2020 جىلعى 21 قاراشادا ساعات 12.25-تە نۇر-سۇلتان قالاسى توتەنشە جاعدايلار دەپارتامەنتى كەزەكشى-ديسپەتچەرلىك قىزمەتىنىڭ پۋلتىنە شۇبار شاعىن اۋدانىنداعى «Halal brothers» ءدامحانادا گاز باللون جارىلعانى, سالدارىنان ءورت شىققانى تۋرالى حابارلاما تۇسكەن بولاتىن.
ءورت سوندىرۋشىلەر وقيعا ورنىنا ساعات 12.32-دە كەلگەن بويدا جارىلىس سالدارىنان ەكى قاباتتى كوتتەدجگە جاپسارلاس سالىنعان قۇرىلىس پەن قازاندىقتىڭ ءىشىنارا قابىرعالارى جانە شاتىرى قۇلاعانى انىقتالدى. سونىمەن قاتار 20 شارشى مەتر كولەمدە جاپسارلاس سالىنعان قۇرىلىس پەن قازاندىقتىڭ شاتىرى جانعان. قيراۋ 100 شارشى مەتر كولەمىندە ورىن العان (قۇرىلىستىڭ جالپى كولەمى 600 شارشى مەتر). جارىلىس سالدارىنان اس ءۇيدىڭ شاتىرى قۇلاعان.
ەلوردالىق قۇتقارۋشىلار وقيعا ورنىنان 35 گاز باللوندى شىعاردى. ءۇيىندىنىڭ اراسىنان 1998 جىلعى قىزدى قۇتقاردى, ول جابىق مي زاقىمىن العان. وكىنىشكە قاراي, وقيعا ورنىندا ءدامحانادا ىدىس جۋشى بولىپ قىزمەت اتقاراتىن 1968 جىلى تۋعان ايەل قازا تاپتى.
جەدەل مەديتسينالىق كومەك بريگاداسى 34 ادامدى ەمحاناعا جەتكىزدى. ونىڭ ىشىندە 11-ءى دارىگەر قاراعاننان كەيىن ۇيلەرىنە جىبەرىلدى, 23-ءى اۋرۋحاناعا جاتقىزىلدى. زارداپ شەككەن ادامداردىڭ بارلىعى ءدامحانا جۇمىسشىلارى. سونداي-اق جارىلىس سالدارىنان 3 اۆتوكولىككە زيان كەلدى.
كولەمى 20 شارشى مەتر ءورت ساعات 12.58-دە ءسوندىرىلدى. اپاتتىق-قۇتقارۋ جۇمىستارى ساعات 16.59-دا اياقتالدى. ءورتتىڭ شىعۋ سەبەپتەرى انىقتالۋدا.
وقيعا ورنىندا نۇر-سۇلتان قالاسى تجد, اپاتتار مەديتسيناسى ورتالىعىنىڭ 56 قىزمەتكەرى مەن 14 بىرلىك تەحنيكاسى جۇمىس جاسادى.
قالا اكىمدىگى جانە توتەنشە جاعدايلار دەپارتامەنتى ادامدار توڭىپ قالماۋى ءۇشىن كۋنگ-كولىگى مەن اۆتوبۋس جىبەردى.
وقيعا ورنىندا حالىققا پسيحولوگيالىق كومەك بەرۋ جانە اقپاراتتىق قولداۋ ءۇشىن قاۋىرت جەلى تەلەفونى جۇمىس ىستەدى. 8-7172-24-51-71 ي 8-7172-24-51-47. وعان 11 قوڭىراۋ ءتۇستى.
جالپى توتەنشە جاعدايدى جويۋعا نۇر-سۇلتان قالاسى تجد, اپاتتار مەديتسيناسى ورتالىعىنان, پوليتسيا دەپارتامەنتىنەن, جەدەل مەديتسينالىق كومەك بريگاداسىنان جانە جەرگىلىكتى اتقارۋشى ورگانداردان 172 قىزمەتكەر مەن 56 بىرلىك تەحنيكا جۇمىلدىرىلدى.