۋلبيۋلوگلى قالا تۇر­عىندارى مەن قوناقتارىنا ارنايى مەرە­كەلىك قۇتتىقتاۋ تىلەگىن جەتكىزدى. ما­دەني استانا جىلىنىڭ جابىلۋى اياسىندا 6 ­تەاتر, 5 كىتاپحانا, تسيرك, زووباق, ادەت-عۇ­رىپ جانە سالت ءداستۇر ورتالىعى, مادە­نيەت ءۇيى جانە باسقا دا مادەنيەت مەكەمەلەرى­نىڭ شىعارماشىلىق ۇجىمدارىنىڭ كۇشىمەن 48 سپەكتاكل, 99 ونلاين ءىس-شارا, 7 جىل­جىمالى تەاترلىق, 5 مۋزىكالىق پەر­فو­­مانستار, اقىندار, جازۋشىلار, ادە­بي قاي­راتكەرلەر بەينەسىندەگى بويلى قۋىر­شاقتار شەرۋى, جاس سۋرەتشىلەردىڭ كورمەسى مەن عي­ماراتتاردىڭ قاسبەتتەرىندە 7 مۋ­رال­دىڭ تۇساۋكەسەرى ۇيىمداستىرىلدى.

ايتا كەتەيىك, ۇيىمداستىرىلعان شارالار كارانتين تالابىن ساقتاي وتىرىپ, بارلىق كەلۋشىلەرگە ساقتىق جونىندە ەسكەرتپەلەر ءجيى ەسكەرتىلىپ وتىردى.

شىمكەنت