كوروناۆيرۋس ىندەتىنىڭ العاشقى تولقىنى الماتىعا ۇلكەن ساباق بولدى. سوندىقتان دا بۇل كۇندە مەگاپوليستىڭ دەنساۋلىق ساقتاۋ سالاسىندا كەشەندى جۇمىستار جۇرگىزىپ وتىر.
«جاڭا تولقىن» جاعدايىندا 5 500-گە جۋىق كادر رەزەرۆتە تۇر
اتالعان باعىتتا اتقارىلىپ جاتقان جۇمىستار تۋرالى كەزەكتى ونلاين-بريفينگتە جوعارى مەديتسينالىق كوللەدجدىڭ ديرەكتورى سۆەتلانا سۇلتانعازيەۆا ايتىپ بەردى. ء«دارى-دارمەكپەن دەر كەزىندە قامتاماسىز ەتۋ, كلينيكالاردىڭ ماتەريالدىق-تەحنيكالىق جابدىقتالۋى, ينفەكتسيالىق توسەكتىك ورىنداردى ۇلعايتۋ سىندى الەۋمەتتىك-ەكونوميكالىق ماسەلەلەردەن باسقا دەنساۋلىق ساقتاۋ ۇيىمدارىن مەديتسينا كادرلارىمەن قامتاماسىز ەتۋگە ەرەكشە كوڭىل ءبولىندى», دەدى ول.
مەديتسينالىق كادرلارمەن قامتاماسىز ەتۋدى تالداۋ بارىسىندا 2020 جىلعى 1 تامىزداعى جاعداي بويىنشا COVID-19 اۋرۋىن ەمدەۋگە 27 دەنساۋلىق ساقتاۋ ۇيىمى جۇمىلدىرىلىپ, 6 200-گە جۋىق توسەكتىك ورىن ورنالاستىرىلعانى انىقتالدى. سول كەزدە ينفەكتسيالىق ستاتسيونارلاردا 4 035 قىزمەتكەر ەڭبەك ەتتى.
ەپيدەميالىق جاعداي تۇراقتالا كەلە, كوپسالالى كلينيكالار قالىپتى رەجىمگە كوشكەنى بەلگىلى. كوروناۆيرۋس ينفەكتسياسى بار جۇقپالى كلينيكالاردا 100-دەن اسا ناۋقاس بار, 400-گە جۋىق دارىگەر جانە مەيىرگەر, كىشى مەديتسينالىق پەرسونالدار شتاتتىق رەجىمدە جۇمىسىن جالعاستىرىپ وتىر.
قازىر الماتى قالاسىندا قوعامدىق دەنساۋلىق باسقارماسىنا قاراستى 74 ۇيىم, 20 رەسپۋبليكالىق ۇيىم جانە 93 جەكەمەنشىك نىسانىنداعى ۇيىم جۇمىس ىستەيدى. بۇل ۇيىمداردا 38 مىڭنان اسا قىزمەتكەر بار.
«جاڭا تولقىن» جاعدايىندا 5 500-گە جۋىق مەديتسينالىق كادر رەزەرۆتە تۇر. مەديتسينالىق جوعارى وقۋ ورىندارىنىڭ وقىتۋشىلارى, رەزيدەنتتەرى مەن دارىگەر ينتەرندەرىنەن رەزەرۆ قالىپتاستىرىلدى, ولاردىڭ سانى 450-گە جۋىق.
دارىگەرلەردىڭ بىلىكتىلىگىن كوتەرۋگە قاراجات ءبولىندى
الماتىدا COVID-19 اۋرۋىن دياگنوستيكالاۋ مەن ەمدەۋ تاقىرىپتارى دارىگەر دايارلاۋدىڭ باسىم باعىتتارىنا اينالىپ وتىر.
«بيىل كۆي دياگنوستيكاسى جانە ەمدەۋ, جاڭا ينفەكتسيالىق كلينيكالاردا جۇمىس ىستەۋ ءۇشىن مەديتسينا قىزمەتكەرلەرىن دايارلاۋعا باسا كوڭىل ءبولىندى. وسى وزەكتى تاقىرىپقا شەتەلدىك (يزرايل, گەرمانيا, رەسەي, يسپانيا, انگليا, كورەيا جانە ت.ب.) جانە وتاندىق مامانداردى تارتا وتىرىپ, بىلىكتىلىكتى ارتتىرۋدىڭ 40-تان اسا تسيكلى وتكىزىلدى. كوروناۆيرۋس ينفەكتسياسى تاقىرىبى بويىنشا تاجىريبەلىك دەنساۋلىق ساقتاۋدىڭ 3 مىڭنان اسا قىزمەتكەرى ءبىلىمىن جەتىلدىردى. باسقا تسيكلداردا 4,5 مىڭعا جۋىق مامان وقىتىلدى», دەيدى جوعارى مەديتسينالىق كوللەدجدىڭ ديرەكتورى.
س.سۇلتانعازيۆانىڭ ايتۋىنشا, جىلدان جىلعا دارىگەرلەر مەن ورتا مەديتسينا قىزمەتكەرلەرىن ديپلومنان كەيىنگى دايارلاۋعا جەرگىلىكتى بيۋدجەتتەن قارجىلاندىرۋ ءوسىپ كەلەدى. وتكەن جىلدارمەن سالىستىرعاندا 2020 جىلى الماتى قالاسىنىڭ مەديتسينا قىزمەتكەرلەرىنىڭ بىلىكتىلىگىن ارتتىرۋعا جەرگىلىكتى بيۋدجەتتەن 60%-دان اسا قارجى بولىنگەن.
«2020-2021 وقۋ جىلدارىندا ءبىزدىڭ كوللەدجدە وقۋ ءۇشىن 325 گرانت ءبولىندى, ال الدىڭعى جىلدارى گرانتتار سانى 225-تەن اسپاعان. مۇنىڭ ءبارى الماتى قالاسى اكىمدىگىنىڭ جەرگىلىكتى اتقارۋشى ورگانىنىڭ تاجىريبەلىك دەنساۋلىق ساقتاۋ پروبلەمالارىنا ءجىتى نازار اۋداراتىنىن بىلدىرەدى», دەيدى سپيكەر.
كەلەر جىلى 4 100-دەن اسا كوللەدج ستۋدەنتى وقۋىن اياقتايدى
اماندىق بولسا, 2020-2021 جىلدارى مەديتسينالىق كوللەدجدەردىڭ 7,5 مىڭنان اسا تۇلەگى مەيىرگەرلەر «اسكەرىن» تولىقتىرادى. بۇگىنگى تاڭدا الماتى قالاسىندا باكالاۆرلاردى, ينتەرندەردى, رەزيدەنتتەر مەن دوكتورانتتاردى دايىنداۋمەن اينالىساتىن ءىرى جوعارى وقۋ ورىندارىنان بولەك, ورتاشا مەديتسينالىق قىزمەتكەرلەردى دايىنداۋمەن 10-نان اسا مەديتسينالىق كوللەدج اينالىسادى. بۇل وقۋ ورىندارىندا 14 مىڭنان اسا ستۋدەنت ءبىلىم الۋدا (بۇل ءبىلىم الۋشىلاردىڭ جالپى كونتينگەنتىنىڭ سانى), ونىڭ 10%-عا جۋىعى گرانتتىق نەگىزدە وقيدى. وقىتۋ «ەمدەۋ ءىسى», «مەيىربيكە ءىسى», «زەرتحانالىق دياگنوستيكا, گيگيەنا جانە ەپيدەميولوگيا», «ستوماتولوگيا», «فارماتسيا» جانە باسقا دا ماماندىقتار بويىنشا جۇرگىزىلەدى.
«2020 جىلى مەديتسينالىق كوللەدجدەردە وقۋىن اياقتاعان 3 628 تۇلەك ديپلوم الدى, اتاپ ايتقاندا, ءبىزدىڭ كوللەدجدەن 364 مامان ءبىتىردى. بۇگىنگى تاڭدا وسى جىلعى تۇلەكتەر اراسىندا جۇمىسقا ورنالاسۋ پايىزى جوعارى جانە 93%-عا دەيىن جەتەدى, بۇل ءبىزدىڭ ستۋدەنتتەرىمىزدىڭ قاجەتتىلىگىن جانە ءبىلىم بەرۋدىڭ ءتيىستى ساپاسىن كورسەتەدى», دەپ اتاپ ءوتتى س.سۇلتانعازيەۆا.
2021 جىلى كوللەدجدەردىڭ 4 100-دەن استام ستۋدەنتى وقۋىن اياقتايدى, ولار الماتى قالاسى مەن وڭىرلەردىڭ تاجىريبەلىك دەنساۋلىق ساقتاۋ سالاسىنداعى قاتارلارىن تولىقتىرادى.
وتكەن جىلدان باستاپ مەديتسينالىق ۇيىمداردىڭ سۇرانىستارىنا سايكەس, كادرلار دايارلاۋعا باعىتتالعان دۋالدى ءبىلىم بەرۋ ەنگىزىلدى, ياعني بۇل – وقۋ ورنىندا وقىتۋدى تاجىريبەلىك قىزمەتپەن ۇيلەستىرۋ, ءبىلىم الۋشى ءۇشىن جەكە باعدارلاما جاساۋ. ساباقتاردىڭ تەوريالىق بولىگى 30%-دان اسپايدى, ستۋدەنتتەر كوپ ۋاقىت تاجىريبەمەن اينالىسادى, ءارى قاراي سول ۇيىمدا جۇمىس ىستەيدى.
جالپى, الماتىدا مەديتسينا كادرلارىن دايارلاۋ جۇيەسى جولعا قويىلىپ, وسى باعىتتاعى جۇمىستار جالعاسىن تاۋىپ جاتىر.
الماتى