اقىل تارازىسىنا سالىپ, بايىپتاپ قاراساڭىز, كاسىپ ىستەيمىن دەگەن ادامعا مەملەكەت تاراپىنان كورسەتىلىپ جاتقان كومەك از ەمەس. بۇل ورايدا ءتىپتى وكپەلەۋدىڭ ءجونى جوق. بيىل وبلىستىڭ 632 ازاماتىنا كاسىپتەرىن دامىتۋ ءۇشىن 2,5 ملرد تەڭگە كولەمىندە كومەك كورسەتىلگەن.
ءبىر ۇتىمدىسى, ءوز الدىنا كاسىبىن ەندى باستايمىن دەگەندەر قايتارىمسىز گرانتقا يە بولسا, بۇل ورايدا از-كەم تاجىريبە جيناقتاعان, ەندى ءىسىن ۇلعايتۋدى كوزدەگەندەرگە شاعىن نەسيە تۇرىندە قولداۋ كورسەتىلۋدە. ءىسساپاردا بولعان كەزىمىزدە اۋىل تۇرعىندارىمەن تىلدەسە قالساق, ەڭ الدىمەن, جۇمىستى باستاپ كەتۋگە باستاپقى قارجىنىڭ جوقتىعى تۋرالى كوپ ايتىلادى. ەگەر قولىمىزعا قاراجات تيسە, ويداعىنى ورىپ, قىرداعىنى قىرىپ جۇمىس ىستەر ەدىك دەگەن ءتارىزدى نيەتىن دە بايقاتادى.
– كاسىپ قىلۋدىڭ قىر-سىرى وتە كوپ. ەڭ الدىمەن نەمەن شۇعىلداناتىنىڭدى كۇنى بۇرىن بارلاپ, ءوڭىردىڭ تىنىس-تىرشىلىگىن اڭداپ الۋىڭ كەرەك. شىعارعان زاتىڭ وتە مە, وتپەي مە, حالىققا قانشالىقتى قاجەتتىلىگى بار, ونى بىلگەن دە وتە ماڭىزدى, – دەيدى كاسىپكەر نۇرلان الپىسوۆ.
بۇل ارادا ايتپاعىمىز – ءىسىن ەندى باستاعان ادامداردىڭ شارۋاسى وڭعارىلماي جاتاتىنى. ماسەلەن, قورعالجىن اۋدانىندا باعدارلاما جۇزەگە اسىرىلا باستاعاننان بەرى 27 ادام العان نەسيەسىن ۋاقىتىندا قايتارا الماي ءجۇر. وسىنداي كەلەڭسىزدىكتىڭ كەسىرىنەن 34 ملن تەڭگە جەكە سوت ورىنداۋشىلاردىڭ ارالاسۋىمەن كەيىن قايتارىلماق. تىلدەسىپ كورسەڭىز, كاسىبىن باستايمىز دەپ قارىزعا باتقانداردىڭ ءۋاجى بيزنەس تالابىن باعامداي الماۋىنان بولىپ وتىر.
ەڭ الدىمەن, وسى ماسەلەنى ەكشەپ, جان-جاقتى دايىندالعان ءلازىم. بيىل اۋداننىڭ 17 تۇرعىنىنا 200 ايلىق ەسەپتىك كورسەتكىش مولشەرىندە 9,5 ملن تەڭگە قايتارىمسىز گرانت بەرىلگەن. ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسى شەڭبەرىندە قولدارىنا قاراجات تيگەن كاسىپكەرلەر ءوز جۇمىستارىن باستاۋدا. سولاردىڭ ءبىرى – كوپبالالى انا جانارگۇل ءجۇنىسوۆا.
مىنە, جانارگۇلدىڭ شارۋاسىن وزگەگە ۇلگى ەتۋگە بولار. بۇل وڭىردە نە قات – قۇرىلىس ماتەريالدارى. جۇمىسىن باستاماس بۇرىن اۋىل-ايماقتاعى كوزتانىستارىمەن تىلدەسكەن سوڭ, اسىرەسە, كىرپىشتىڭ قاسقالداقتىڭ قانىنداي تاپشى ەكەنىن قاپىسىز ۇققان. ءسويتىپ, قۇم مەن تسەمەنت قوسپاسىنان قۇرىلىس قابىرعالارىن تۇرعىزۋعا ارنالعان بلوك شىعارا باستاپتى. ءونىمى جاتىپ قالماي, جىلدام وتە باستاعان سوڭ ەكى قولىنا ءبىر كۇرەك تابا الماي جۇرگەن ەكى اۋىلداسىن جۇمىسقا العان. وزدەرىنىڭ ايتۋىنا قاراعاندا, قۇم-كىرپىش 20 جىلعا دەيىن بىلق ەتپەيتىن كورىنەدى. مۇنداي ارزان ماتەريالدى كەز كەلگەن قۇرىلىسقا پايدالانۋعا بولادى.
اۋداندىق جۇمىسپەن قامتۋ ورتالىعىنىڭ ديرەكتورى اسىلبەك ءمۇستافيننىڭ ايتۋىنشا, بيىل اتالعان باعدارلاما اياسىندا 32 ادامعا نەسيە بەرۋ جوسپارلانعان ەكەن. قازىر 16 ادام عانا نەسيە الىپ, جۇمىستارىن باستاعان. ءبىر اتتەگەن-ايى, ادامدار تاراپىندا ۇمتىلىس بولعانىمەن, اۋىل شارۋاشىلىعىن قارجىلاي قولداۋ قورىندا قاراجات تاپشى.
ءبىزدىڭ ەندىگى ءبىر ايتپاعىمىز, قاراجات ناقتى قولىنان ءىس كەلەتىن ادامداردىڭ قولىنا تيسە. ايتپەسە, «اپام تويعا بارسا, مەن دە بارامىن» دەۋدىڭ ءجونى جوق. قازىر ويلانباي العان 27 ادام قارىزعا كىرسە, جۇمىس ىستەيمىن دەپ جۇلقىنىپ تۇرعانداردىڭ قولىنا قاراجات تيمەي تۇر.
اقمولا وبلىسى,
قورعالجىن اۋدانى