رەسپۋبليكالىق «Egemen Qazaqstan» گازەتىنىڭ 2020 جىلعى 10 قاراشاداعى سانىندا «بوزجىراعا قوناقۇي قاجەت پە؟» دەگەن ماقالا جارىق كورگەن بولاتىن.
بوزجىرادا تۋريستەر ءۇشىن قوناقۇي سالۋ ماسەلەسى تۋعان جەردىڭ, تابيعاتتىڭ تىلسىم سۇلۋلىعىن ساقتاۋعا بەيجاي قاراي المايتىن تەك ماڭعىستاۋلىقتاردىڭ ەمەس, بارشا وتانداستاردىڭ, ءتىپتى شەتەلدىكتەردىڭ دە سىن-پىكىرىنە ىلىكتى, ياعني قولداۋ تاۋىپ كەتە المادى. ەلدىك ماسەلە «Egemen Qazaqstan» گازەتىنىڭ بەتىندە كوتەرىلىپ, الەۋمەتتىك جەلىلەردە «جىر» بولدى.
وسىعان وراي ماڭعىستاۋ وبلىسى اكىمدىگى بوزجىراداعى جوباعا قاتىستى رەسمي تۇسىنىك بەردى.
«ماڭعىستاۋ وبلىسى قاراقيا اۋدانىندا ورنالاسقان بوزجىرا شاتقالىنا قاتىستى وبلىس اكىمدىگى رەسمي مالىمدەمە ۇسىنعان بولاتىن.
بىرىنشىدەن, بوزجىرانىڭ باسىندا ەشقانداي قۇرىلىس جۇمىستارى ءجۇرىپ جاتقان جوق.
ەكىنشىدەن, جوبا ءالى قارالۋدا. تۋريستىك نىسان سالۋعا نيەتتى كومپانيا تاراپىنان ناقتى ءارى سوڭعى جوبا ءالى كەلگەن جوق. بۇعان دەيىن ءۇش نۇسقاسى ۇسىنىلعان بولاتىن. بىراق بۇل سوڭعى ۆاريانتى دەگەن ءسوز ەمەس. ياعني تولىقتىرۋ, جەتىلدىرۋ پروتسەسىندە.
ۇشىنشىدەن, تۇرعىندار الدىن الا ەل-جۇرتقا ەسكەرتىلمەي, قوعام تالقىسىنا نەگە ۇسىنىلماعان دەگەن ءۋاج ايتۋدا. جوعارىدا اتاپ ءوتتىم. ءالى كۇنگە دەيىن اكىمدىككە نەمەسە ءتيىستى جاۋاپتى مەملەكەتتىك ورگاندارعا جوبانىڭ سوڭعى نۇسقاسى بەرىلگەن جوق. قولعا قۇجات تيگەن كەزدە, ەكولوگ, تۋريزم سالاسىنىڭ ساراپشىلارى, جۋرناليستەر جانە قوعام بەلسەندىلەرىنىڭ ويىن ەسكەرە وتىرىپ, اشىق فورماتتا قوعامدىق تىڭداۋ ۇيىمداستىرىلادى.
تورتىنشىدەن, بۋتيك-وتەل بوي كوتەرەتىن بولسا, ەڭ ازى بوزجىرا شاتقالىنان كەمىندە 1,1-5 شاقىرىم قاشىقتىقتا سالىنۋى ءتيىس. بوزجىرا ەشقانداي قورشالمايدى, ءدال قازىرگى كەيىپى سول كۇيىندە ساقتالادى.
بەسىنشىدەن, وتەلدىڭ اۋماعى 80 گا دەگەن قاتە اقپارات. بۇل جەردە شامامەن شاعىن عانا 5-6 گا شاماسىندا بولۋى مۇمكىن.
التىنشىدان, بىرنەشە قاباتتان تۇراتىن بيىك ەمەس, ءبىر قاباتتى بۋتيك-وتەل بولماق. ياعني ويىن-ساۋىق ورتالىعى ەمەس, الىس جولدان شارشاپ كەلگەن تۋريستەرگە قولايلى, دەمالۋعا ىڭعايلى, اس ءىشىپ اياق سۋىتاتىن ورتالىق رەتىندە قاراستىرىلىپ وتىر.
قوعام تاراپىنان تاعى ءبىر ءۋاج بار. قورشاعان ورتاعا, اينالىسىنداعى جان-جانۋارعا زيان بولادى دەگەن. كەرىسىنشە, ول جەردە سوڭعى تەحنولوگيالاردى ەسكەرە وتىرىپ, گاز, سۋ, توق كوزدەرى تارتىلمايدى. بارلىعى كۇن جانە جەل ەنەرگياسى كوزدەرىنەن الىناتىن بولادى. جاۋاپتى مەكەمە جول سالا وتىرىپ, رەتسىز كولىك ءجۇرىسىن رەتتەپ, قوقىس ماسەلەسىن قولعا الادى.
تاعى ءبىر ەسكەرە كەتسەك, اتالعان جوبا ءالى تالقىلانۋ ۇستىندە, ناقتى جوبا جاساقتالعان بويدا قوعام نازارىنا ۇسىنىلاتىن بولادى» دەلىنگەن ماڭعىستاۋ وبلىسى اكىمدىگى جولداعان جاۋاپتا.
جوبانىڭ بوزجىرادان تىسقارى بولۋى – حالىق قالاۋى. وڭىردە تۋريستەر ءۇشىن قولايلى جاعداي جاساۋعا سۇرانىپ تۇرعان وزگە نىساندار بار, جوبا جاساۋشىلاردىڭ بوزجىرا سىندى تابيعي سۇلۋلىقتى بۇلدىرمەسە بولعانى...
ماڭعىستاۋ وبلىسى