تۇركىستان وبلىسىنىڭ پوليتسەيلەرى ەسىرتكى تاسىمالداۋشىلاردان 1 تسەنتنەردەن استام ماريحۋانا تاركىلەدى, دەپ حابارلايدى Egemen.ءkz ىىم ءباسپاسوز قىزمەتىنە سىلتەمە جاساپ.
بۇگىن بريفينگتە تۇركىستان وبلىسى پوليتسيا دەپارتامەنتى باستىعىنىڭ ورىنباسارى قۇرمانبەك ساحوۆ وبلىس اۋماعىنان اسا ءىرى كولەمدە ەسىرتكىنى زاڭسىز تاسىمالداۋدىڭ ەكى جايتىنىڭ جولى كەسىلگەندىگىن ايتتى:
– وتكەن جۇما جانە سەنبى كۇندەرى "قاراسورا" مەن "قۇقىقتىق ءتارتىپ" جەدەل-پروفيلاكتيكالىق ءىس-شارالارى اياسىندا پوليتسەيلەر ەسىرتكى زاتتارىنىڭ ەكى ءىرى پارتياسىن تاركىلەدى. ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى مەن تۇركىستان وبلىسى پد جپق پاترۋلدىك پوليتسيا باتالونىنىڭ بىرلەسكەن وپەراتسياسى ناتيجەسىندە ءبىرىنشى جايت بويىنشا 60 كگ ماريحۋانا, ال ەكىنشىسىندە 48 كەلى ەسىرتكى تاركىلەندى.
ناقتىلاپ ايتار بولساق, پاترۋلدىك پوليتسەيلەر رەسپۋبليكالىق ماڭىزى بار الماتى-تاشكەنت-تەرمەز اۆتوجولىنىڭ 594 شاقىرىمىندا جول قاۋىپسىزدىگىن قامتاماسىز ەتۋ قىزمەتىن اتقارۋ بارىسىندا جول ەرەجەسىن بۇزعان "مازدا" ماركالى اۆتوكولىگىن توقتاتادى. كولىك قۇجاتتارىن تەكسەرۋ كەزىندە ءتارتىپ ساقشىلارى اشۋعا بوي الدىرىپ, قارسىلىق كورسەتۋگە تىرىسقان جۇرگىزۋشى مەن ونىڭ جولاۋشىسىنىڭ مىنەز-قۇلقىنان كۇماندانادى. سوندىقتان بولىپ جاتقان جاعدايدى ەسكەرە وتىرىپ, پوليتسەيلەر كولىكتى تۇگەلدەي تەكسەرمەككە بەل بۋادى.
ناتيجەسىندە, ولار كولىكتىڭ جۇكسالعىشىنان ەسىرتكى زاتىنا ۇقساس وتكىر ءيىسى بار التى ۇلكەن پوليەتيلەن قاپشىعىن تاركىلەدى. ساراپتاماعا سايكەس, قاپشىقتارداعى زاتتىڭ جالپى سالماعى 60 كەلىنى قۇراعان ماريحۋانا بولىپ شىقتى. قازىرگى ۋاقىتتا “مازدا” جولاۋشىسى, ياعني بۇرىن سوتتالعان جامبىل وبلىسىنىڭ تۇرعىنى ۋاقىتشا ۇستاۋ اباقتىسىنا قامالدى. كۇدىكتىنىڭ سوزىنە قاراعاندا, ول بۇل جۇكتەردى شىمكەنت قالاسىنا جەتكىزبەك بولعان.
ال كەلەسى كۇنى پاترۋلدىك پوليتسيا قىزمەتكەرلەرى تۇلكىباس اۋدانىندا الماتى-تاشكەنت-تەرمەز اۆتوجولىنىڭ 651 شاقىرىمىندا قاتتى جىلدامدىقپەن كەلە جاتقان جامبىل وبلىسى تۇرعىنىنىڭ باسقارۋىنداعى “اۋدي-100” اۆتوكولىگىن توقتاتتى. تەكسەرۋ بارىسىندا جامبىل وبلىسىنىڭ تۇرعىنى, ياعني جۇرگىزۋشى ماس حالدە بولعان. سودان سوڭ كولىكتىڭ سالونىن تەكسەرۋ كەزىندە قۇرامىندا وسىمدىك تەكتەس ەسىرتكى زاتى بار ءۇش پوليەتيلەن قاپشىقتى تاركىلەدى. ساراپتاما قورىتىندىسى بويىنشا تاركىلەنگەن زاتتار جالپى سالماعى 48 كەلى شىعاتىن ماريحۋانا ەكەندىگى انىقتالدى. بۇرىن سوتتى بولعان "اۋدي 100" اۆتوكولىگىنىڭ جۇرگىزۋشىسى جولاۋشىسىمەن بىرگە شىمكەنت قالاسىنا قاراي ەسىرتكىنى تاسىمالداماق بولعان.
– قازىرگى ۋاقىتتا اتالعان جايتتار بويىنشا قر قك-ءنىڭ 296 (ەسىرتكىنى وتكىزۋ ماقساتىنسىز زاڭسىز پايدالانۋ) مەن 297 (ەسىرتكىنى وتكىزۋ ماقساتىندا زاڭسىز ساقتاۋ, تاسىمالداۋ نەمەسە وتكىزۋ) باپتارىمەن سوتقا دەيىنگى تەرگەۋ جۇمىستارى باستالدى. بۇگىنگى تاڭدا كۇدىكتىلەردىڭ وسى قىلمىستارعا قاتىستىلىعى تولىعىمەن تەكسەرىلۋدە, سونداي-اق ەسىرتكى قۇرالدارىن جەتكىزۋ ارنالارى انىقتالۋدا, – دەپ تۇيىندەدى پوليتسيا دەپارتامەنتى باستىعىنىڭ ورىنباسارى قۇرمانبەك ساحوۆ.