تۇركىستان وبلىسىندا كوروناۆيرۋستىق ينفەكتسيامەن اۋىراتىن ناۋقاستاردى ەمدەۋگە جاتقىزۋ ءۇشىن تۇراقتى نەگىزدە 600 ينفەكتسيالىق جانە 340 كارانتيندىك توسەك-ورىن ۇيىمداستىرىلعان. پاندەميانىڭ ءتۇرلى ستسەناريىنە بايلانىستى توسەك-ورنىن 5 610-عا دەيىن ۇلعايتۋعا مۇمكىندىك بار, دەپ حابارلايدى Egemen.kz.
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق قوعامدىق دەنساۋلىق باسقارماسىنىڭ باسشىسى مارات پاشيموۆ مالىمدەدى. ونىڭ ايتۋىنشا, وبلىستا مەديتسينالىق ۇيىمداردىڭ ماتەريالدىق-تەحنيكالىق بازاسى ەداۋىر تولىققان. "قازىرگى تاڭدا وڭىردەگى مەديتسينالىق مەكەمەلەردە وكپەنى جاساندى جەلدەتۋ اپپاراتتارىنىڭ سانى 178-دەن 332-گە دەيىن ارتىپ, ءوسىم 46,4%-دى قۇرادى.
ال وتتەگى ستانتسياسىنىڭ سانى 2 ەسەگە ارتىپ, 8-گە جەتىپ وتىر. سونداي-اق, 80 بىرلىك وكسيگەناتسيا اپپاراتى (HI-FLOW) ساتىپ الىندى. وتتەگى كونتسەنتراتورلارىنىڭ سانى 890 بىرلىككە جەتىپ, ءوسىم 95%-دى قۇرادى. وتتەگى نۇكتەلەرىنىڭ سانى 9,7 ەسەگە ارتىپ, 205-تەن 2005 نۇكتەگە دەيىن ۇلعايدى. بيىل وبلىستىق بيۋدجەت ەسەبىنەن ءبىر دانا كومپيۋتەرلىك توموگراف پەن 3 دانا ساندىق رەنتگەن اپپاراتتارى ورناتىلدى", دەدى باسقارما باسشىسى.
سونىمەن قاتار وبلىستاعى مەديتسينالىق ۇيىمداردىڭ پۋلسوكسيمەترمەن قامتاماسىز ەتىلۋى 190-نان 3879-عا دەيىن جەتىپ, 95,1%-عا ارتقان. پتر زەرتحانالارىنىڭ سانى 3 بىرلىكتەن 9 بىرلىككە دەيىن ءوسىپ, كۇن سايىن 2500-دەن استام تەستىلەۋگە مۇمكىندىك بەرۋدە. كوروناۆيرۋستىق ينفەكتسيانىڭ ەكىنشى تولقىنىنا دايىندىق ماقساتىندا وبلىستىڭ مەديتسينالىق ۇيىمدارى دارىلىك زاتتارمەن تولىق قامتاماسىز ەتىلگەن. ەكى ايلىق قور رەزەرۆى قالىپتاستىرىلعان.
تۇركىستان وبلىسى