ىشكى ىستەر مينيسترلىگى «دارمەك» جەدەل الدىن الۋ ءىس-شاراسىنىڭ كەزەكتى كەزەڭىن وتكىزدى. بۇل وپەراتسيانى وتكىزۋدەگى ماقسات – ەسىرتكى قۇرالدارىمەن, پسيحوتروپتىق نەمەسە ۋلى زاتتارمەن جۇمىس ىستەۋ ەرەجەلەرىن, فارماتسەۆتيكالىق قىزمەت ەرەجەلەرىن جانە ەسىرتكى اينالىمى سالاسىنداعى ءۇي-جايلارعا قويىلاتىن تالاپتاردى, بۇزۋشىلىقتاردى انىقتاۋ.
ءىس-شارا بارىسىندا پوليتسيا قىزمەتكەرلەرى جۇمىس بارىسىندا ەسىرتكى, پسيحوتروپتىق زاتتار مەن پرەكۋرسورلاردى پايدالاناتىن كاسىپورىندار مەن ۇيىمداردى تەكسەردى. ەسىرتكى قىلمىسىنا قارسى ءىس-قيمىل دەپارتامەنتىنىڭ اقپاراتى بويىنشا, 5 كۇن ىشىندە ەلىمىزدە ەسىرتكى, پسيحوتروپتىق نەمەسە ۋلى زاتتارمەن جۇمىس ىستەۋ ەرەجەلەرىن بۇزۋمەن بايلانىستى 18 قىلمىستىق قۇقىق بۇزۋشىلىق تىركەلگەن. باقىلاۋداعى زاتتار اينالىمى سالاسىندا 78 اكىمشىلىك قۇقىق بۇزۋشىلىق انىقتالدى, وسىنداي بۇزۋشىلىقتاردىڭ 44-ءى ءدارىحانالاردا ءدارى-دارمەكتەردى رەتسەپتىسىز جىبەرۋمەن بايلانىستى. قۇرامىندا ەسىرتكى جانە پسيحوتروپتىق زاتتار بار مەديتسينالىق پرەپاراتتاردىڭ 6 مىڭعا جۋىق تابلەتكالارى مەن امپۋلالارى تاركىلەندى. مىسالى, اقتوبە وبلىسىنداعى ءبىر مەديتسينالىق مەكەمەنى تەكسەرۋ بارىسىندا بۇزۋشىلىقتارمەن ساقتالعان 90 امپۋلا مورفين مەن 2500 امپۋلا فەنتانيل تاركىلەندى. كىنالى لاۋازىمدى تۇلعالارعا قاتىستى قىلمىستىق ءىس قوزعالدى.
بۇدان باسقا وپەراتسيا كەزەڭىندە ەسىرتكىنىڭ زاڭسىز اينالىمى سالاسىندا 51 قىلمىس, ونىڭ ىشىندە 27 وتكىزۋ فاكتىسى, 23 ەسىرتكىنى اسا ءىرى مولشەردە ساقتاۋ جانە 1 كونتراباندا فاكتىسى انىقتالدى. ماسەلەن, ەلوردالىق ەسىرتكىمەن كۇرەس پوليتسەيلەرى بۇرىن سوتتى بولعان, 39 جاستاعى جەرگىلىكتى تۇرعىندى ۇستادى, ودان 20 كگ-عا جۋىق گاشيش تاركىلەندى, «قارا نارىقتا» ونىڭ باعاسى 30 ملن تەڭگەنى قۇرايتىن ەدى. تاعى ءبىر ءىرى ۇستاۋ فاكتىسى قوستاناي وبلىسىندا تىركەلدى. جىتىقارا قالاسىنىڭ تۇرعىنى ءوز ءۇيىنىڭ ەدەنىنىڭ استىندا 500 گر شاماسىندا گەروين ساقتاعان. ءتىنتۋ بارىسىندا پوليتسەيلەر ەسىرتكىدەن باسقا, تارازى مەن ۇلكەن اقشا سوماسىن تاركىلەدى. انىقتالعان قىلمىستاردىڭ بارلىق فاكتىلەرى بويىنشا قىلمىستىق ىستەر قوزعالدى.