الماتى قالاسىندا قىلمىس دەڭگەيى ەداۋىر تومەندەگەن. شاھاردىڭ باس پوليتسەيى سولاي دەيدى. قانات تايمەردەنوۆ وڭىرلىك كوممۋنيكاتسيالار قىزمەتى الاڭىندا وتكەن ونلاين-بريفينگتە بۇزاقىلىق, ۇرلىق, قاراقشىلىق سياقتى قىلمىستاردىڭ ايتارلىقتاي باسەڭدەگەنىن مالىمدەدى.
كۇن ساناپ اۋماعى ارتقان قالاداعى قاۋىپسىزدىك ماسەلەسىن قالت جىبەرمەي قاداعالاۋ ءۇشىن مىڭعا تارتا ءتارتىپ ساقشىسى قىزمەت ەتەدى. تايمەردەنوۆتىڭ سوزىنە سەنسەك, قازىر مەگاپوليستەگى جاعداي تۇراقتى. سوڭعى ون ايدىڭ قورىتىندىسى بويىنشا بارلىق باعىتتاعى قىلمىستار 47,5%-عا ازايعان.
– اتاپ ايتقاندا, قاراقشىلىق شابۋىل – 2,0 ەسەگە, زورلاۋ – 2,1 ەسەگە, توناۋ – 2,2 ەسەگە, بوتەننىڭ مۇلكىن ۇرلاۋ – 2,4 ەسەگە, پاتەر ۇرلىعى – 3,0 ەسەگە, كولىك ۇرلىعى 2,6 ەسەگە, كولىك ىشىنەن ۇرلاۋ فاكتىسى – 37,5 ەسەگە, كولىك قاپتالىنداعى اينالاردىڭ ۇرلانۋى – 2,5 ەسەگە, بۇزاقىلىق – 2,1 ەسەگە, الاياقتىق 22,5 ەسەگە تومەندەدى. سونداي-اق قوعامدىق ورىنداردا ورىن الاتىن قۇقىقبۇزۋشىلىق 2,9 ەسەگە, كوشەلەردە – 3,5 ەسەگە, كامەلەتتىك جاسقا تولماعاندار جاساعان قۇقىقبۇزۋشىلىق – 35,3%-عا, ۇيىمداسقان توپ – 18,9%, وتباسىلىق تۇرمىستىق سالاداعى قىلمىس 32,4%-عا ازايدى, – دەيدى قانات تايمەردەنوۆ.
پوليتسيا دەپارتامەنتى باسشىسىنىڭ سوزىنشە, قىلمىستىق قۇقىقبۇزۋشىلىق بويىنشا جالپى قىلمىستاردىڭ اشىلۋ كورسەتكىشى دە كوڭىل كونشىتەرلىك. ناتيجە بۇرىنعىعا قاراعاندا 11,6%-عا جاقسارعان. اسىرەسە قارۋلى قاراقشىلىق شابۋىل, ۇرلىق, پاتەر توناۋ, الاياقتىق سەكىلدى ازعىندىقپەن اينالىسقانداردىڭ جولى كەسىلگەن.
بىرەر اپتا بۇرىن قوعامدىق قاۋىپسىزدىكتى قامتاماسىز ەتۋ بويىنشا ۋچاسكەلىك ينسپەكتورلاردىڭ جۇمىسىن جانداندىرۋ ماسەلەسى بويىنشا كەڭەس وتكىزگەن قالا اكىمى باقىتجان ساعىنتاەۆ, ءتۇرلى قىلمىستاردىڭ الدىن الۋ بويىنشا پروفيلاكتيكالىق جۇمىستاردى كۇشەيتۋدى تاپسىرعان ەدى.
كەڭەس بارىسىندا ۋچاسكەلىك ينسپەكتورلاردىڭ جۇمىس ناتيجەلەرى تىڭدالدى. بۇگىنگى تاڭدا الماتىدا 491 ۋچاسكەلىك ينسپەكتور مەن ولاردىڭ 102 كومەكشىسى قىزمەت ەتەدى. سونداي-اق 102 ۋچاسكەلىك پۋنكت جۇمىس ىستەيدى. وتكەن جىلى قاۋىپتى ايماقتارعا ورناتىلعان 37 مودۋلدىك پوليتسيا بەكەتىنە بيىل تۇرعىندار تاراپىنان 40 مىڭعا جۋىق ءوتىنىش كەلىپ تۇسكەن. جىل باسىنان بەرى ۋچاسكەلىك ينسپەكتورلار 5 مىڭنان استام قىلمىستىق ءىستى اشكەرەلەپ, الماتىلىقتاردىڭ 370 مىڭنان استام ارىز-شاعىمىن قاناعاتتاندىرعان. ناتيجەسىندە, 61,6 مىڭ ازامات اكىمشىلىك جاۋاپكەرشىلىككە تارتىلىپتى.
بۇگىندە ۋچاسكەلىك پوليتسيا قىزمەتىنىڭ ماتەريالدىق-تەحنيكالىق بازاسىن نىعايتۋ, پوليتسيا قىزمەتكەرلەرىنىڭ مارتەبەسىن كوتەرۋ ماسەلەلەرىنە ايرىقشا ماڭىز بەرىلىپ وتىر. شاھاردا بۇل باعىتتا كەشەندى باعدارلاما قابىلداۋ جايى دا نازارعا الىنعان.
الماتى