الماتىدا 15 قىركۇيەك پەن 15 قاراشا ارالىعىندا ەركىن تاڭداۋ بويىنشا ازاماتتاردىڭ جەكە ەمحانالارعا تىركەلۋ ناۋقانى ءوتتى. العاشقى جەدەل مەديتسينالىق كومەك كورسەتەتىن ۇيىمدارعا تىركەلگەن تۇرعىندار مەديتسينالىق جاردەمدى 2021 جىلدىڭ 1 قاڭتارىنان باستاپ الادى. وسى جىلدىڭ اياعىنا دەيىن ولار بۇعان دەيىن تىركەلىپ قويعان ەمحانا قىزمەتىن پايدالانادى.
الماتى قالاسى «الەۋمەتتىك مەديتسينالىق ساقتاندىرۋ قورى» كەاق فيليالىنىڭ ديرەكتورى تىلەۋحان ابىلداەۆ الماتى قالاسى وڭىرلىك كوممۋنيكاتسيالار قىزمەتىنىڭ الاڭىندا بريفينگتە وسى ماسەلەنىڭ جاي-جاپسارى جايلى كەڭىرەك اڭگىمەلەدى.
– 15 قاراشاعا دەيىن ەمحانا اۋىستىرۋ مۇمكىندىگىن 10 مىڭ الماتىلىق پايدالاندى. ال تىركەۋ ناۋقانىنا 77 مەديتسينالىق ۇيىم قاتىستى. مەديتسينالىق ساقتاندىرۋ قورىمەن كەلىسىم اياسىندا جۇمىسىن 2021 جىلدان باستايتىن جاڭا ۇيىمدار دا بار. ەمحانانىڭ ءۇي ماڭىنا جاقىن بولعانى دۇرىس. بۇل قاجەت بولعان جاعدايدا دارىگەردىڭ ۇيگە كەلىپ جەدەل كومەك كورسەتۋىنە ىڭعايلى بولادى. اسىرەسە پاندەميا جاعدايىندا ەمحانانىڭ ۇيگە جاقىن بولۋى وزەكتىلىگىن دالەلدەپ وتىر. سونداي-اق ءبىر وتباسىنىڭ ءبىر ەمحاناعا تىركەلگەنى ءجون. وتباسىلىق دارىگەر وتباسى مۇشەلەرىن تۇگەل بىلگەندىكتەن, ناۋقاسقا مەيلىنشە ءتيىمدى ەم تاعايىندايدى, – دەدى ت.ابىلداەۆ.
ونىڭ ايتۋىنشا, ەگەر ازامات تۇرعىلىقتى جەرىن, جۇمىسىن جانە وقۋىن اۋىستىرسا, سونىمەن قاتار تىركەلگەن ەمحانا قايتا قۇرىلسا نەمەسە جۇمىسىن توقتاتسا تىركەلگەن ەمحاناسىن اۋىستىرا الادى. تۇرعىنداردىڭ ەمحانا اۋىستىرۋىنا ءبىر جىلدا ءبىر رەت قانا مۇمكىندىك بەرىلەدى.
بيىل 9 ايدا مەديتسينالىق ساقتاندىرۋ قورى الماتى قالاسى بويىنشا مەديتسينالىق كومەك ءۇشىن 307 ملرد تەڭگە بولگەن. قاڭتار-قىركۇيەك ارالىعىندا ستاتسيونارلىق مەديتسينالىق كومەك كورسەتۋ ماقساتىندا 19 ملرد تەڭگەدەن استام قارجى جۇمسالعان. سونداي-اق دياگنوستيكالىق-كەڭەس بەرۋ باعىتىندا 6,5 ملرد تەڭگە جۇمسالعان. ازاماتتار ءۇشىن ەڭ وزەكتى قىزمەتتىڭ مرت ەكەنى انىقتالعان. 5,9 ملرد تەڭگەدەن اسا قارجى جوعارى تەحنولوگيالىق قىزمەتتەر ءۇشىن بولىنگەن. قاراجاتتىڭ قالعان بولىگى پروفيلاكتيكالىق شارالار, قالپىنا كەلتىرۋ كومەگى مەن مەديتسينالىق ساۋىقتىرۋعا باعىتتالعان.
– 2017 جىلدىڭ شىلدەسى مەن 2020 جىلدىڭ قاراشاسى ارالىعىندا مىندەتتى الەۋمەتتىك مەديتسينالىق ساقتاندىرۋ قورىنا الماتى قالاسىنان 85 ملرد تەڭگە ءتۇستى. ونىڭ 70 ملرد تەڭگەدەن استامى جۇمىس بەرۋشىلەردىڭ قاراجات بولۋىنەن قۇرالعان. قالعان سوما جەكە كاسىپكەرلەردىڭ جارناسى مەن ازاماتتىق كەلىسىمشارت ارقىلى جۇمىس ىستەيتىن ازاماتتاردان ءتۇستى, – دەيدى سپيكەر.
تىركەلۋ كامپانياسى كەزىندە تۇرعىنداردىڭ تاڭداۋى نەگىزىنەن مەملەكەتتىك مەديتسينالىق ۇيىمدارعا تۇسكەن. سونىمەن قاتار سپيكەر جەكە ەمحانالارعا مەملەكەت تاراپىنان قانداي تالاپتار قويىلاتىنىن دا ايتتى.
– جىل سايىن جەكە كلينيكالار سانى ارتىپ كەلەدى. بۇل جاقسى ءۇردىس باسەكە مەن ساپانى دا ارتتىرادى. تالاپقا كەلسەك, ولاردىڭ مەديتسينالىق قىزمەتتى كورسەتۋگە ليتسەنزياسى بولۋى كەرەك. مىندەتتى الەۋمەتتىك مەديتسينالىق ساقتاندىرۋ قورىنىڭ بازاسىنا تالاپتارعا ساي تىركەلۋى ءتيىس. سول بازاعا تىركەلگەن ەمحانالار عانا تىركەلۋ ناۋقانىنا قاتىسادى, – دەدى ت.ابىلداەۆ.
ەمحاناعا تىركەۋ بىلتىردان بەرى ەلەكتروندى ۇكىمەت پورتالى ارقىلى جۇرگىزىلەدى. سپيكەردىڭ ايتۋىنشا, تىركەۋدىڭ اۆتوماتتى تۇردە جۇزەگە اسۋى ەمحاناعا سىرتتاي تىركەۋ فاكتىلەرىنىڭ الدىن الۋعا كومەكتەسەدى. بۇعان سوڭعى جىلدارى تىركەۋگە قاتىستى شاعىمداردىڭ كۇرت ازايۋى دالەل.
اباي ايماعامبەت,
«Egemen Qazaqstan»
الماتى