ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ قازاق فيلولوگياسى كافەدراسىنىڭ جانىنداعى مەملەكەتتىك ءتىلدى دامىتۋ ورتالىعىنىڭ ۇيىمداستىرىۋىمەن جوو, كوللەدج وقىتۋشىلارىنا, مەكتەپ مۇعالىمدەرىنە "وقىتۋشىنىڭ كاسىبي دامۋىن جانە تاجىريبەسىن ارتتىراتىن مۇمكىندىكتەر" تاقىرىبىندا قالالىق تاجىريبەلىك ونلاين سەمينار ءوتتى, دەپ حابارلايدى Egemen.kz.
وقىتۋشىلاردى كاسىبي دامىتۋ جانە ۇزدىكسىز كاسىبي دامۋىن دەربەستەندىرۋ, باعدارلاۋ مەن ۇزدىكسىز ءبىلىم الۋ بويىنشا بىلىكتىلىكتى ارتتىرۋدى كوزدەيتىن سەمينار-ترەنينگكە "ورلەۋ" باۇو" اق فيليالى الماتى قالاسى بويىنشا پق باي قىزمەتكەرلەرى مەن 70-تەن اسا قازاق ءتىلى جانە قازاق ادەبيەتى ءپانىنىڭ مۇعالىمدەرى قاتىستى. سەميناردا ءبىلىم سالاسىنداعى كوشباسشىلىق پەن مەنەدجمەنت ماگيسترى, فيلولوگيا عىلىمدارىنىڭ كانديداتى ەدىلباي وسپانوۆ "اكادەميالىق جازىلىم: ەسسە جانە ونىڭ تۇرلەرى" تاقىرىبىندا اكادەميالىق ءماتىن رەتىندە ەسسەنىڭ وزگە جازبا جۇمىستارىنان ايىرماشىلىقتارىن ەگجەي-تەگجەيلى ءتۇسىندىرىپ, ەسسەنىڭ تۇرلەرىنە جانە ولاردىڭ جازىلۋ قۇرىلىمدارىنا مىسالدار مەن ۇلگىلەر ارقىلى تالداۋ جاسادى. ابىلاي حان اتىنداعى قازحقجاتۋ, قازاق فيلولوگياسى كافەدراسىنىڭ دوتسەنتى, ف.ع.ك. گۇلحاديشا زاۋىربەكوۆا "قازاق ءتىلىن وقىتۋ ادىستەمەسىندەگى اۋدارما تەحنيكاسى" تاقىرىبىندا ءدارىس وقىپ, سەمينارعا قاتىسۋشىلاردىڭ سۇراقتارىنا جاۋاپ بەردى. سەمينار ترەنينگتىڭ ءۇشىنشى كۇنى اباي اتىنداعى قازۇپۋ س.قيراباەۆ اتىنداعى قازاق ءتىلى مەن ادەبيەتى كافەدراسىنىڭ اعا وقىتۋشىسى, PhD دوكتورى گۇلناز توقشىلىقوۆا "ادەبي تەك جانە ونىڭ تۇرلەرى", "ادەبي تەوريالىق ۇعىمداردى وقىتۋ جولدارى", "ادەبي وبراز تۇرلەرى جانە ونىڭ جاسالۋ جولدارى" تاقىرىپتارى تۋرالى تانىستىردى. سونىمەن قاتار, PhD دوكتورانت, ۋوريك ۋنيۆەرسيتەتىنەن مۇحتاروۆا انار ء"بىلىم بەرۋدەگى زەرتتەۋ ادىستەرى" تاقىرىبىندا ءدارىس وقىپ, ءبىلىم بەرۋدەگى زەرتتەۋ ادىستەرى تۋرالى تۇسىنىكتى دامىتۋعا باعىتتالعان ءدارىس بارىسىندا وقۋ ۇدەرىسىن زەرتتەۋدەگى ساپالىق جانە ساندىق ادىستەرىمەن قوسا ارالاس زەرتتەۋ ادىستەرى تۋرالى مول اقپارت بەرىلدى. انار نۇردىلداقىزى زەرتتەۋ جوباسىنداعى زەرتتەۋ ديزاينى بولىمىنە توقتالىپ, ءتۇرلى مىسالدار كەلتىرىپ, ءوز تاجىريبەسىمەن ءبولىستى.
سەمينارعا قاتىسۋشىلار شەتەلدىك جانە وتاندىق عالىمدار مەن پراكتيك مۇعالىمدەر ءدارىس وقيتىن 80 ساعاتتىق سەمينار جۇمىسىنىڭ مازمۇندى, ءارى مۇعالىمدەرگە اسا قاجەت تاجىريبەگە باي ەكەندىگىن اتاپ ءوتتى. الماتى قالاسى, № 8 گيمنازيانىڭ مۇعالىمى, ف.ع.ك. ابيكەەۆا باقىتجان "ستيلدىك ەرەكشەلىكتەردى انىقتاۋ. ءارتۇرلى ستيلدە ماتىندەر قۇراستىرۋ" تاقىرىبىندا حات, حابارلاما, جارناما مازمۇنىن ءتۇسىنۋ, ستيلدىك ەرەكشەلىگىن انىقتاۋ, رەسمي ستيلدەگى ماتىندەردىڭ ستيلدىك ەرەكشەلىگىن انىقتاۋ, عىلىمي ستيلدە جازىلعان ەڭبەكتەردىڭ تىلدىك جانە جانرلىق ەرەكشەلىگىن انىقتاۋ ماسەلەلەرىنە توقتالدى. سەمينار سوڭىندا تىڭداۋشىلارعا سەرتيفيكاتتار بەرىلەدى.