اۋقىمدى تۇرعىن ءۇي قۇرىلىسىن ىنتالاندىرۋ مەملەكەتتىڭ تۇرعىن ءۇي قۇرىلىسى سالىناتىن اۋداندارعا كوممۋنيكاتسيالار تارتۋ ەسەبىنەن قامتاماسىز ەتىلەدى. وسى ماقساتتا جىل سايىن 130 ملرد تەڭگەگە دەيىن قارجى ءبولۋ كوزدەلگەن. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە قۇرىلىس جانە تكش ىستەرى كوميتەتىنىڭ توراعاسى مارحابات جايىمبەتوۆ حابارلادى.
"بۇل قارجىعا ازاماتتارعا جەكە تۇرعىن ءۇي قۇرىلىسىن سالۋ ءۇشىن بولىنەتىن 40 مىڭ جەر ۋچاسكەسىنە كوممۋنيكاتسيا تارتىلادى. تۇرعىن ءۇيدى ىسكە قوسۋ كورسەتكىشى بۇگىندە ءبىر تۇرعىنعا شاققاندا 0,71 شارشى مەترگە جەتتى. بۇل تمد ەلدەرىنىڭ ىشىندەگى ەڭ جوعارى كورسەتكىش جانە ەكونوميكالىق دامىعان ەلدەردىڭ دەڭگەيىنە جاقىندادى. مىسالى, تۇرعىن ۇيمەن قامتاماسىز ەتۋ پروبلەماسىن قارقىندى شەشۋ كەزەڭىندە جاپونيادا جىل سايىن ءبىر ادامعا 0,9-1 ش.م. تۇرعىن ءۇي, اقش-تا - 0,7-0,8 ش.م., فرانتسيا مەن گەرمانيادا - شامامەن 0,7 ش.م. سالىندى, ال قىتاي ۇزاق ۋاقىت بويى ءبىر ادامعا 1 ش.م. دەڭگەيىندە قۇرىلىس بەلسەندىلىگىن ساقتاپ كەلەدى. بۇگىنگى تاڭدا تۇرعىن ۇيگە مۇقتاج 530 مىڭنان استام ازامات كەزەكتە تۇر", - دەدى سپيكەر بۇل كورسەتكىشتەردىڭ كەزەكتە تۇرعانداردىڭ بىرىڭعاي رەسپۋبليكالىق بازاسىنان الىنعانىن اتاپ ءوتىپ.