وبلىستىق تاريحي-ولكەتانۋ مۋزەيىندە كەڭەس وداعىنىڭ باتىرىن ەسكە الدى

قوجاباي جازىقوۆ 1920 جىلى اقتوبە وبلىسى بايعانين اۋدانىنىڭ كوكتۇبەك اۋىلىندا تۋعان. وبلىس ورتالىعىندا مۇعالىمدەر دايارلايتىن ۋچيليششەنى ءبىتىرىپ, اۋىلدا مۇعالىم بولىپ  جۇمىس ىستەپ جاتقان جاس جىگىتتى 1942 جىلدىڭ 4 قاڭتارىندا تەمىر اۋداندىق اسكەري كوميسسارياتى مايدانعا جىبەرگەن. 2-ۋكراينا مايدانى, 7-گۆارديالىق ارميا, 25-گۆارديالىق اتقىشتار ديۆيزياسى  دەربەس بارلاۋ روتاسىنىڭ  ۆزۆود  كومانديرى قوجاباي جازىقوۆقا 1944 جىلدىڭ 25 جەلتوقسانىندا ۆەنگريا اۋماعىنداعى شايقاستا كورسەتكەن ەرەكشە ەرلىگى ءۇشىن كەڭەس وداعىنىڭ باتىرى اتاعى بەرىلگەن.

ول باسقاراتىن بارلاۋشىلار توبى سەندەدرە قالاسىنىڭ تۇبىندە  دۋناي تەڭىزى ارقىلى ارالعا جاسىرىنىپ ءوتىپ, جاۋدىڭ تۋ سىرتىنان سوققى بەرىپ, التى فاشيست سولداتىن تۇتقىنداعان. ەكىنشى كۇنى  بارلاۋشىلار  توبى وسى ارالعا تۇندە تاعى شابۋىل جاساپ, بۇل جولى جاۋدىڭ  70 جاۋىنگەرى مەن روتا كومانديرىن, تاعى  ءۇش وفيتسەرىن  قولعا تۇسىرگەن. بۋداپەشتكە باراتىن نەگىزگى جولدى فاشيستەردىڭ باقىلاۋىنان ازات ەتىپ,  كەڭەس اسكەرىنىڭ ۆەنگريانىڭ اۋماعىنا قاراي ەركىن وتۋىنە جول اشقان وسى اسكەري گۆارديالىق قۇرامنىڭ ساربازدارى تۇگەل ماراپاتتالدى.

كسرو جوعارعى كەڭەسى پرەزيديۋمىنىڭ 1945 جىلعى 28 ساۋىردەگى بۇيرىعىمەن  قوجاباي جازىقوۆقا كەڭەس وداعىنىڭ باتىرى اتاعى بەرىلدى. ونىڭ ەسىمى ۋكراينانىڭ پولتاۆا وبلىسى لۋبنى قالاسىنداعى 25-ءشى گۆارديالىق اتقىشتار ديۆيزياسىنا ارنالعان ەسكەرتكىشكە قاشالىپ  جازىلعان.  ەكىنشى دۇنيەجۇزىلىك سوعىستا كورسەتكەن ەرلىكتەرى ءۇشىن "ەرلىگى ءۇشىن" مەدالىمەن, "قىزىل جۇلدىز", ءۇشىنشى دارەجەلى "داڭق", "قىزىل تۋ" جانە لەنين وردەندەرىمەن  ماراپاتتالعان.

سوعىستان كەيىن بايعانين اۋدانىندا مەكتەپ مۇعالىمى بولىپ جۇمىس ىستەپ, وتباسىن قۇردى, بالا تاربيەلەدى, ۇرپاق ءوسىردى.  باتىر 1982 جاسىندا ومىردەن وتكەن. كەزدەسۋگە كەلگەن باتىردىڭ بالالارى– بالعالي,تامارا, لاۋرا, ماقپال اكەلەرى تۋرالى ەستەلىكتەرمەن ءبولىسىپ, ۇيدە ساقتالعان  مايدانداعى فوتوسۋرەتتەرىن, ءار كەزەڭدە مەرزىمدى باسىلىمداردا جارىق كورگەن ماقالالاردى مۋزەي قورىنا تاپسىردى.  

اقتوبە وبلىسى