«ەڭبەك» مەملەكەتتىك باعدارلاماسىنىڭ ەل ەڭسەسىن كوتەرۋگە سەپتىگى مولىنان ءتيىپ تۇر. ەل ىشىندە ءوز الدىنا ءبىر كاسىپتىڭ جالىنان ۇستاپ, ناپاقاسىن مولايتۋعا ۇمتىلاتىنداردىڭ قاتارى كوبەيىپ كەلەدى.
وتپەلى كەزەڭنىڭ وكپەك جەلىنە قابىرعاسى قايىسقان اۋىل تۇرعىندارى العاشقى كەزدە ابدىراپ قالعانى دا شىندىق. نارىقتىق قاتىناستار بەيمالىم دۇنيە بولاتىن. ويعا العانىڭ تۇگەل جۇزەگە اسا بەرە مە؟ العاشقى ۇمتىلىستا جولى بولماعاندار كەيىن بەتى قايتىپ, داعدارىپ تا قالدى. ويتكەنى ولار كاسىپكەرلىكتىڭ قىر-سىرىن بىلە بەرمەيتىن. بۇگىنگى تاڭدا ول ولقىلىقتىڭ ورنىن تولتىرۋعا قام جاسالىپ جاتىر. باعدارلاماعا قاتىسۋشىلار كاسىپكەرلىك داعدىلارىن جەتە مەڭگەرىپ, بيزنەس جوبالارىن دايىنداۋعا ۇيرەنۋدە. وسى ارقىلى ءوز ىستەرىنىڭ العا باساتىندارىنا سەنىمدى.
بيىل اۋداندا باعدارلاما ارقىلى وقىعان 54 ادام نەسيە الادى دەپ جوسپارلانعانىمەن, تەك 14-ىنە عانا 58 ملن تەڭگە كولەمىندە نەسيە بەرىلدى. ءبىر ايتا كەتەرلىگى, تاۋەكەل ەتىپ, نەسيە الۋشىلاردىڭ كوپشىلىگى اتا كاسىپ – مال شارۋاشىلىعىمەن اينالىسپاقشى. شىنىندا دا, عاسىردان عاسىرعا جالعاسىپ كەلە جاتقان, اتادان ميراس بولىپ قالعان بۇل شارۋانىڭ قاتپارلى قۇپياسى دا جوق. تەك ءوز ىسىڭە بارىنشا مۇقيات بولساڭ بولعانى.
ويعا العان ءىس وڭعارىلىپ كەتسە, وڭىردەگى ازىق-ت ۇلىك باعاسى دا ارزانداۋى ابدەن مۇمكىن. ونىڭ ۇستىنە مال باسى وسكەن سايىن بىرەۋلەر جەم-ءشوبىن دايىنداپ, ەندى بىرەۋلەر دايىن ءونىمدى وتكىزىپ, قارجى تابارلىق قارەكەت كوبەيەدى. اۋداندىق جۇمىسپەن قامتۋ ورتالىعىنىڭ مامانى ايجان مۇحامەديەۆانىڭ ايتۋىنا قاراعاندا, بيىل 31 گرانت بولىنگەن ەكەن. قازىرگى كۇنى باعدارلاماعا قاتىسۋعا سۇرانىس كوبەيە تۇسكەن. بۇل دا – جاعىمدى جايت. ويتكەنى اۋىل تۇرعىندارى ادال ەڭبەكتىڭ ءناسىبىن كورمەكشى بولىپ, ۇمتىلعانى دۇرىس. ىنتالانۋشىلار بار بولعان سوڭ بيۋدجەتتىك ءوتىنىم دە بەرىلگەن.
قازىر اۋداندا وزگەگە ۇلگى بولارلىق جاڭا كاسىپكەرلەر لەگى قاۋلاپ ءوسىپ كەلەدى. ولاردىڭ ءىسى بەرەكەلى بولعان سايىن, وزگەلەر دە قاتاردان قالمايىق دەپ قامدانا تۇسۋدە. كاسىپكەرلىكتىڭ دامۋىنىڭ ارقاسىندا ءسان سالونى, تەحنيكالىق قىزمەت كورسەتۋ ستانساسى اشىلىپ, حالىققا قىزمەت ەتە باستاعان. وسىنداي تالاپتى جاننىڭ ءبىرى – اۋدان تۇرعىنى ەلەنا گوربۋنوۆا باعدارلاما اياسىندا شاعىن نەسيەگە قول جەتكىزىپتى. الدىمەن كاسىبي بىلىگىن شىڭدايتىن كۋرس بىتىرگەن. تيىمدىلىگىن ەگجەي-تەگجەيلى ەكشەگەن, بيزنەس جوسپارىن جاساعان. بۇرىن بىرىڭعاي ساۋدامەن اينالىسقان ادام ءۇشىن كاسىپكەرلىك تاڭسىق دۇنيە ەمەس. دەمەۋ بولارلىق 6 ملن تەڭگە نەسيە قولىنا تيگەن سوڭ ازىق-ت ۇلىك ساتاتىن دۇكەن اشىپ الىپتى. قازىر بۇل دۇكەندە جەرگىلىكتى شارۋاشىلىقتاردا وندىرىلگەن كوكونىس پەن ءسۇت ونىمدەرى ساتىلادى.
– اۋدانداعى باعانى بايىپتاپ قاراپ, تىم وسىرمەۋگە تىرىستىم. سوندا ءونىمىم ءوتىمدى بولادى, حالىققا دا جاقسى. ال شارۋاشىلىق باسشىلارى بەينەتىن بەلدەن كەشىپ ءجۇرىپ وندىرگەن ونىمدەرىن تاپسىراتىن جەر ىزدەمەيدى, – دەيدى ول.
جۇمىسىن دوڭگەلەتىپ وتىرعان كاسىپكەر الداعى ۋاقىتتا تۇشپارا تسەحىن اشىپ الماقشى. ەگەر بۇل ويى جۇزەگە اسسا, بىرنەشە ادامعا جۇمىس بولماق.
اقمولا وبلىسى
بۇلاندى اۋدانى