سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اقتوبەگە كەلدى

«اشىق اكىمدىك» كەڭسەسىندە ۆەدومستۆو باسشىسى  جەكە سۇراقتارىمەن كەلگەن تۇرعىنداردى قابىلدادى. سەرۆيستىك اكىمدىككە  كوشەلەردى جارىقتاندىرۋ جانە  اباتتاندىرۋ,  بايلانىس قىزمەتىن جاقسارتۋ, مۇگەدەك بالانىڭ ەمىنە كومەك سۇراۋ, جۇمىسقا ورنالاستىرۋ  بويىنشا سۇراقتار كوپ تۇسكەن.

«بارلىق وتىنىشتەر جەرگىلىكتى اتقارۋشى ورگانداردىڭ جەكە باقىلاۋىنا الىنىپ, جاۋاپتى تۇلعالار بەكىتىلدى. اۋماقتىق دەپارتامەنتكە ءاربىر ءوتىنىشتى زەردەلەپ, ونى ەگجەي-تەگجەيلى قاراپ شىعۋ تۋرالى تاپسىرما بەرىلدى», - دەدى اليك شپەكباەۆ تۇرعىندارمەن كەزدەسۋ  بارىسىندا. كەزدەسۋگە كەلگەن تۇرعىندار ء «بىر تەرەزە» قاعيداتى بويىنشا ازاماتتارعا جەدەل جانە كەدەرگىسىز قىزمەت كورسەتۋگە باعىتتالعان  حرومتاۋ سەرۆيستىك اكىمدىگىنىڭ جۇمىسىن وڭ باعالادى.

“ەلىمىزدىڭ ستراتەگيالىق دامۋىنداعى نەگىزگى باسىمدىقتاردىڭ ءبىرى- سىبايلاس جەمقورلىققا قارسى كۇرەس. مەملەكەت باسشىسىنىڭ قازاقستان حالقىنا جولداۋىندا ايتىلعان “حالىق ۇنىنە قۇلاق اساتىن مەملەكەت” تۇجىرىمداماسىن جۇزەگە اسىرۋدىڭ ءبىر امالى سىبايلاس جەمقورلىقتىڭ ىقتيمالدىعىنا جول بەرمەۋ. وبلىس كولەمىندە تۇراقتى تۇردە ءىس-شارالار ىسكە اسىرىلۋدا”,- دەدى وڭداسىن ورازالين.

سەرۆيستىك اكىمدىك جانىنداعى ازاماتتاردى جەكە قابىلداۋعا ارنالعان  «Open Space»  بولمەسىندە «ادال كومەك» جوباسىنىڭ جەتەكشىسى ايمان وماروۆا حرومتاۋ اۋدانىنىڭ تۇرعىندارىنا زاڭ كەڭەسىن وتكىزدى.

حرومتاۋ اۋدانىنىڭ «اشىق اكىمدىگىنە» وسى جىل ىشىندە  600-دەن استام ءوتىنىم حات, 500-دەن استام ءوتىنىش, ساۋالدار  كەلىپ ءتۇستى.  جىل باسىنان بەرى 8000-نان استام قىزمەت كورسەتىلگەن. سونداي-اق ەلەكتروندى  وزىنە-ءوزى قىزمەت كورسەتۋ بۇرىشتارى دا قاراستىرىلعان.

«مەملەكەت باسشىسى ق. توقاەۆتىڭ باستاماسىمەن قولعا الىنعان «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ اياسىندا اگەنتتىك ازاماتتىق قوعاممەن ءوزارا ءىس-قيمىلدى كۇشەيتۋدە.

مەملەكەتتىك ورگانداردىڭ اشىقتىعى مەن ايقىندىعىن ارتتىرۋدىڭ ءتيىمدى قۇرالى – حالىق الدىندا قولجەتىمدىلىك پەن ەسەپ بەرۋدى قامتاماسىز ەتۋ. سوندىقتان مەملەكەتتىك اپپارات حالىقپەن مۇمكىندىگىنشە ءجيى كەزدەسىپ, ونىڭ مۇڭ-مۇقتاجىن تىڭداپ, ازاماتتاردىڭ ماسەلەلەرىن جەدەل شەشۋى كەرەك», - دەدى اگەنتتىك توراعاسى.

قازىرگى كەزدە   اقتوبە وبلىسىنىڭ بارلىق اۋداندىق جانە قالالىق اكىمدىكتەرىندە «Open Space» ۇلگىسىندە 15 سەرۆيستىك اكىمدىك جانە 65 كابينەت جۇمىس ىستەيدى.

حرومتاۋ اۋدانىنىڭ بىرقاتار مەكەمەلەرىن ارالاعان اليك شپەكباەۆ اۋدان جۇرتشىلىعى وكىلدەرىمەن كەزدەسۋىندە باسشىلاردىڭ  قول استىنداعىلاردىڭ سىبايلاس جەمقورلىعى ءۇشىن  دەربەس جاۋاپكەرشىلىك الاتىنى,  سىبايلاس جەمقورلىققا قارسى ساراپتاما جۇرگىزۋدىڭ جاڭا تەتىكتەرى تۋرالى ايتىپ بەردى.

سونداي-اق, «Protecting business and investments» بيزنەس پەن ينۆەستيتسيالاردى سىبايلاس جەمقورلىققا قارسى سۇيەمەلدەۋ بويىنشا جوبانىڭ ىسكە اسىرىلۋ بارىسىمەن تانىسۋ ماقساتىندا سىبايلاس جەمقورلىققا قارسى قىزمەت باسشىسى «Arm Wind» جشس جەل ەلەكتر ستانتسياسىنا, «ەكوفەرما» جشس قۇلپىناي وسىرەتىن جىلىجايعا, «اقتوبە» الەۋمەتتىك-كاسىپكەرلىك كورپوراتسياسى» اق-عا جانە وبلىستىڭ باسقا دا بىرقاتار كاسىپورىندارىنا بارۋدى جوسپارلاپ وتىر.