جالپاق الەمدى جامان تۇماۋ جايلاعالى «سۋعا كەتكەن تال قارمايدى» دەگەندەي, ىندەتتەن اراشالاپ قالاتىن داۋا ىزدەپ جانتالاسقان جۇرتتىڭ ەشكى سۇتىنە دە ىقىلاسى اۋىپ وتىرعانى بار.
انشەيىندە نازار اۋدارا بەرمەيتىن ەشكى سۇتىنە دەگەن سۇرانىس كۇننەن-كۇنگە كوبەيىپ كەلەدى. ءارتۇرلى اۋرۋ-سىرقاۋعا ەم ەكەنى دە ەجەلدەن بەلگىلى. ونىڭ ۇستىنە ەشكى – ءوسىمتال ت ۇلىك. ىلكىدەگى جۇرتتىڭ «ەسىڭ كەتسە, ەشكى جي» دەگەن ءسوزى دە بەكەر ەمەس-اۋ. وبلىس ورتالىعىندا تۇراتىن جەكە كاسىپكەر يۋري روتەرمەل تابىستىڭ وسى كوزىن جانداندىرۋعا بەل بۋىپ وتىر. ءسۇتى عانا ەمەس, ەتىنە دە تۇتىنۋشىلار تاراپىنان ءتاپ-ءتاۋىر سۇرانىس بار.
كاسىپكەردىڭ ەسىل-دەرتى ەشكىگە اۋعانى دا بەكەر ەمەس ەكەن. بىرەر جىل بۇرىن اۋىر دەرتكە شالدىعىپ, ۇزاق ۋاقىت سارىتاپ بولىپ توسەك تارتىپ جاتىپ قالىپتى. ءتىپتى شەتەلدىڭ اتاقتى ەمحانالارىندا دا ەمدەلگەن. ءتۇپتىڭ تۇبىندە دەرتىنە داۋانى ءوزىنىڭ ايتۋىنا قاراعاندا, ەشكىنىڭ سۇتىنەن تاپقان.
– قىتايدا ەمدەلگەنىمدە سول جاقتىڭ بىلگىر ماماندارى ەشكىنىڭ ءسۇتىن ءىشىپ كور دەپ اقىل ايتتى. ەلگە ورالعان سوڭ ەشكى ءسۇتىن ءىشىپ, اۋرۋىمنان ايىقتىم. بۇرىن ءىشىپ كورمەپ ەدىم, ءدامى دە ءتىل ۇيىرەتىن ءتاپ-ءتاتتى ەكەن. كەيىن وزىمە عانا ەمەس, ەل ىشىندەگى اۋرۋ-سىرقاۋ ادامدارعا شاراپاتى ءتيسىن دەپ ەشكى وسىرۋگە بەل بۋدىم, – دەيدى يۋ.روتەرمەل.
ت ۇلىكتىڭ باسىم بولىگىن ىرگەدەگى تۇمەننەن تاسىپتى. قازىر باعىمىندا التاي, الپەي, زاينا تۇقىمدارى بار. ونىڭ ۇستىنە موڭعوليادان دا بىرەر ەشكىنى ارنايى تاپسىرىسپەن الدىرىپتى. قازىر قوجالىقتاعى مال باسى جۇزدەن اسقان. ەل قۇلاقتانىپ, دۇمەپ كەلىپ جاتقان سوڭ, ءىسىنىڭ العا باساتىنىنا سەنگەن كاسىپكەر الداعى ۋاقىتتا شارۋاشىلىعىن كەڭەيتپەك. الدىمەن گەرمانيادان ەشكى ساۋعا قاجەتتى قۇرال-جابدىقتاردى ساتىپ الماقشى. كەلىسىم دە جاسالىپ قويىپتى. جالعىز ءسۇت قانا ەمەس, بالالارعا ارناپ يوگۋرت تا جاساماق.
بيىل كاسىپكەر ساۋىن اپپاراتىن ساتىپ العان. تيىمدىلىگى كوزگە كورىنىپ تۇر. ءبىر مەزەتتە 12 ەشكىنى قاتار ساۋا الادى ەكەن. ءوزىنىڭ باعامداۋىنا قاراعاندا, تىم قىمبات تا ەمەس, 1 200 000 تەڭگە. ءىسى وڭىنان وڭعارىلسا, شىعىنى از ۋاقىتتىڭ ىشىندە قايتىپ ورالماق. قازىر ەشكى ءسۇتىن ورتالىق بازارلاردا ساتىپ ءجۇر. تاڭسىق تاعامعا العاشىندا توسىرقاي قاراعان حالىق بۇل كۇندە كاسىپكەر ەشكى ءسۇتىن قاشان اكەلەدى ەكەن دەپ ەلەڭدەپ ءجۇر.
اۋەلى وزىنە, سوسىن حالىققا شاراپاتى ءتيىپ تۇرعان شارۋانىڭ تەرىستىگى جوق-اۋ. اۋىلداعى اعايىن دا كاسىپتىڭ وسى ءبىر تۇرىنەن قۇلاقتانىپ, قولعا الىپ قارەكەت ەتسە, كانەكي!
كوكشەتاۋ