جاراتقان يە پەشەنەسىنە جازعان تالايلى تاعدىر دا. كوپتەن بەرى قول ارباعا تاڭىلىپ, قارعا ادىم جەر مۇڭ بولىپ وتىرسا دا ەرىك مىرزاليەۆتىڭ جىگەرى قۇم بولعان ەمەس. قايتا وكپەلەتكەن ءومىردىڭ سىنىمەن كۇرەسىپ, ازامات ەكەنىن دالەلدەۋمەن كەلەدى. ءداتى مىقتى وسىنداي ادامداردىڭ بويىنداعى قاجىر-قايرات, پايىم مەن پاراسات كىمدى بولسىن تاڭعالدىرار ەدى.
شوق جۇلدىزداي شالقار اۋىلى – كىر جۋىپ, كىندىك كەسكەن تۋعان توپىراعى. ەلدىك پەن ەرلىكتىڭ, اسىل ادامگەرشىلىكتىڭ اق بەسىگى ىسپەتتى. باياعىدا, بالا كەزىندە ەرىك مىرزاليەۆ اۋىلدىڭ ابىز اقساقالدارىنان كوپ جايدى, تىرشىلىكتىڭ تالاي-تالاي سىرىن ۇققان. ءومىردىڭ كۇرەس ەكەنىن دە, باسقا تۇسكەن بەينەتكە مويىپ, بوركەمىك بولۋدىڭ قاجەتى جوعىن دا. قاپتال شاپاندى كيىپ الىپ, قارا توبەنىڭ باسىندا كەڭەس قۇراتىن اقساقالدار ەستە جوق ەسكى كەزەڭنىڭ جىلعا تارتاتىن ادەمى اڭگىمەلەردى بىرىنەن سوڭ ءبىرىن ساباقتار ەدى. ەستى ەستەلىكتىڭ ادام جانىن باۋرايتىن تولقىن-تولقىن لەبى زەردەلى قۇلاقتان كىرىپ, تۇلا بويىن شىمىرلاتاتىن ىستىق سەزىم بولىپ كوكىرەگىنە قۇيىلىپ جاتاتىن. بەۋ, ءومىر, پەندە شىركىنگە قىمبات ەكەنىن دە اتالارىنىڭ اۋزىنان شىققان اتالى سوزدەن ۇققان.
اسكەري بورىشىن موڭعوليادا وتەدى. كىشكەنتايىنان ۇستاز بولعىسى كەلگەن. ەپسەكتى قولىنان كوپ نارسە كەلەتىن. قولىنا تيگەن زات قۇلپىرىپ كەتەدى. كوكىرەگىن قولامتانىڭ شوعىنداي جىلىتىپ, الىستان ايالايتىن ارمانى دا كوپ. جەلكىلدەپ ءوسىپ كەلە جاتقان جاس ۇرپاقتى ۇلاعاتتى ۇستاز بولىپ بىلىمگە, بىلىككە, جاسامپازدىققا باۋلىسا, پارىزىنىڭ تولايىم وتەلگەنى دە. وسى ۇكىلى ءۇمىت قولىنان جەتەلەپ بۇرىنعى تسەلينوگراد قالاسىنداعى پەداگوگيكالىق ينستيتۋتقا اكەلگەن. تۇلا بويىنداعى تالپىنىس وسى جەردە شىڭدالىپ, بىلىممەن بەكىدى. كەيىن 12 جىل شاكىرتتەرىنە ساباق بەردى.
وقىس وقيعا 2004 جىلى ورىن العان. سول ساتتەن باستاپ انشەيىندە جادىراي جارقىراپ تۇراتىن كوك اسپان قارا شىمىلدىقپەن قىمتالا جابىلعانداي. ءتىپتى, ءۇمىت ساۋلەسى دە تالماۋسىراپ بارىپ سونەتىندەي. ەكى رەت قاتارىنان ومىرتقاسىنا وتا جاساتتى. بولمادى. قاتتى جىلدامدىقپەن كەلگەن كولىك سوققان كەزدە وپىرىلىپ كەتكەن. كىنالى ادامدى سوتتاتقان جوق. بۇل دا – ۇلكەن ادامگەرشىلىك. كەيدە ءبىر سىركەسى سۋ كوتەرمەي جۇرگەن الدەكىمدەر بايقاۋسىزدا اياعىن باسىپ كەتسەڭ, قارا ورماندى سۋعا الدىرىپ, جەر-جەبىرىڭە جەتىپ جاتپاي ما؟ ال ماستىقتىڭ سالدارىنان تەپسە تەمىر ۇزەتىن جاس جىگىتتىڭ ومىرتقاسىن وپىرىپ ماڭگىلىك مۇگەدەك ەتىپ تاستاۋ وڭاي ەمەس قوي. سول سالدارى سالماقتى سەبەپكە كىنالى جاندى كەشىرۋدىڭ ءوزى كەيىپكەرىمىزدىڭ بويىنداعى كىسىلىكتىڭ, ازاماتتىقتىڭ قانشالىقتى دەڭگەيدە ەكەنىن ايقىن اڭعارتىپ تۇرعان ءتارىزدى.
تالاي اۋىر كۇندەر مەن تۇندەردى باسىنان وتكەردى. اتتەڭ, شىركىن, قاز باسىپ جۇرسە تالاي شارۋانى تىندىرارى انىق ەدى. كەيىن قولارباعا دا ۇيرەندى. وتكەن جىلى ۇيىنە جوندەۋ جۇمىستارىن جۇرگىزگەن. قولى جەتەتىن جەردىڭ ءبارىن كوپ-كورىم كوركەيتىپ جىبەرە الادى. قول جەتپەگەن جەرىنە كەلىنشەگى مەن بالالارى كومەكتەستى. ايتەۋىر جابىلىپ ءجۇرىپ ءۇيىن كىرسە شىققىسىز ەتىپ اجارلاندىرىپ الدى. ءۇي ىرگەسىنە اياقكيىم تىگەتىن شەبەرحاناسىن سالدى. بۇرىن ىزدەپ كەلىپ بۇيىمتايىن ايتقان جۇرتتىڭ زاتىن ۇيىندە تىگىپ بەرەتىن. ەندى مىنە ءوز قولىمەن تۇرعىزعان شاعىن دا بولسا كادەگە ابدەن جارايتىن شەبەرحاناسى بار.
مۇمكىندىگى شەكتەۋلى ەرىك تەڭكەي ۇلى ءوز الدىنا جەكە كاسىپكەر رەتىندە تىركەلگەن. الدىنان جۇمىس ۇركىپ تۇراتىن شەبەردىڭ اۋىلداستارىنا سەپتىگى ءتيىپ-اق تۇر. بۇرىنعىلار «شەبەردىڭ قولى ورتاق» دەپ تەگىن ايتتى دەيسىز بە, جامان تۇماۋ جايلاعالى ج ۇلىعى توزعان اياقكيىم كوبەيدى. حالىقتىڭ تۇرمىسىن وسى ارادان دا ايىرۋعا بولادى. كەيبىرەۋلەر كەلىپ ءوتىنىشىن ايتقانىمەن, ازىن-اۋلاق تولەماقىسىن تولەۋگە قاۋقارى جەتپەي تۇرعانىن قاباعىنان ايىرادى. وندايدا ەشتەڭە سۇرامايدى. جاماپ-جاسقاپ, ءالى دە ءبىر قىستان شىعارلىق ەتىپ جوندەپ بەرەدى. ال زەينەتكەرلەر مەن مۇمكىندىگى شەكتەۋلى ادامدارعا ءتىپتى تەگىن.
– ادامدار ءبىر-بىرىنە كومەك قولىن سوزۋى كەرەك. ءسال عانا جاناشىرلىعىڭ جاندارىن جادىراتىپ جىبەرەدى ەمەس پە؟ بىزگە تەندەرگە قاتىسۋ ماسەلەسىن شەشۋ قيىن. وتكەندە 100 مىڭ تەڭگەنىڭ جۇمىسىن ۇتىپ الىپ, ورىنداپ بەردىم. ايەلىم ارقىلى نەسيە راسىمدەپ, تىگىن ماشيناسىن ساتىپ الدىم. «بالالار الاڭداماي جۇمىسىن ىستەسىن», دەپ قازىر نەمەرە باعىپ وتىرمىز, – دەيدى ە.تەڭكەي ۇلى.
قاجەتتى زاتتاردى نۇر-سۇلتان قالاسىنان الدىرادى ەكەن. ونىڭ قولىنىڭ شەبەرلىگى, اياقكيىمدەردى ساپالى جوندەيتىنى كوپكە ءمالىم. وعان دا ءوزىنىڭ بويىنداعى تابيعي قابىلەتى, جاۋاپكەرشىلىگى ارقاسىندا جەتكەن. كىلەڭ جوندەۋ عانا ەمەس, ءوزى دە جىلى دا ادەمى, كوز جاۋىن الاتىن اياقكيىمدەر تىگەدى. باعاسى دا ارزان.
تاعدىرىمەن تايتالاسىپ, مويىماي العا ۇمتىلىپ كەلە جاتقان قاجىرلى جاننىڭ كەيبىرەۋگە بولىمسىز تىرشىلىك بولىپ كورىنەتىن وسى شارۋاسى شىن مانىندە كوپكە ۇلگى. ون ەكى مۇشەسى ساۋ ادامداردىڭ اراسىندا ەكى قولعا ءبىر كۇرەك تابا الماي جۇرگەن نەمەسە شارۋانىڭ مۇرتىن سىندىرماي, شالقاقتاعىسى كەلەتىندەر دە از ەمەس قوي. ال ءبىزدىڭ كەيىپكەرىمىز ساعىن سىندىرعىسى كەلگەن تاعدىردىڭ سىناعىنا توتەپ بەرىپ, ادال دا ابىرويلى ەڭبەگى ارقىلى وتباسىن اسىراپ وتىر. قالاي ايتساڭ دا, قالاي ماقتاساڭ دا سىيىپ تۇر.
اقمولا وبلىسى,
قورعالجىن اۋدانى