الماتىنىڭ اقساي شاعىن اۋدانىندا ورنالاسقان كولىك جوندەۋ ورتالىعىندا جارىلىس بولىپ, ءبىر ازاماتتى جەڭىل دارەجەدە كۇيىك شالدى. وقيعا سالدارىنان جوندەۋ ورتالىعىندا تۇرعان توعىز كولىكتىڭ تامتىعى قالماي جانىپ كەتكەن. قارا جاياۋ قالعان كولىك يەلەرى شىعىندى كىم وتەپ بەرەدى دەپ دال.
ءتىلسىز جاۋدىڭ نەدەن تۋىنداعانى ازىرگە انىقتالىپ جاتىر. بولجام بويىنشا, نىسانداعى ماي تولتىرىلعان بوشكەلەر وتتىڭ قىزۋىنا شىداس بەرمەي جارىلعان. وقيعا ورنىنا جەتكەن 60 ارناۋلى قىزمەتكەر مەن 13 تەحنيكا قىزىل جالىنمەن ءتۇن جارىمىنا دەيىن ارپالىسقان. تەمىر جابىندىلاردان جاسالعان انگاردىڭ اۋماعى بەت قاراتپاس ىستىق بولعاندىقتان ءورتتى اۋىزدىقتاۋ وڭايعا سوققان جوق. توتەنشەلىكتەر كەلگەنگە دەيىن توسىن اپاتقا توسقاۋىل بولسام دەگەن ولەگ ەسىمدى ازاماتتىڭ ءوزى دە ورتەنىپ كەتە جازداعان. ابىروي بولعاندا, دەنەسىن جەڭىل عانا ءورت شالىپتى.
تۇگى قالماي جانىپ كەتكەن توعىز كولىكتەن بولەك نىساننىڭ سىرتقى اۋماعىندا تۇرعان تاعى ءۇش تەمىر تۇلپار دا زارداپ شەككەن. بىراق ەكى كولىكتىڭ يەسى ارىز-شاعىم جازۋدان باس تارتىپتى. وقيعا ورىن العان اۋماقتى تورۋىلداپ جۇرگەن كولىك يەلەرىنەن ۇيقى قاشقان. زارداپ شەككەن ەڭ قىمبات كولىكتىڭ قۇنى 10 ملن, ال ەڭ ارزان دەگەنى كەمىندە 2 ملن تەڭگە تۇرادى.
تەحنيكالىق ورتالىققا تەجەگىشىن جوندەتۋگە كەلىپ, اياق استى جەر سيپاپ قالعان باقتىباي سۇلتانباەۆ كولىگىن نەسيەگە الىپتى. تۇراقتى جۇمىسى جوق ازامات, وسى تەمىر تۇلپارىمەن ادام تاسىمالداپ بالا-شاعاسىنىڭ نان-تۇزىن اجىراتىپ وتىرعان. «كوز الدىمدا كولىگىم كوككە ۇشتى. ساقتاندىرۋ كومپانياسىنا حابارلاسسام, ءبىز تەك جول كولىك وقيعاسى بولعان جاعدايدا عانا شىعىندى وتەپ بەرە الامىز دەگەندى ايتادى. نەسيەگە العاندىقتان بانككە دە تەلەفون سوقتىم. ولار دا ەشقانداي جەڭىلدىك جاساي المايتىندارىن مالىمدەدى. جوندەۋ ورتالىعى شىعىندى بىردەن وتەپ بەرە الادى دەگەنگە سەنۋ قيىن. مۇندا دا نىساندى جالعا الىپ ءوزىمىز سەكىلدى جان باعىپ جۇرگەن جاندار», دەيدى باقتىباي سۇلتانباەۆ.
توعىز كولىكتىڭ يەسى اۋەزوۆ اۋدانىنا قاراستى توتەنشە جاعدايلار بولىمىنە ارىز جازعان. قۇزىرلى ورىننىڭ باسشىسى ايدار سقاباەۆتىڭ سوزىنشە, زەرتتەۋ قورىتىندىسى 10 كۇننەن كەيىن عانا دايىن بولادى. ناقتى كەلگەن شىعىن كولەمى دە زەرتتەۋ جۇمىستارى جۇرگىزىلگەننەن كەيىن انىقتالماق. قورىتىندى دايىن بولعاننان كەيىن ءىس سوتقا جىبەرىلەدى.
ستاتيستيكانى سويلەتسەك, جىل سايىن ەل اۋماعىندا 2 مىڭنان استام اۆتوكولىك ورتەنەدى. بۇل ورتتەردىڭ جالپى سانىنىڭ 20%-ىن قۇرايدى. كوپ جاعدايدا اپات ەلەكتر سىمدارىنىڭ توزۋى مەن جوندەۋ ورتالىقتارىنداعى دانەكەرلەۋ جۇمىستارىن جۇرگىزۋ كەزىندە ءورت قاۋىپسىزدىگى ەرەجەلەرىن ورەسكەل بۇزۋ سالدارىنان تۋىندايتىن كورىنەدى. قاساقانا ءورت قويۋ فاكتىلەرى دە ستاتيستيكانى تولىقتىرۋدا.
ەستە بولسا, وتكەن جىلى گاز باللون جابدىقتارىمەن جابدىقتالعان كولىكتەردىڭ جابىق تۇراقتارعا كىرۋىنە تىيىم سالۋ تۋرالى ءتيىستى زاڭناماعا تولىقتىرۋلار ەنگىزىلگەن بولاتىن. 2019 جىلعى 13 جەلتوقسانداعى ۇكىمەتتىڭ №921 قاۋلىسىنا ساي تۇرعىن ۇيلەرگە جانە قوعامدىق عيماراتتارعا كىرىكتىرىلگەن جانە جاپسارلاس سالىنعان اۆتوتۇراقتارعا ءورت قاۋىپسىزدىگى قاعيدالارىنا ساي گازبەن جۇرەتىن كولىكتەردى قويۋعا رۇقسات جوق. بۇل تالاپتار مەملەكەتارالىق جانە ۇلتتىق قۇرىلىس نورمالارىندا كوزدەلگەنىن اتاپ ءوتۋ قاجەت. 550 مىڭ كولىك رەسمي تۇردە تىركەلگەن مەگاپوليستە گازبەن جۇرەتىن كولىكتەر سانى جىل ساناپ ارتىپ كەلەدى. ۇنەمدى ءارى ەكولوگيالىق تۇرعىدان ءتيىمدى بولعانىمەن مۇنداي كولىكتەردىڭ ورتكە بەيىم بولاتىنى ماماندار تاراپىنان از ايتىلىپ جۇرگەن جوق. وسى تۇستا جوعارىدا ءبىز ايتقان تالاپتىڭ قالاي قاداعالانىپ جاتقانى باسا نازار اۋدارۋدى قاجەت ەتەتىندەي.
الماتى