«Nur Otan» پارتياسى تۇركىستان وبلىستىق فيليالىنىڭ كەزەكتەن تىس XL كونفەرەنتسياسىندا ماسليحاتتاعى دەپۋتاتتار كورپۋسى 70 پايىزعا جاڭاراتىنى ايتىلدى. كونفەرەنتسيادا وبلىس اكىمى, پارتيانىڭ وبلىستىق فيليال توراعاسى ومىرزاق شوكەەۆ بيىلعى پرايمەريزدىڭ ساياسي سانانى جاڭعىرتۋداعى ماڭىزدى قادام بولعانىن اتاپ ءوتتى.
– ەلباسى, «Nur Otan» پارتياسىنىڭ توراعاسى نۇرسۇلتان نازارباەۆتىڭ باستاماسىمەن ەلىمىزدە العاش رەت جاڭا فورماتتا وتكىزىلگەن پرايمەريزدىڭ قورىتىندىسى بويىنشا پارتيامىز تەگەۋرىندى تۇلعالارمەن تولىقتى. سىزدەر دەپۋتاتتىققا ۇمىتكەر رەتىندە ساياسي دوداعا قاتىسقالى وتىرسىزدار. قالىڭ ەلدىڭ, پارتيالاستاردىڭ قولداۋىمەن وسىنداي مۇمكىندىككە يە بولدىڭىزدار. سوندىقتان سەنىمدى اقتاۋعا مىندەتتىسىزدەر, – دەدى ومىرزاق ەستاي ۇلى.
جەتىنشى شاقىرىلىمدا وبلىس, اۋدان, قالا بويىنشا 320 ماندات بەرىلەدى دەپ كۇتىلۋدە. ونىڭ 275-ءى اۋداندىق جانە قالالىق ماسليحاتقا جىبەرىلسە, 45 دەپۋتات وبلىستىق ماسليحاتقا سايلانباق. جيىندا وبلىستىق ءماسليحات دەپۋتاتتىعىنا ۇسىنىلعان ۇمىتكەرلەر ءتىزىمىن Nur Otan پارتياسى وبلىستىق فيليالى توراعاسىنىڭ ءبىرىنشى ورىنباسارى بەيسەنباي تاجىباەۆ تانىستىردى. پارتيا 45 ورىنعا ۇسىنعان 84 كانديداتتىڭ ءتىزىمى ءبىراۋىزدان بەكىتىلدى. بۇعان دەيىن وبلىستىق ماسليحاتتاعى 45 مانداتتىڭ نەبارى بىرەۋى عانا ايەل دەپۋتاتقا تيەسىلى بولسا, ەندى ولاردىڭ سانى 30 پايىزعا دەيىن ارتادى. ال قازىرگى شاقىرىلىمدا 35 جاسقا دەيىن بىردە-ءبىر دەپۋتات جوق بولسا, ەندى ول 20 پايىزعا ارتپاق. وعان قوسا الدىڭعى شاقىرىلىمداعى 45 دەپۋتاتتىڭ 24-ءى بۇل ساياسي دودادان قالىس قالىپ وتىر. ءماسليحاتتىڭ 50 پايىزى ايەلدەر مەن جاستار ارقىلى جاڭارىپ, قالعان توبى پرايمەريمز قورىتىندىسى بويىنشا ۇزدىك اتانعاندارمەن تولىعادى. ياعني, وبلىستىق ءماسليحات كەمىندە 70 پايىزعا جاڭارادى.
كونفەرەنتسيادا پارتيانىڭ تۇركىستان وبلىسى بويىنشا سايلاۋالدى باعدارلاماسى دەلەگاتتاردىڭ قولداۋىمەن بەكىتىلدى. تۋريستىك جانە رۋحاني ورتالىق, اگروونەركاسىپ كەشەنى مەن ونەركاسىبى دامىعان جوعارى ترانزيتتىك ايماق بولعاندىقتان سايلاۋالدى باعدارلامادا تاريحي قالادا قىزمەتتىك سەرۆيس ساپاسىن ارتتىرۋ, تۋريزم نىساندارىن دامىتۋ ءۇشىن ينفراقۇرىلىمدى جەتىلدىرۋگە ەرەكشە ءمان بەرىلگەن. باعدارلاما اشىق كوزدەردە جاريالانىپ, پرايمەريز كەزىندە ءبىر جارىم اي بويى كەڭ كولەمدە تالقىلاندى. وسى ۋاقىتتا ايماق تۇرعىندارىنان 564 امانات پەن ۇسىنىس ءتۇسىپتى. ونىڭ ىشىندە 99,6%-ى (562) سايلاۋالدى باعدارلاما جوباسىنا قاتىستى ۇسىنىستار. ولاردىڭ 77%-ى (430) پارتيانىڭ اۋماقتىق فيليالدارىنىڭ سايلاۋالدى باعدارلامالارى جوبالارىندا قاراستىرىلعان. 8% (46) ۇسىنىس جەرگىلىكتى اتقارۋشى ورگاندار, ۇيىمدار مەن قىزمەت كورسەتەتىن كاسىپورىندار ارقىلى جەدەل شەشىلگەن. قالعان 15% (86) ۇسىنىس پارتيانىڭ اۋماقتىق فيليالدارىنىڭ سايلاۋالدى باعدارلامالارىنىڭ جوبالارىنا 7 باعىت بويىنشا قوسىمشا ەنگىزىلدى.
كونفەرەنتسيادا سايلاۋ الدىنداعى شتاب باسشىسى مەن ەكى ورىنباسارىنىڭ كانديداتۋراسى ۇسىنىلدى. شتاب باسشىسى بولىپ ب.تاجىباەۆ سايلاندى. سونىمەن بىرگە Nur Otan پارتياسىنىڭ كەزەكتەن تىس حX سەزىنە قاتىساتىن 30 دەلەگات سايلانىپ, ءتىزىمى بەكىتىلدى.
تۇركىستان وبلىسى