ماڭعىستاۋدا مۇمكىندىگى شەكتەۋلى ايەلدەر مەن مۇگەدەك بالاسى بار انالارعا ارنالعان جوبا باستالدى. «ەرەكشە جانداردىڭ ساتتىلىك سينەرگياسى» دەپ اتالاتىن جوبا ورتا ازياداعى ازاماتتىق قوعامدى قولداۋ اياسىندا جۇزەگە اسىرىلدى.
«ۇرپاق next» قوعامدىق قورىنىڭ باسشىسى گۇلجانات مۇراتبايدىڭ ايتۋىنشا, ەۋرازيا قورى ۇكىمەتتىك ەمەس ۇيىمداردىڭ الەۋەتىن كوتەرۋ ماقساتىندا ارنايى گرانت بولگەن. وندا ماڭعىستاۋدىڭ «ۇرپاق Next» قوعامدىق قورى جەڭىمپاز اتاندى.
– بيىل قازان ايىنان باستالعان جوبا 2021 جىلدىڭ ءساۋىر ايىنا دەيىن جۇزەگە اسادى. جوبا مۇمكىندىگى شەكتەۋلى ايەلدەردى جۇمىسپەن قامتىپ جانە كاسىپكەرلىكپەن اينالىسۋعا كومەكتەسەدى. بۇعان 18 بەن 45 جاس ارالىعىنداعى وڭىردە تۇراتىن مۇمكىندىگى شەكتەۋلى قىز-كەلىنشەكتەر مەن ەرەكشە بالا تاربيەلەپ وتىرعان انالار قاتىسا الادى, – دەدى گ.مۇراتباي.
جوبا اياسىندا ماماندار مۇمكىندىگى شەكتەۋلى قىز-كەلىنشەكتەرگە قۇراق قۇراۋ, كونديتەر, ۆيزاجيست, SMM مامانى بويىنشا ونلاين كۋرس وتكىزەدى. كەيىن كۋرسقا قاتىسۋشىلار ءوز كاسىبىن اشۋ, باسقارۋ, ماركەتينگ, ساتۋ, جەكە برەندتى قالىپتاستىرۋ, الەۋمەتتىك جەلىلەردى ءتيىمدى پايدالانۋ, مەملەكەتتىك باعدارلامالار مەن سۋبسيديا الۋ سەكىلدى تاقىرىپتاردى قامتىعان بيزنەس كۋرسىنان وتەدى.
مالىمەتتەر ماڭعىستاۋ وبلىسىندا 27 481 مۇمكىندىگى شەكتەۋلى ادام تۇراتىنىن كورسەتەدى. ونىڭ 56%-ى ەڭبەككە قابىلەتتى سانالادى. باستى ماقسات ناتيجەلى جۇمىسپەن قامتۋ باعىتى بولعاندىقتان, تۇرعىلىقتى جەردە جۇمىسقا ورنالاسۋعا نەمەسە ءوز كاسىبىن اشۋعا اتالعان قوعامدىق قور مۇمكىندىگىنشە ىقپال ەتەدى.
جاناشىر بولىپ, ءبىرىن-ءبىرى قولداپ ءجۇرۋ – ازاماتتىقتىڭ, ادامگەرشىلىكتىڭ بەلگىسى. ال مۇگەدەك جاندارعا كومەك قولىن سوزۋ جاقسىلىقتىڭ دا جاقسىلىعى بولماق.
ماڭعىستاۋ وبلىسى