شىمكەنتتە قالالىق وزبەك دراما تەاترى XVIII ماۋسىمىنىڭ سالتاناتتى اشىلۋ ءراسىمى ءوتتى. مادەنيەت وشاعىنا بيىل قالالىق بيۋدجەتتەن 129 807,0 مىڭ تەڭگە, ونىڭ ىشىندە 1974 جىلى سالىنعان عيماراتتى اعىمداعى جوندەۋ جۇمىستارىن جۇرگىزۋگە 32 884,0 مىڭ تەڭگە بولىنگەن بولاتىن.
جاڭا ماۋسىمنىڭ اشىلۋىنا ارنايى قاتىسقان شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان جوندەۋدەن وتكەن تەاتردىڭ عيماراتىمەن تانىسىپ, ۇجىم جۇمىسىنا ساتتىلىك تىلەدى. ەل كولەمىندەگى جالعىز وزبەك تەاترى وسىدان 17 جىل بۇرىن, ياعني 2003 جىلى 12 قازاندا اشىلعان بولاتىن. تەاتردىڭ اشىلۋ سالتاناتىنا ەلباسى ن.نازارباەۆ قاتىسىپ, وزبەك اعايىنداردىڭ قۋانىشىن بولىسكەن-ءدى. سول كەزدەگى وڭتۇستىك قازاقستان وبلىسىندا تۇراتىن 600 مىڭعا جۋىق وزبەك دياسپوراسى ءۇشىن تەاتردىڭ اشىلۋى ءتىلىن, سالت-ءداستۇرىن ساقتاپ قالۋعا, ۇلتارالىق تاتۋلىقتى نىعايتۋعا ىقپال ەتكەنى انىق. وسى جىلدار ارالىعىندا كورەرمەن قاۋىمعا 80-نەن استام سپەكتاكل ۇسىنعان تەاتر رەپەرتۋارىندا بۇگىندە 50-دەن اسا قويىلىم بار. ءار جىلدارى قازان قالاسىندا, باكۋدە جانە قىرىمنىڭ شىعىسىنداعى كەرچتە وتكەن حالىقارالىق فەستيۆالدەرگە قاتىسىپ, جۇلدەلى ورىننان كورىنگەن تەاتر ۇجىمى پاندەميا كەزىندە دە جۇمىسىن توقتاتپاي, ونلاين فورماتتا ونەرسۇيەر قاۋىممەن بايلانىسىن جالعاستىردى. تەاتردا ۇلكەن – 480 ورىندى جانە كىشى – 80 ورىندى زالدار بار. شتات سانى – 53, ونىڭ ىشىندە شىعارماشىلىق قىزمەتكەرلەر سانى – 31.
جاڭا ساحنادا, جاڭارعان كورەرمەن زالىندا وتكەن جاڭا ماۋسىمنىڭ اشىلۋ سالتاناتىندا تەاتر ۇجىمى قاتىسۋشىلارعا بىرقاتار سپەكتاكلدەردەن ءۇزىندى, كونتسەرتتىك باعدارلاما ۇسىندى. سونداي-اق ءىس-شارا بارىسىندا شىڭعىس مۇقان 2013 جىلدان بەرى تەاتر ديرەكتورىنىڭ قىزمەتىن اتقارىپ كەلگەن يكرام حاشيمجانوۆتى زەينەتكەرلىككە شىعۋىمەن قالا اكىمى مۇرات ايتەنوۆتىڭ اتىنان قۇتتىقتاپ, يىعىنا شاپان جاۋىپ قۇرمەت كورسەتتى. «تەتاردىڭ تاريحى تەرەڭدە, سوناۋ 1929 جىلى شىمكەنتتەگى دراما تەاتر جانىنان ورىس جانە وزبەك ترۋپپالارى اشىلعان. ەكىنشى دۇنيەجۇزىلىك سوعىستان كەيىن وزبەك ترۋپپاسى قىزىلوردا قالاسىنا كوشىرىلىپتى. الايدا ارادا 3 جىل وتكەن سوڭ بىرقاتار, ونىڭ ىشىندە اكتەرلەردىڭ بارىپ-كەلۋى سىندى قيىندىقتارعا بايلانىستى جابىلعان ەكەن. ەلىمىز تاۋەلسىزدىك العان سوڭ 2013 جىلى وزبەك دراما تەاترى اشىلدى. بۇل ەلىمىزدە ءومىر ءسۇرىپ جاتقان وزبەك حالقى ءۇشىن ۇلكەن مارتەبە ءارى قولداۋ بولدى. قازاقستان مەن وزبەكتان اراسىنداعى مادەني بايلانىستى نىعايتۋعا دا زور سەپتىگىن تيگىزدى. ءبىزدىڭ تەاتر كورشى ەلدىڭ بىرقاتار وبلىستارىندا گاسترولدە بولىپ, ونەر كورسەتتى. ءوز كەزەگىندە وزبەكستاننىڭ قازاقستانداعى جىلى شەڭبەرىندە كورشى ەلدەگى ارىپتەستەرىمىز دە گاسترولدىك ساپارمەن كەلدى. بۇگىنگى ءىس-شاراعا, ياعني جاڭا ماۋسىمنىڭ اشىلۋىنا قىرعىزستان, وزبەكستان, تاجىكستان ەلدەرىنەن قۇتتىقتاۋ حاتتار كەلىپ جاتىر. الەمدى ابىگەرگە سالعان پاندەميا دا وتەر, ياعني كورشى مەملەكەتتەرمەن بايلانىس جالعاسىن تابارى انىق», دەيدى يكرام حاشيمجانوۆ. زەينەت جاسىنا جەتىپ, جاستارعا ورىن بەرۋدى ءجون ساناعان يكرام حاشيمجانوۆ ەندى باس ديرەكتوردىڭ كەڭەسشىسى رەتىندە تەاتردىڭ دامۋىنا ۇلەس قوسپاق.
شىمكەنت