زاڭ قىزمەتكەرلەرى اراسىندا زاڭدى بەلشەسىنەن باسۋ فاكتىلەرى بۇل كۇندە جاعا ۇستاتار جاڭالىق ەمەس. قىزمەت بابىن اسىرا پايدالانعانىمەن قويماي بىرنەشە مارتە الاياقتىق جاساپ, پارا بەرۋگە ماجبۇرلەدى دەپ كۇدىككە ىلىنگەن الماتىلىق پوليتسيا قىزمەتكەرىنە قاتىستى سوت ۇكىمى شىقتى.
بەس جىلعا تەمىر تورعا توعىتىلعان ءتارتىپ ساقشىسى, «پوليتسيا مايورى» شەنىنەن دە قاعىلدى. اتالعان قىلمىستىق ءىس الماتى قالاسى, مەدەۋ اۋدانىنا قاراستى №2 سوتىندا قارالعان بولاتىن. قۇزىرلى ورىننىڭ ءباسپاسوز قىزمەتى حابارلاعانداي «كۇدىكتى قر قك-ءنىڭ 190-بابى 3-بولىگىنىڭ 1-تارماعىمەن, 28-بابىنىڭ 4-بولىگىمەن, 367-بابىنىڭ 2-بولىگىمەن ايىپتى دەپ تانىلىپ, 5 جىلعا باس بوستاندىعىنان ايىرىلدى».
ءىس ماتەريالدارىنا سايكەس, 2011 جىلى پوليتسيا قىزمەتكەرى پوليتسيانىڭ اۋىلدىق ءبولىمىن باسقارا وتىرىپ, الماتى وبلىسىندا جەر الىپ بەرۋگە كومەكتەسكەنى ءۇشىن 8 مىڭ اقش دوللارىن العان. 2014 جىلى ول باسقارما باسشىسىنىڭ ورىنباسارى بولىپ تۇرعان تۇستا بورىشكەردى ىزدەۋ جەلەۋىمەن تاعى ءبىر ادامنان «Merسedes Benz E-280» ماركالى كولىگىن جانە 5 مىڭ اقش دوللارىن الىپتى. سونىمەن قاتار 2020 جىلى پوليتسيانىڭ ۋاكىلەتتى تۇلعاسى بولا تۇرا, قىلمىستىق ءىس جاساعان ادامعا بۇلتارتپاۋ شاراسىن ايقىنداۋ كەزىندە جانە جازانى جۇمسارتۋعا كومەكتەسكەنى ءۇشىن 7 مىڭ اقش دوللارى مەن 150 مىڭ تەڭگە پارا بەرۋگە ماجبۇرلەگەن.
مۇنداي جاعدايلار قوعامنىڭ پوليتسياعا دەگەن سەنىمىن سەيىلتە بەرەتىنى ءسوزسىز. ىشكى ىستەر مينيسترلىگى جۇرگىزىپ جاتقان رەفورمالار اياسىندا تاجىريبەلى ءارى ادال كاسىبي مامانداردى ساقتاپ قالۋدىڭ كەشەندى شارالارىن قاراستىرۋ كەرەك-اق. سونىمەن بىرگە جاس كاسىبي مامانداردى ىرىكتەۋ بارىسىندا ولاردىڭ سىبايلاس جەمقورلىققا قارسى يممۋنيتەتىن تەكسەرۋ ماسەلەسى دە باسا نازار اۋدارۋدى قاجەت ەتەتىندەي.
الماتى