ءال-فارابي اتىنداعى قازۇۋ-دا جۋرناليستيكا فاكۋلتەتى باسپاگەرلىك-رەداكتورلىق جانە ديزاينەرلىك ونەر كافەدراسىنىڭ ۇيىمداستىرۋىمەن "باسپا, پوليگرافيا جانە web-تەحنولوگيالار جۇيەسىن وقىتۋ-زەرتتەۋ ماسەلەلەرى" تاقىرىبىندا حالىقارالىق عىلىمي-تاجىريبەلىك ونلاين كونفەرەنتسيا ءوتتى, دەپ حابارلايدى Egemen.kz.
ۇستاز, بيبليوگراف-عالىم, باسپاگەر, رەداكتور, فيلولوگيا عىلىمدارىنىڭتكانديداتى, دوتسەنت قوڭىر مۇقاتايقىزى مۇقاتاەۆانىڭ 70 جاسقا تولۋىنا وراي وتكەن شارا اياسىندا فوتوسۋرەتتەر كورمەسى ۇيىمداستىرىلىپ, حالىقارالىق كونفەرەنتسيا ونلاين رەجىمدە ءوتتى.
ۋنيۆەرسيتەتتىڭ باسپاسز قىزمەتىنىڭ مالىمەتىنشە, قوڭىر مۇقاتايقىزى مۇقاتاەۆا – قازاقستان رەسپۋبليكاسى مادەنيەت سالاسىنىڭ ۇزدىگى, ۇستاز, بيبليوگراف-عالىم, باسپاگەر, رەداكتور, فيلولوگيا عىلىمدارىنىڭ كانديداتى, دوتسەنت.
قوڭىر مۇقاتايقىزى - 1950 جىلى 8 قاراشادا قاراعاندى وبلىسى شەت اۋدانى اقجال كەنتىندە دۇنيەگە كەلگەن. 1968 جىلى اقجال ورتا مەكتەبىن بىتىرگەننەن كەيىن, س.م. كيروۆ اتىنداعى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە ءتۇسىپ, 1974 جىلى قازاق ءتىلى مەن ادەبيەتى ماماندىعى بويىنشا ءبىتىرىپ شىققان. ەڭبەك جولىن 1975 جىلى مەملەكەتتىك كىتاپ پالاتاسىندا بيبليوگرافتان باستاپ, رەداكتور, ءبولىم مەڭگەرۋشىسى قىزمەتتەرىن اتقارعان. 1998 جىلعى قاڭتار ايىنان قازاقستان رەسپۋبليكاسى ۇلتتىق مەملەكەتتىك كىتاپ پالاتاسىنىڭ ديرەكتورىنىڭ ورىنباسارى بولىپ قىزمەت اتقاردى.
قوڭىر مۇقاتاەۆا كوپ جىلدان بەرى ەلىمىزدىڭ مەملەكەتتىك باسپا ءىسىنىڭ دامۋىنا, ۇلتتىق بيبليوگرافيا سالاسىنىڭ وركەندەۋىنە, مەملەكەتتىك اقپارات ساياساتىنىڭ جۇزەگە اسۋىنا ەلەۋلى ۇلەس قوسىپ كەلەدى.