تۇركىستان وبلىسى اۋماعىندا وتباسىلىق, مەرەكەلىك ءىس-شارالار توقتاماي تۇر. بۇگىنگى كۇنگە دەيىن 535 تىيىم سالىنعان شارا وتسە, ونىڭ 226-ى قوعامدىق تاماقتانۋ ورىندارىندا, قالعانى تۇرعىنداردىڭ ءوز اۋلاسىندا وتكىزىلگەن, - دەپ حابارلايدى Egemen.kz
وڭىردەگى ەپيدەميولوگيالىق احۋال باياندالعان كەزەكتى اپتالىق اپپارات وتىرىسىندا سوڭعى كورسەتكىشتەر ورتاعا سالىندى. كورسەتكىشتەر كوڭىل كونشىتپەيدى, وسىعان وراي بارلىق اۋدان, قالا اكىمدەرى قاتاڭ سىنعا ۇشىرادى. ەلدەگى ەپيدەميولوگيالىق احۋالدى بىلە تۇرا, سانيتارلىق تالاپتاردىڭ ساقتالۋىن باقىلاۋ ماقساتىندا تىنىمسىز جۇرگىزىلىپ كەلە جاتقان تەكسەرۋلەردى ەلەمەگەندەرگە جازا, جاۋاپتى باسشىلارعا شارا قولدانىلماق.
«توي-تومالاق بارلىق اۋدانداردا بار. ەپيدەميالىق جاعدايدىڭ قانشالىقتى كۇردەلى ەكەنىن بىلە تۇرا, توي جاسايتىنداردى توقتاتۋ كەرەك. تويعا جان-جاقتان تامىر-تانىس جينالادى. بۇعان توسقاۋىل قويىلماسا, قالعان تىرلىكتىڭ ءبارى بەكەر. تەز ارادا ءتيىستى شارا قولدانىلسىن», دەدى وبلىس اكىمى ومىرزاق شوكەەۆ.
سوڭعى 5 ايدا وبلىس بويىنشا جاساقتالعان 119 ءموبيلدى توپ قۇرامى جانە اۋماقتىق پوليتسيا باسقارمالارى قىزمەتكەرلەرى تاراپىنان 36765 نىسان تەكسەرىلىپ, 5 194 كارانتين رەجيمى تالاپتارىنىڭ بۇزۋشىلىقتارى انىقتالعان.