دەنساۋلىعىڭىز جاراپ تۇرسا, وزگەگە ءومىر سىيلاعانعا نە جەتسىن. قان تاپسىرۋ قايىرىمى مول قادام ءارى بۇل ءىستىڭ ادام اعزاسىنا تيگىزەر پايداسى مول. وسىنى ەسكەرگەن الماتىلىق جاسوتاندىقتار جاقسى باستامانى قولعا الدى. بەلسەندى جاستار «مەن جاۋاپتى دونورمىن» اكتسياسى اياسىندا 10 ليتر قان تاپسىردى.
ساۋاپتى ىسكە ءۇن قوسقان وتىز دونوردىڭ اراسىندا ەرىكتىلەر دە بار. الماتى قالالىق قان ورتالىعىنىڭ ۇجىمى شاراپاتتى شاراعا بەلسەنە قاتىسقان دونورلارعا ءدان ريزا. ويتكەنى بۇگىنگى تاڭدا ءوز ەركىمەن قان تاپسىراتىنداردىڭ قاتارى سيرەگەن. ال اۋرۋحانالاردا سيرەك قان توبىنداعى قانشاما ناۋقاس جاردەمشىسىن كۇتىپ زارىعىپ جاتىر.
– بۇل مەنىڭ العاش رەت قان تاپسىرۋىم ەمەس. جارتى جىلدا ءبىر رەت قان ورتالىعىنا كەلۋ ءومىر سالتىما اينالعان. دونورلىقتىڭ پايداسى تۋرالى كوپ وقىدىم. ارينە دەنى ساۋ ادامعا بۇل تەك پايدا اكەلەدى. قان تاپسىرعاندا ادامنىڭ قان اينالۋ جانە يممۋندىق جۇيەسى جاسقارىپ, جۇرەك-قان تامىرلارى, قاتەرلى ىسىك اۋرۋلارىنا شالدىقپايدى. ەڭ باستىسى, دونور ءوز دەنساۋلىعىن تەكسەرتىپ, وزگە جاننىڭ ءومىرىن ساقتاپ قالادى. مۇنداي اكتسيالار الداعى ۋاقىتتا دا وتكىزىلەتىنىنە سەنەمىن. ءبىز بارلىعىمىز بىرىگىپ, قانعا مۇقتاج جاندارعا كومەك كورسەتە الامىز. بارشا الماتىلىقتاردى قان تاپسىرىپ, جاقسىلىقتا جارىسۋعا شاقىرامىن, – دەيدى قالا تۇرعىنى اقبوتا بۇركىتباەۆا.
اكتسيا قان دونورلىعىنا جاستاردىڭ نازارىن اۋدارۋعا جانە دەنى ساۋ ازاماتتاردى يگى ىسكە قۇلاعدار ەتۋگە باعىتتالعان. ورتالىق ماماندارىنىڭ ايتۋىنشا, الماتى قالاسىندا قان تاپسىرۋعا كەلەتىندەردىڭ دەنى جاستار.
الماتى