وركەن بيساقاەۆ: بوزجىرا شاتقالىنداعى قۇرىلىسقا بىردە-ءبىر تۇجىرىمداما بەكىتىلگەن جوق

وركەن بيساقاەۆ 2020 جىلدىڭ شىلدەسىنەن باستاپ ايماقتا كەلۋشىلەردىڭ كوبەيگەنى بايقالاتىنىن جانە بۇل ءتۋريزمدى دامىتۋدىڭ كەلەشەگى زور ەكەنىن ايتىپ ءوتتى.

"بۇگىندە Rixos قوناقۇيىنەن باسقا تانىمال باعىتتاردىڭ ءبىرى بوزجىرا شاتقالى. ءبىزدىڭ ەسەپتەۋىمىزشە, كەلۋشىلەر سانى وتكەن جىلمەن سالىستىرعاندا كەم دەگەندە 10 ەسەگە وسكەن. وندا كەمىندە 2000 ادام بارعان. كەلەسى جىلعا بولجام: بوزجىرا ايماعىنا كەمىندە 10 000 ادام كەلۋى كەرەك", دەدى وركەن بيساقاەۆ جۇمىس ساپارى اياسىندا.

ۆيتسە-مينيستر بوزجىرا شاتقالىندا ينفراقۇرىلىمدى رەتكە كەلتىرۋ مەن ونداعى تۋريستەردىڭ تىنىس-تىرشىلىگى مەن قاۋىپسىزدىگى ماسەلەلەرىن شەشۋ بويىنشا شارالار كەشەنىن قامتاماسىز ەتۋ تالاپ ەتىلەتىنىن اتاپ ءوتتى.

"بوزجىرا جەرىندەگى قۇرىلىس ماسەلەسى قوعامدىق تالقىدان, ەكولوگيالىق ساراپتامادان, ونىڭ ىشىندە قورشاعان ورتاعا اسەرىن باعالاۋ جۇمىستارىنان ءوتۋى ءتيىس. قازىرگى تاڭدا قوناقۇي قۇرىلىسى جوسپارلانباعان, بىردە-ءبىر تۇجىرىمداما بەكىتىلگەن جوق", دەپ تۇيىندەدى وركەن بيساقاەۆ

وركەن بيساقاەۆ جاعدايدى ءتۇسىندىرىپ, ەكونوميكالىق قاجەتتىلىكتەر مەن ەكولوگيالىق پروتسەستەردى ساقتاۋ اراسىنداعى تەڭگەرىم ماڭىزدى ەكەنىن اتاپ ءوتتى.

"بوزجىرا اۋماعىن قاراپ شىققاندا, وندا قوزعالىس مۇلدەم ەركىن ەكەنىن, ياعني ادامدار مەن اۆتوكولىك ەركىن جۇرە الاتىنىن جانە جەر بەدەرى قانداي دا ءبىر ارنايى دايىندىقتى تالاپ ەتپەيتىنىن كوردىك. ءبىزدىڭ ويىمىزشا, جەرگىلىكتى اۋدانعا ادامدار كوپ كەلە باستاعاندا ايماققا قاۋىپ تونەدى. تاۋدىڭ ءوزى ەمەس, توپىراقتىڭ ەرەكشەلىگىنە بايلانىستى اسىرەسە ىرگەلەس تۇرعان بولىگى وسال بولۋى مۇمكىن. سوندىقتان كەلۋشىلەردىڭ اعىنىن رەتتەپ, باسقارۋ ءۇشىن تۋريستەردى بوزجىرا تاۋىنا جاقىن جەردە قابىلدايتىن تۋريستىك وبەكتىلەر مەن اۆتوكولىكتەردىڭ قوزعالىسى ءۇشىن جولدار قاجەت", دەيدى ۆيتسە-مينيستر.

بوزجىرا "جاباي ۇشقان" جەرگىلىكتى ماڭىزى بار قورىقشاسىنىڭ اۋماعىندا ورنالاسقان. "جاباي ۇشقان" ماڭعىستاۋ وبلىسى اكىمىنىڭ 2012 جىلعى قاۋلىسىنا سايكەس قۇرىلعان جانە وبلىستىڭ تابيعي رەسۋرستار جانە تابيعات پايدالانۋ باسقارماسىنىڭ "قىزىلساي" مەملەكەتتىك وڭىرلىك تابيعي پاركىنە جاتادى.