اقتوتى رايىمقۇلوۆا "قىز جىبەك" جəنە "اتاماننىڭ اقىرى" كوركەم ءفيلمىنىڭ تۇسىرىلگەنىنە 50 جىل تولۋىمەن قۇتتىقتادى, دەپ حابارلايدى Egemen.kz.
قازاقستان رەسپۋبليكاسىنىڭ مəدەنيەت جəنە سپورت ءمينيسترى اقتوتى رايىمقۇلوۆا قازاقستاندىقتاردى "قىز جىبەك" جəنە "اتاماننىڭ اقىرى" كوركەم ءفيلمىنىڭ تۇسىرىلگەنىنە 50 جىل تولۋىمەن قۇتتىقتادى.
"قۇرمەتتى دوستار!ارداقتى كينوسۇيەر قاۋىم!
سىزدەردى "قىز جىبەك" جəنە "اتاماننىڭ اقىرى" كوركەم ءفيلمىنىڭ تۇسىرىلگەنىنە 50 جىل تولۋىمەن شىن جۇرەكتەن قۇتتىقتايمىن!
قوس تۋىندى دا - ۇلتتىق كينو ونەرىنىڭ ءىنجۋ-مارجانى, جاس تالعامايتىن ومىرشەڭ دۇنيە.
ءبىرى شىنايى سەزىمنىڭ نىشانى "قىز جىبەك" جىرىنىڭ جەلىسىندە جىبەك پەن تولەگەننىڭ ماحاباتىن عانا بايانداپ قانا قويماي, باستى كەيىپكەرلەر تاعدىرىمەن زامانا تىنىس-تىرلىگىنىڭ الەۋمەتتىك ءارىن, تاريحي تۇرپاتىن, مۇڭ-مۇقتاجىن ساباقتاستىرىپ, ەل-جۇرتتى بىرلىككە شاقىرىپ, حالقىمىزدىڭ ادەت-عۇرپى مەن سالت-ءداستۇرىن كورسەتكەن جارقىن فيلم.
ەكىنشىسى, وتكەن عاسىردا قازاق جەرىندە بولعان شىنايى وقيعا جەلىسىمەن ءتۇسىرىلىپ, شىتىرمان ستسەناري جەلىسىمەن كورەرمەندى تاڭداي قاقتىراتىن قازاق كينەماتوگرافياسىنداعى العاشقى دەتەكتيۆ.
مەرۋەرت اپامىز فيلمدە جىبەك ارۋدىڭ بار بولمىسىن, عاشىق بولعان كەزدەگى سىرلى سەزىمىن, سەڭ سوققانداي سەرگەلدەڭگە تۇسكەن ءسəتى مەن وزەكتى ورتەگەن شەرىمەن قوسا وجەتتىگىن جۇرەگىنە ۇيالاتىپ, شىنايى سومدادى. ال تۇعىرلى تۇلعا, مەتر ءاسانəلى اعامىز وقيعا ورىسىندە تىڭشى قاسىمحان شادياروۆتىڭ سىن ساعاتتاعى سابىرلى زەرەك, قىراعى بەينەسىن اشىپ كورسەتتى.
"قىز-جىبەك" پەن "اتاماننىڭ اقىرى" شىعارماشىلىق ۇجىمنىڭ قازاق تاريحىنداعى شەجىرە دەرەكتەردى, عىلىمي ەڭبەكتەردى, ەتنوگرافيا, الەۋمەتتىك قارىم قاتىناسقا بايلانىستى جازبالاردى تەرەڭ زەرتتەگەن بىلىمدارلىعىن تانىتادى. ەكى ءفيلمنىڭ قۇندىلىعى دا, التىن قوردان ويىپ تۇرىپ ورىن العانى دا وسىندا جاتسا كەرەك.
وسىناۋ ورايلى ءسəتتى پايدالانا وتىرىپ, ەكى ءفيلمنىڭ بارلىق اكتەرى مەن ۇجىمىنا زور ريزاشىلىعىمدى بىلدىرەمىن", دەپ جازىلعان ءمينيستردىڭ قۇتتىقتاۋ حاتىندا.