قازاقستاننىڭ ەڭبەك ەرى قۇرالاي بايمەنوۆانىڭ باستاماسىمەن اشىلعان «د.ا.ر.» ەرىكتىلەر كلۋبىن بىلمەيتىن اقتوبەلىكتەر از. 2007 جىلدان بەرى ادەمى ۇعىمدار – دوستىق, ادالدىق, راقىمشىلىقتى تۋ ەتىپ كەلە جاتقان بەلسەندىلەردى ءسوز ەتكەندە, مارال نۇرالينا ەرىكسىز ويعا ورالادى. ويتكەنى ول – قولاربادا وتىرعان مۇمكىندىگى شەكتەۋلى جاندارعا جاستايىنان قولعابىس تانىتىپ, اقىسىز كومەك – ەرىكتىلىك قىزمەتتى كورسەتىپ جۇرگەن ۇلكەن جۇرەكتى ادام, جوعارىدا اتالعان ۇيىمنىڭ جەتەكشىسى. كەيىپكەرىمىزدىڭ وزىنە عانا ءتان ەرەكشەلىكتەرى دە جوق ەمەس. اقتوبەدەگى تاجىريبەلى ۆولونتەر قىزعا ارنايى توقتالىپ وتىرعانىمىز دا سوندىقتان.
العاشىندا «اقتوبە قالالىق سال اۋرۋىنا شالدىققان ازاماتتاردى قولداۋ قورى» قوعامدىق بىرلەستىگىندە ەرىكتى بولعان, سول ارقىلى ءجۇرىپ-تۇرۋى قيىن ادامدارعا جاردەمدەسكەن مارال – «د.ا.ر.» كلۋبىن قۇرۋشىلاردىڭ ءبىرى. بۇل سالاعا ونىڭ جولدان قوسىلماعانىن, ۇلكەن دايىندىقپەن كەلگەنىن ايتپاي كەتۋگە بولمايدى.
– 2007 جىلى اقش-تىڭ قازاقستانداعى وكىلدىگى – بەيبىتشىلىك كورپۋسى ۇيىمىنىڭ شەتەلدىك ەرىكتىسىنە كۋراتور اتاندىم. ونىمەن كەزدەسپەستەن بۇرىن الماتى قالاسىنا بارىپ, ارنايى كۋرستان ءوتتىم. سەمينارلارعا قاتىستىم. تەك قانا اعىلشىنشا سويلەيتىن پەرري تەيچەردىڭ باستى ماقساتى – قۇرالاي بازاربايقىزى اشقان بىرلەستىكتىڭ جۇمىسىمەن تانىسۋ, مۇنداعى دەنساۋلىعى دىمكاس ادامداردىڭ جاعدايىن ءبىلۋ. اۋەلدە ەكەۋمىزدىڭ ءوزارا ءتۇسىنىسۋىمىز قيىنعا سوققانىن جاسىرمايمىن, تەك ىم-يشارامەن «اڭگىمەلەسىپ» جۇردىك. بىراق «قالاۋىن تاپسا, قار جانادى» دەگەن راس ەكەن. بۇل مەنىڭ ۆولونتەرلەر جۇمىسىنا ودان سايىن ەتەنە ارالاسۋىما دا سەپتىگىن تيگىزدى. ىلە-شالا ءوز ۇيىمىمىز اشىلدى, – دەپ وتكەن كۇندەردى ۇلكەن تەبىرەنىسپەن ەسكە الدى مارال.
ۇلتتىق ۆولونتەرلىك جەلىسىنىڭ قۇرامىنا كىرەتىن «د.ا.ر.» ەرىكتىلەر كلۋبىنىڭ قازىرگى تاڭدا 120 مۇشەسى بار. 14 پەن 75 جاس ارالىعىنداعى ۆولونتەرلەردىڭ كوشباسشىسى مارال ءۇشىن ارقايسىسىنىڭ ورنى بولەك. ال بىرلەسىپ اتقارعان جۇمىستارعا ول ەرەكشە ەكپىنمەن توقتالادى. ايتالىق, ۇيىمنىڭ ەڭ العاشقى جوباسى – «التىن جۇرەك» اكتسياسى اياسىندا مۇمكىندىگى شەكتەۋلى بالالاردى تاربيەلەپ وتىرعان اتا-انالار قولداۋ تاپسا, «سپورتتىق ۆولونتەرلىك», «الەۋمەتتىك تۋريزم», ء«بىز بىرگەمىز!», ت.ب. جوبالارى تىرەك-قيمىل جۇيەسى بۇزىلعان اقتوبەلىكتەردىڭ ءبىر ساتكە بولسا دا كوڭىلىن اۋلاۋعا ءھام سەرگىتۋگە باعىتتالعان. بۇلاردىڭ بارلىعى – جىل سايىن وتكىزىلەتىن, ابدەن داستۇرگە اينالعان جوبالار.
ء«الى دە جۇزەگە اسا قويماعان جوبا-جوسپارلار بار, ارينە. وڭىردە ەرىكتىلەردىڭ لاگەرى ۇيىمداستىرىلسا, ارناۋلى توپتاعىلاردىڭ اراسىندا حوككەي ويىندارى وتكىزىلسە, كەرەمەت بولار ەدى. بارىنەن بۇرىن, ۆولونتەرلىكتىڭ قىر-سىرىن ۇيرەتەتىن, ونىڭ ءمان-ماڭىزىن جەتە تۇسىندىرەتىن ارناۋلى باعدارلامالار قولعا الىنسا ەكەن. بىلىكتى ماماندار سەمينارلار وتكىزۋى كەرەك. ولار بارلىعىنىڭ ءبىرىنشى كەزەكتە جۇرەك قالاۋىمەن, رياسىز جاسالاتىنىن ۇعىندىرسا ەكەن دەيسىڭ عوي. ايتپەسە, بىزدە ءالى كۇنگە ەرىكتىلەر تۋرالى دۇرىس تۇسىنىك قالىپتاسپاعان. كوزبوياۋشىلىققا سالىنۋدان ساقتانساق, توپ بولىپ ءجۇرۋدى ۆولونتەرلىك دەمەسەك, بۇل قوزعالىس دامي تۇسەدى», – دەيدى ءسوز اراسىندا اڭگىمەلەسۋشىمىز.
ورتالىق بەلسەندىلەرى تالاي رەسپۋبليكالىق بايقاۋلاردان جۇلدەمەن ورالىپ ءجۇر. ماسەلەن, ەلوردادا وتكەن «ۇزدىك ۆولونتەر» سايىسىندا «ۆولونتەرلىك بويىنشا ۇزدىك جوبا» اتالىمى بويىنشا «د.ا.ر.»-دىڭ جاستارى وزگەلەردەن وق بويى وزىپ شىعىپ, ءبىلىم جانە عىلىم مينيسترلىگى تاراپىنان ديپلوم مەن باعالى سىيلىققا يە بولدى. بىلتىر كلۋبتىڭ ۇيلەستىرۋشىسى گاۋھار جۇماعازيەۆانى پرەزيدەنت قاسىم-جومارت توقاەۆتىڭ ءوزى ماراپاتتادى. سونىمەن بىرگە ۇيىم كوپتەگەن حالىقارالىق, رەسپۋبليكالىق قوزعالىستاردان جەمىستى جۇمىسى ءۇشىن العىس حاتتار العانىن ايتا كەتكەنىمىز ابزال. وبلىستاعى ەڭ بەلسەندى ەرىكتىلەر ۇيىمىنىڭ ارقاسىندا وتباسىلى بولىپ جاتقاندار دا از ەمەس... جانسات-ماقپال, سەرىك-لۋنارا, نىسانبەك-تۇرسىناي, باسقا دا جۇپتار – يگىلىكتى ءىستى اتقارا ءجۇرىپ تابىسقاندار.
مارالدىڭ دا جەتىستىكتەرى ءبىرتالاي. ونىڭ ەرىكتى بولۋمەن شەكتەلمەي, جاستارمەن جۇمىس جاسايتىن ترەنەر ءھام مەنتور, ەلىمىزدىڭ باتىس ايماقتارى بويىنشا وتكىزىلگەن سۇلۋلىق بايقاۋىندا «سۇيكىمدى ارۋ» اتانعانىن, ۋنيۆەرسيتەتتى ۇزدىك بىتىرگەن مامان ەكەنىن كەلتىرە كەتەيىك. II توپتاعى مۇگەدەك جان ءۇشىن بۇل ايتۋعا تۇرارلىق اسۋلار ەمەس پە؟! كوپشىلىك تاعدىرلاستارى سەكىلدى ۇيدە وتىرىپ قالماي, قايتا اينالاسىنداعى ادامدارعا قول ۇشىن سوزاتىن ۆولونتەر قىزدىڭ ومىرگە دەگەن قۇلشىنىسى شىنىمەن ەرەكشە. ول – سونداي-اق جەڭىل اتلەتيكا بويىنشا پاراليمپيادالىق ويىنداردىڭ II دۇركىن كۇمىس جۇلدەگەرى, ارباداعى بيدەن اقتوبەدە وتكەن بايقاۋدىڭ جەڭىمپازى.
– مەنىڭ ءبىر وزگەشە قىرىم اقتوبە وبلىسىندا تۇڭعىش رەت شەتەلدىك ۆولونتەردىڭ كۋراتورى بولعانىم شىعار. ياعني سونىڭ اسەرىنەن وزگەلەرمەن قازاق, ورىس جانە اعىلشىن تىلدەرىندە قاتار سويلەسۋگە داعدىلاندىم. ايتپەسە الەۋمەتتىك ۆولونتەرلىك باعىتىن ۇستانعانداردىڭ ءبىرىمىن. ءوزىم دە بالا جاستان مۇگەدەك بولعاندىقتان, دەنە بىتىمىندە وزگەشەلىك بار ادامداردىڭ مۇڭ-مۇقتاجىن جاقسى تۇسىنەمىن.
مۇنداي توپتاعى كىسىلەرمەن جۇمىس ىستەۋ قيىن, ولار اشۋشاڭ كەلەدى دەگەن پىكىرمەن كەلىسپەيمىن. ءبارى ادامنىڭ وزىنە بايلانىستى. دەگەنمەن مۇمكىندىگى شەكتەۋلى ازاماتتارعا ەرىكتى بولۋ ءۇشىن دە ايرىقشا قابىلەت كەرەك. مىنەز-قۇلقىن ءتۇسىنىپ, پسيحولوگ بولۋىڭ شارت. ال بۇل وڭاي شارۋا ەمەس, – دەپ سىر اقتاردى «د.ا.ر.» ەرىكتىلەر كلۋبىنىڭ جەتەكشىسى.
ايبەك تاسقاليەۆ,
جۋرناليست
اقتوبە