الماتى اكىمى باقىتجان ساعىنتاەۆ تۇرعىن ءۇي, مەكتەپتەر مەن بالاباقشالار قۇرىلىستارىنىڭ بارىسىمەن تانىستى, دەپ حابارلايدى Egemen.kz قالا اكىمىنىڭ ءباسپاسوز قىزمەتىنە سىلتەمە جاساپ.
جىل سوڭىنا دەيىن اۋدانى 27 371 ش.م. بولاتىن "نۇرلى دالا" تك-دا 8 ءۇي تاپسىرىلادى. الاتاۋ اۋدانىندا اۋدانى 43 620 ش.م. 22 ۇيدەن تۇراتىن "مادەنيەت" تك سالىنۋدا. 16 ءۇي جىل سوڭىنا دەيىن پايدالانۋعا بەرىلسە, قالعانى كەلەسى جىلعا جوسپارلانعان. كەشەندى تۇردە بوي كوتەرىپ كەلە جاتقان ىقشاماۋدانداردا الەۋمەتتىك ماقساتتاعى نىساندارعا ءمان بەرىلۋدە.
جالپى, 2020 جىلى 2 396 مىڭ شارشى مەتر تۇرعىن ءۇي سالۋ جوسپارلانعان, ونىڭ ىشىندە كوممەرتسيالىق - 1 591 مىڭ شارشى مەتر نەمەسە 17 420 پاتەر, مەملەكەتتىك بيۋدجەت ەسەبىنەن - 290 مىڭ شارشى مەتر نەمەسە 5 206 پاتەر, جەكە تۇرعىن ءۇي قۇرىلىسى - 510 مىڭ شارشى مەتر نەمەسە 2062 ءۇي, جاتاقحانالار - 4,6 مىڭ شارشى مەتر. بۇدان وزگە, الماتى اكىمى مەكتەپ قۇرىلىستارىنىڭ قارقىنىن تەكسەردى. ويتكەنى, قالا تۇرعىندارى كوتەرەتىن وزەكتى ماسەلەنىڭ ءبىرى – مەكتەپتەردەگى ورىن تاپشىلىعى. اۋەزوۆ اۋدانىنىڭ جەتىسۋ-2 ىقشاماۋدانىنداعى №117 مەكتەپتىڭ جانىنان 900 ورىندى قوسالقى نىسان سالىنۋدا. ال, ناۋرىزباي اۋدانىنداعى №186 مەكتەپ جانىنان 513 وقۋشى ورىندى نىسان سالىنۋدا ءارى 120 ورىندى بالاباقشا بوي كوتەرۋدە. "جالپى كەلەسى وقۋ جىلىنىڭ باسىندا مەكتەپتەرگە جاپسارلاس سالىناتىن 8 818 ورىندى 17 قوسىمشا قۇرىلىس نىسانىن تاپسىرۋدى جوسپارلاپ وتىرمىز. 2021 جىلدىڭ سوڭىنا دەيىن الاتاۋ, ناۋرىزباي, تۇركسىب اۋداندارىندا 12 600 ورىنعا ارنالعان 8 مەكتەپ اشىلادى", - دەپ جازدى ب. ساعىنتاەۆ. سونىمەن قاتار, قالا اكىمى قالقامان ىقشاماۋدانداعى قۇرىلىس الاڭىندا بولدى, مۇندا №7 قالالىق اۋرۋحانانىڭ 48 توسەك-ورىندىق قابىلداۋ ءبولىمىنىڭ جاڭا كورپۋسى سالىنۋدا. المالى اۋدانىنداعى ءسان جانە ديزاين كوللەدجىنىڭ جانىنان سالىنعان 80 ورىندىق قوسالقى نىساننىڭ قۇرىلىسى اياقتالدى. "سالىنىپ جاتقان بارلىق نىساندارداعى جۇمىستىڭ ساپاسىن باقىلاۋعا الۋدى جانە ولاردى مەرزىمىندە پايدالانۋعا بەرۋدى تاپسىردىم. اۋلالاردىڭ, كىرە بەرىس جولداردىڭ اباتتاندىرىلۋى جانە زاماناۋي قۇرىلعىلاردىڭ جەتكىزىلۋى باستى نازاردا بولۋى ءتيىس", - دەپ اتاپ ءوتتى الماتى اكىمى ب. ساعىنتاەۆ.