"Nur Otan" پارتياسى جانىنداعى قۇقىقتىق كەڭەس وتىرىسىندا شاعىن جانە ورتا كاسىپكەرلىكتى زاڭنامالىق قولداۋ ماسەلەلەرى كوتەرىلدى, دەپ حابارلايدى Egemen.kz پارتيانىڭ ءباسپاسوز قىزمەتىنە سىلتەمە جاساپ.
كەڭەس توراعاسى, ءماجىلىس دەپۋتاتى قانات مۋسين كوروناۆيرۋس پاندەمياسى بۇكىل الەمدە ەكونوميكالىق قۇلدىراۋعا الىپ كەلدى دەپ اتاپ ءوتتى.
«ەلىمىزدە كارانتينگە بايلانىستى قولعا الىنعان ءىس-شارالار ەكونوميكاعا جانە ناقتى سەكتورداعى كاسىپورىنداردىڭ, سونىڭ ىشىندە, ەڭ الدىمەن شاعىن جانە ورتا بيزنەستىڭ قىزمەتىنە تەرىس اسەر ەتتى. مەملەكەتتىك قولداۋدىڭ ءبىرىنشى كەزەكتەگى باعىتى – زاڭنامالىق بازانى جاقسارتۋ» - دەدى قانات مۋسين.
كەڭەس مۇشەلەرىنىڭ پىكىرىنشە, شاعىن جانە ورتا بيزنەس سالاسىنداعى تۇراقتىلىق اسا ماڭىزدى, ويتكەنى شاعىن جانە ورتا بيزنەسپەن اينالىساتىنداردىڭ سانى حالىقتىڭ 31,7%-تىنقۇرايدى. كاسىپكەرلەردىڭ قۇقىقتارىن قورعاۋ جونىندەگى ۋاكىل رۋستام ءجۇرسىنوۆتىڭ ايتۋىنشا, ەنگىزىلگەن كارانتيندىك شارالاردىڭ سالدارىنان 40 مىڭنان استام بيزنەس سۋبەكتىسى زارداپ شەككەن.
«قازىرگى ۋاقىتتا كاسىپكەرلەر جۇمىس ىستەۋگە مۇمكىندىك بەرۋدى سۇراپ وتىر. پاندەميانىڭ ەكىنشى تولقىنى ءجۇرىپ جاتىر, بىراق شەكتەۋ شارالارىنا مۇقيات بولۋ كەرەك, - دەدى بيزنەس-ومبۋدسمەن.
وتىرىسقا قاتىسۋشىلار مەملەكەت باسشىسى قاسىم-جومارت توقاەۆتىڭ بيزنەستى رەتتەۋدىڭ وڭتايلى تاسىلدەرىن ازىرلەۋ جونىندەگى تاپسىرمالارىنىڭ ورىندالۋىنا توقتالدى. ەستەرىڭىزگە سالا كەتەيىك, پرەزيدەنت قازاقستان حالقىنا جولداۋىندا رەتتەۋدى «تۇبەگەيلى باسىنان باستاپ» ەنگىزۋدى, ياعني كاسىپكەرلەرگە قويىلاتىن تالاپتاردى قايتا قاراۋدى ۇسىنعان بولاتىن.
«قازىرگى ۋاقىتتا مەملەكەت تاراپىنان قويىلىپ وتىرعان 30 مىڭعا جۋىق تالاپ بار, ولاردىڭ كوپشىلىگى ەسكىرگەن, باسقالارى ءبىرىن ءبىرى قايتالايدى. وسىعان بايلانىستى كاسىپكەرلەردىڭ مەملەكەتتىك ورگاندارعا دەگەن سەنىمسىزدىگى ارتىپ كەلەدى», – دەدى كەڭەس مۇشەسى, ءماجىلىس دەپۋتاتى ۆاسيلي ولەينيك.
قالىپتاسقان جاعدايعا تۇسىندىرمە بەرە كەلە, ۇلتتىق ەكونوميكا ءبىرىنشى ۆيتسە-ءمينيسترى اسەت ەرعاليەۆ كەڭەس مۇشەلەرىنە كەلەسى جىلدىڭ قىركۇيەگىندە پارلامەنتتىڭ تومەنگى پالاتاسىنا ءتيىستى زاڭ جوباسى بەرىلەتىنىن ايتتى.
«قۇجاتتا 3 كودەكسكە, 8 زاڭعا, مەملەكەتتىك ورگانداردىڭ 66 بۇيرىعىنا بيزنەسكە كەدەرگى كەلتىرەتىن جانە ازاماتتاردىڭ دەنساۋلىعى مەن قورشاعان ورتانى قورعاۋعا باعىتتالماعان قايشىلىقتى, ەسكىرگەن تالاپتاردى جويۋعا باعىتتالعان وزگەرىستەر ەنگىزۋدى كوزدەيدى. بۇدان باسقا, بيزنەس ەسەپتىلىگىن تولىق اۆتوماتتاندىرۋدى ەنگىزۋ جانە ەسەپتىلىك بازالارىن ينتەگراتسيالاۋ جوسپارلانۋدا», - دەدى اسەت يرعاليەۆ.
تاعى ءبىر ماڭىزدى ماسەلە ميكروقارجى ۇيىمدارىنىڭ قىزمەتىنە قاتىستى بولىپ وتىر. اتاپ ايتقاندا, قۇقىقتىق كەڭەس توراعاسى بانكتىك زايمنىڭ قولجەتىمسىزدىگىنە بايلانىستى بانكتەردىڭ ميكروقارجى ۇيىمىنا جۇگىنۋگە ءماجبۇر ەكەنىن اتاپ ءوتتى.
«قازىر شىنتۋايتىندا اۆتوبۋس ايالدامالارىندا شاعىن نەسيەگە قولجەتكىزىپ, بىردەن اقشا الۋدى ۇسىنادى. بىراق بۇل اقشانىڭ قۇنى قانداي؟ كەيبىر جاعدايلاردا پايىزدىق مولشەرلەمەسى 700%-كە جەتەدى! بۇل ميكروقارجى ۇيىمدارى ازاماتتاردىڭ قارجىلىق ساۋاتسىزدىعىن پايدالانىپ, ولاردى قارىزعا باتىرۋدا. سونىمەن قاتار الاياقتىق جاعدايلارى دا ءجيى كەزدەسەدى. ادامنىڭ جسن-ءىن, تەلەفون ءنومىرىن ءبىلۋ ارقىلى ميكروكرەديتتى كەز-كەلگەن ادامعا ءىلىپ قويۋعا بولادى. ءوتىنىش ءبىلدىرۋشىنىڭ جەكە باسىن جانە كىمگە نەسيە بەرىلەتىنىن ەشكىم تەكسەرمەيدى», - دەپ اتاپ ءوتتى قانات مۋسين.
ءوز كەزەگىندە ۇلتتىق ەكونوميكا ءبىرىنشى ۆيتسە-ءمينيسترى ەكونوميكالىق ءوسىمدى قالپىنا كەلتىرۋ ماسەلەلەرى جونىندەگى شەشىمدەر زاڭ جوباسىندا ۇسىنىلعانىن مالىمدەدى. باستى جاڭالىق – ەكىنشى دەڭگەيدەگى بانكتەرگە قويىلاتىن تالاپتار ميكروقارجى ۇيىمدارىنا دا قولدانىلاتىن بولادى. بۇدان باسقا, پايىزدىق مولشەرلەمەلەرگە جانە الاياقتىقتى بولدىرماۋعا شەكتەۋلەر بەلگىلەنەدى.
قۇقىقتىق كەڭەس وتىرىسىن قورىتىندىلاي كەلە,قانات مۋسين شاعىن جانە ورتا كاسىپكەرلىكتى ودان ءارى زاڭنامالىق قولداۋدى جەتىلدىرۋ بويىنشا ءتيىستى مەملەكەتتىك ورگاندارعا ناقتى ۇسىنىستار جىبەرىلەتىنىن اتاپ ءوتتى.