اۋىلدىق جەرلەردە ەكى قولىنا ءبىر كۇرەك تابا الماي وتىرعان ادامدار ءۇشىن «ەڭبەك» باعدارلاماسىنىڭ شاراپاتى ءتيىپ-اق تۇر. اۋداندا ءبىر كاسىپتىڭ قۇلاعىنان ۇستاسام دەپ العا ۇمتىلۋدى نيەت ەتكەن وتىزدان اسا ادامنىڭ ويى وڭىنان ورىندالدى. ولار كاسىپكەرلىك نەگىزدەرىن وقىتۋ كۋرستارىن ءساتتى ءتامامداپ, جۇمىستارىن ۇرشىقشا ءيىرىپ وتىر.
كاسىپكەرلىك الەمىنىڭ بەيمالىم قىر-سىرى كوپ. بالكىم بۇل جەردە تاۋەكەل ەتىپ تاس جۇتۋدىڭ رەتى كەلە بەرمەۋى دە مۇمكىن. ويعا العان جۇمىسىن ورگە باستىرۋ ءۇشىن ەڭ الدىمەن كاسىپكەرلىكتىڭ العاشقى الىپپەسىن مۇقيات وقىپ, كوڭىلگە توقىپ العان ءجون. اۋداندا «بيزنەس باستاۋ» جوباسى بويىنشا ءىس تەتىگىن ۇيرەتەتىن كاسىپكەرلىك كۋرستارعا 208 ادام جىبەرىلدى. ولاردىڭ 168-ءى سەرتيفيكات الىپ, گرانتتىق قارجىلاندىرۋعا ءوتىنىش بىلدىرگەن.
– مەملەكەت تاراپىنان ءوز ءىسىمدى باستايمىن, كاسىبىمدى دوڭگەلەتىپ, نەسىبەمدى مولايتامىن دەگەندەرگە تاماشا جاعداي جاسالۋدا. بيىل ءبىزدىڭ اۋدانعا 35 گرانت ءبولىندى, ونىڭ 34-ءى بەرىلدى. جۇمىس ىستەيمىن دەگەن ادامدار كوپ بولعاندىقتان, قوسىمشا قاراجات قاجەت بولىپ, تاعى دا 15 ادامعا مەملەكەتتىك گرانت بەرىلەدى دەپ كۇتىپ وتىرمىز, – دەيدى اۋداندىق جۇمىسپەن قامتۋ ورتالىعىنىڭ مامانى باقىتجان ەسمۋرزينا.
اۋدانداعى العا ۇمتىلعان ادامنىڭ ءبىرى – 8 بالانىڭ اناسى مارتا قايسار. ول گرانت ارقىلى ەكى بىردەي جاڭا تىگىن ماشيناسىن ساتىپ الىپتى. بۇرىننان ءىس تىگۋگە يكەمى بار كاسىپكەر ءبىر جىلدان بەرى شاعىن تىگىن شەبەرحاناسىندا ءارتۇرلى تاپسىرىستار قابىلداپ, ءىس تىگە باستاعان. نەگىزىنەن, كيىم-كەشەك, ءۇي تۇرمىسىنا قاجەتتى جابدىقتار تىگۋمەن اينالىسادى. اۋداندا بۇل سالادا بۇرىن-سوڭدى حالىقتىڭ قاجەتىن ورىندايتىن ورىن كوپ بولماعاندىقتان, كەلىپ بۇيىمتايىن ايتۋشىلار قاتارى از ەمەس. تىككەن زاتىنىڭ ساپاسى جاقسى بولعاندىقتان, بىرتە-بىرتە ەل قۇلاقتانىپ, دۇمەپ كەلە باستاعان. مارتا قايساردىڭ ايتۋىنا قاراعاندا, تىگىنشىلىك ونەر تاڭسىق دۇنيە ەمەس. تەك ءىس اۋقىمىن كەڭەيتۋگە قاراجاتتىڭ تاپشىلىعى قولبايلاۋ بولىپ كەلگەن ەكەن. ەندى مىنە مەملەكەتتىك باعدارلاما قولتىعىنان دەمەپ, ىسىنە بەرەكە بەرۋدە.
– وتباسىمىز ۇلكەن بولعان سوڭ تىگىن ماشينالارىن الۋدىڭ رەتى كەلمەي ءجۇر ەدى. مەملەكەت تاراپىنان ءدال وسىنداي قامقورلىق كورسەتىلۋى وتە وڭ بولدى, – دەيدى ول.
بيىل اۋدانداعى كاسىپكەرلەر 18 ملن تەڭگەدەن اسا گرانت العان. ولاردىڭ ارقايسىسى ءارتۇرلى سالادا ءوز كاسىپتەرىن دوڭگەلەتىپ, بيزنەس الەمىندە نىق قادام باسۋدا. ءبىرى مال باقسا, ەكىنشىسى مال ونىمدەرىن ۇقساتىپ, ساۋدا سورەلەرىنە شىعارۋدا. وسى ورايدا, مەملەكەتتىك باعدارلامالاردىڭ سەپتىگى ءتيىپ تۇرعانىن ايرىقشا ايتا كەتۋگە ابدەن بولادى.
اقمولا وبلىسى,
بۇلاندى اۋدانى