جاسىل جەلەككە ورانعان جازيرا قالانىڭ ءار بۇرىشىندا سان ءتۇرلى سالا ماماندارىنىڭ قولتاڭباسى بار. جاستىق جالىنى مەن جىگەرىن قوعام ءومىرىن جاقسارتۋعا ارناپ جۇرگەن ەرىكتىلەر ەككەن كوشەتتەر دە ءبىر كەزدەرى سايالى باۋعا اينالاتىنى انىق.
الماتى قالالىق Jas Otan جاستار قاناتىنىڭ جانە قالالىق قوعامدىق دامۋ باسقارماسىنىڭ قولداۋىمەن «ۆولونتەرلەر اللەياسى» جەتىسۋ اۋدانىنىڭ «گۇلدەر» ساياباعىنان ورىن تەپتى. يگى شاراعا جيىرمادان استام ۆولونتەر ۇيىمىنىڭ جەتەكشىسى مەن بەلسەندى مۇشەلەرى قاتىسىپ, شىرشا اعاشىنىڭ كوشەتتەرىن وتىرعىزدى.
– ەلىمىزدە اشىلىپ جاتقان العاشقى «ۆولونتەرلەر اللەياسىنىڭ» سيمۆولدىق ءمانى ەرەكشە. بىرىنشىدەن, قالا ەكولوگياسىنا جانە كوگالدانۋىنا ۇلەس قوسۋ. ەكىنشىدەن, كوروناۆيرۋس پاندەمياسى كەزىندە قالا تۇرعىندارىنا كومەك كورسەتىپ, ەڭبەك ەتكەن ۆولونتەرلەر ۇيىمدارىن قالا تۇرعىندارىنا تانىتۋ, دارىپتەۋ. شارانى وتكىزۋدەگى باستى ماقسات – «ۆولونتەر جىلىنىڭ» اياسىندا قالامىزداعى بارلىق بەلسەندى ەرىكتىلەر ۇيىمىنىڭ باسىن بىرىكتىرۋ. قالا اكىمىنىڭ «Jasyl Almaty» جوباسىن جۇزەگە اسىرىپ, ەكولوگيامىزدىڭ جاقسارۋىنا ۇلەس قوسۋ. اللەيا جىلدان-جىلعا جاڭا اعاشتارمەن تولىعىپ, ۆولونتەرلەر ۇيىمىنىڭ سانى ارتا بەرەدى دەگەن ويدامىن, – دەيدى الماتى قالالىق Jas Otan جاستار قاناتىنىڭ توراعاسى ءمادي احمەتوۆ.
اسەم الاڭقايدىڭ اشىلۋ سالتاناتىنا مەگاپوليستىڭ بەلسەندى تۇرعىندارى مەن جەتىسۋ اۋدانىنىڭ اقساقالدارى, سونداي-اق ءماسليحات دەپۋتاتتارى قاتىستى.
الماتى